អត្ថបទ៖ វិចិត្រ

នៅក្នុងលិខិតចុះថ្ងៃទី៦ ខែកក្កដា ឆ្នាំ២០២៥ របស់លោកជំទាវ ភឿង សកុណា រដ្ឋមន្ត្រីក្រសួងវប្បធម៌កម្ពុជា ផ្ញើទៅកាន់លោកស្រី ផែថងថាន ស៊ីណាវ៉ាត់ រដ្ឋមន្ត្រីក្រសួងវប្បធម៌ថៃ ដោយរំឮកពីការប្រកាសរួមគ្នារវាងរដ្ឋាភិបាលនៃប្រទេសទាំងពីរ (កម្ពុជា-ថៃ) ឯកភាពលើការប្រគល់វត្ថុបុរាណខ្មែរទាំង២០ដុំ មកកម្ពុជាវិញ នៅក្នុងដំណើរទស្សនកិច្ចផ្លូវការ របស់លោកស្រី ផែថងថាន ស៊ីណាវ៉ាត់ ក្នុងនាមជានាយករដ្ឋមន្ត្រីថៃ កាលពីថ្ងៃទី២៣ ខែមេសា ឆ្នាំ២០២៥ នៅរាជធានីភ្នំពេញ ដែលកាលបរិច្ឆេទប្រគល់-ទទួលផ្លូវការ និងនីតិវិធីនានា ត្រូវបានក្រុមការងារបច្ចេកទេស នៃក្រសួងទាំងពីរ ឯកភាពរួចហើយ ដោយការរៀបចំពិធីប្រគល់-ទទួល នឹងធ្វើនៅទីក្រុងបាងកក ខែកក្កដា ឆ្នាំ២០២៥នេះ។

នៅក្នុងលិខិតខាងលើ លោកជំទាវរដ្ឋមន្ត្រីក្រសួងវប្បធម៌កម្ពុជាបញ្ជាក់ថា ការដឹកជញ្ជូនពីប្រទេសថៃមកប្រទេសកម្ពុជា នឹងចាប់ផ្តើមនៅខែសីហា ឆ្នាំ២០២៥នេះ ដោយរាល់ចំណាយនៃការដឹកជញ្ជូនជាបន្ទុករបស់កម្ពុជា ដែលពុំពាក់ព័ន្ធនឹងបន្ទុកថវិកាណាមួយរបស់ក្រសួងវប្បធម៌ថៃឡើយ។

ជាមួយគ្នានេះ លោកជំទាវ ភឿង សកុណា ក៏បានជំរុញឱ្យក្រសួងវប្បធម៌ថៃដែលមានលោកស្រី ផែថងថាន ជារដ្ឋមន្ត្រី អនុវត្តទៅតាមកិច្ចព្រមព្រៀង និងពេលវេលា ដែលបានកំណត់ ចៀសវាងការអូសបន្លាយពេលវេលា តទៅមុខទៀត។

សូមបញ្ជាក់ផងដែរថា កាលពីថ្ងៃទី៤ ខែកក្កដា កន្លងទៅនេះ លោកស្រីផែថងថាន ស៊ីណាវ៉ាត់(Paetongtarn Shinawatra) រដ្ឋមន្ត្រីក្រសួងវប្បធម៌ និងជានាយករដ្ឋមន្ត្រីព្យួរតំណែងរបស់ថៃ បានលើកឡើងថា ដំណើរការនៃការប្រគល់វត្ថុបុរាណចំនួន២០ដុំមកឱ្យកម្ពុជា ត្រូវបានផ្អាក​ដោយសារតែគ្មានថវិកាគ្រប់គ្រាន់ និងបានចាត់ទុកថាមិនមែនជារឿងបន្ទាន់អ្វីនោះឡើយ៕