ដោយ៖ សំនៀង

វត្តអារាមមិនត្រឹមតែជាកន្លែងគោរពបូជា តាមផ្លូវជំនឿសាសនាតែប៉ុណ្ណោះទេ ប៉ុន្តែគឺជាមជ្ឈ​មណ្ឌល​ដ៏សំខាន់ក្នុងការបណ្តុះបណ្តាលចំណេះដឹង បញ្ញាញាណ សីលធម៌ និងស្មារតីសាមគ្គី​ភាព​យ៉ាងរឹងមាំដល់ពុទ្ធបរិស័ទ និងសង្គមជាតិទាំងមូល។ នេះគឺជាការលើកឡើងរបស់ ឯកឧត្តម ឈិត សុគន្ធី រដ្ឋលេខាធិការក្រសួងធម្មការ និងសាសនា ក្នុងពិធីបើកប​វេសន​កាល​សម្រាប់​ឆ្នាំសិក្សា ២០២៦-២០២៧ ទូទាំងខេត្តតាកែវ នាព្រឹកថ្ងៃពុធ ទី០៦ ខែឧសភា ឆ្នាំ២០២៦ នៅវត្តសីហរតនារាម ក្រុងដូនកែវ ដែលមានព្រះវត្តមានសម្តេចព្រះឧត្តមបញ្ញា បណ្ឌិត ដូង ផង់ ព្រះអនុប្រធានថេរៈសភានៃព្រះពុទ្ធសាសនា និងជាព្រះអគ្គាធិការរង នៃអគ្គាធិការដ្ឋាន​ពុទ្ធិ​កសិក្សា​ជាតិ ព្រះមេគណខេត្តទាំងពីរគណៈ អនុគណក្រុងស្រុក ឯកឧត្តម វ៉ី សំណាង អភិបាល​ខេត្ត​តាកែវ ព្រះទាំងវត្តមានចូលរួមសមណសង្ឃ តាជីយាយជី យុវជនកាយឬទ្ធិ និងយុវជន​កាក​បាទក្រហម សិស្សានុសិស្សចូលរួមយ៉ាងច្រើនកុះករ ។

ឯកឧត្តម ឈិត សុគន្ធី បានមានប្រសាសន៍បន្តទៀតថា ព្រះសង្ឃគ្រប់​ជំនាន់​គឺជាអ្នកទ្រទ្រង់​វប្ប​ធម៌ អក្សរសាស្ត្រ និងទំនៀមទម្លាប់ប្រពៃណីជាតិឱ្យស្ថិតស្ថេរគង់វង្ស។ លើស​ពីនេះ ព្រះសង្ឃ​គឺជាបង្អែកផ្លូវចិត្ត និងជាអ្នកជួយសង្គ្រោះដល់ជនងាយរងគ្រោះ កុមារ​កំព្រា និងជន ចាស់ជរាគ្មានទីពឹង។

រដ្ឋលេខាធិការក្រសួងធម្មការ និងសាសនារូបនេះ បានអំពាវនាវឱ្យគណៈសង្ឃ និងអាជ្ញាធរ​ពាក់​ព័ន្ធ បន្តសហការគ្នាយ៉ាងជិតស្និទ្ធ ដើម្បីបម្រើវិស័យពុទ្ធិកសិក្សាក្នុងខេត្តតាកែវឱ្យកាន់តែ​មាន​សន្ទុះរីកចម្រើនថែមទៀត សំដៅ​ផលិតបាននូវធនធានសង្ឃ និងគ្រហស្ថដែលមាន​ទាំង​ចំណេះដឹង និងគុណធម៌ខ្ពស់​សម្រាប់​ជាតិ​មាតុភូមិ។

ជាមួយគ្នានេះ ឯកឧត្តម វ៉ី សំណាង អភិបាលខេត្តតាកែវ បានមានប្រសាសន៍កោតសរសើរ​ចំពោះ​វិស័យសាសនាដែលបានរួមចំណែកយ៉ាងធំធេងជាមួយរាជរដ្ឋាភិបាល ក្នុងការកសាង​សន្តិ​ភាពផ្លូវចិត្តដល់ប្រជាពលរដ្ឋ។ ឯកឧត្តមបានបញ្ជាក់ថា រដ្ឋបាលខេត្តតាកែវ តែងតែតម្កល់​វិស័យសាសនាជាអាទិភាព ព្រោះសាសនា និងអាណាចក្រ ត្រូវតែដើរទន្ទឹមគ្នា។ លោកបាន​ស្នើដល់​អាជ្ញាធរគ្រប់លំដាប់ថ្នាក់ ត្រូវបន្តសហការ និងផ្ដល់បង្កលក្ខណៈងាយ​ស្រួលដល់​គណៈ​សង្ឃ ក្នុងការផ្សព្វផ្សាយព្រះធម៌ ជាពិសេសការបញ្ជ្រាបការយល់ដឹង​ពីផលប៉ះពាល់នៃ​គ្រឿងញៀន និងការគោរពច្បាប់ចរាចរណ៍ តាមរយៈកម្មវិធី នាទីព្រះពុទ្ធសាសនាផ្សារភ្ជាប់​នឹង​សង្គម ដើម្បីឱ្យខេត្តកាន់តែមានសុខុមាលភាព និងសណ្ដាប់ធ្នាប់ល្អ៕