ដោយ៖ វិចិត្រ

កម្លាំងមន្ត្រីឧទ្យានុរក្សនៃការិយាល័យដែនជម្រកសត្វព្រៃភ្នំឱរ៉ាល់ បានចុះប្រតិបត្តិការបង្ក្រាប និងទប់ស្កាត់ការដឹកជញ្ជូនឈើអារខុសច្បាប់ ដោយរកឃើញទីតាំងស្តុកឈើចំនួន ៣កន្លែង ស្ថិតក្នុងភូមិសាស្ត្រភូមិស្រែកិន ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។ នេះបើតាមការឱ្យរបស់ក្រសួងបរិស្ថាន នៅថ្ងៃទី២៩ ខែកក្កដា ឆ្នាំ២០២៦។

បើតាមក្រសួងបរិស្ថាន ប្រតិបត្តិការនេះធ្វើឡើងនៅវេលាម៉ោង ១:៤៥នាទីរំលងអាធ្រាត្រ ថ្ងៃទី២៩ ខែកក្កដា ឆ្នាំ២០២៦ ដោយកម្លាំងមន្ត្រីឧទ្យានុរក្សចំនួន ៩នាក់ ដឹកនាំដោយលោក ថន ចាន់ អនុប្រធានការិយាល័យដែនជម្រកសត្វព្រៃភ្នំឱរ៉ាល់ និងសហការជាមួយលោក តាន់ គឹមសួរ សកម្មជនបរិស្ថាន។

ក្នុងប្រតិបត្តិការនេះ ក្រុមការងារបានបង្ក្រាបការដឹកជញ្ជូនឈើអារប្រភេទឃ្នៀបនៅទីតាំងចំនួន ៣ ផ្សេងគ្នា។ វត្ថុតាងដែលរឹបអូសបានមួយផ្នែក ត្រូវបានដឹកយកទៅរក្សាទុកនៅស្នាក់ការរងឧទ្យានុរក្សស្រែកិន ដើម្បីអនុវត្តនីតិវិធីច្បាប់ ខណៈវត្ថុតាងដែលនៅសេសសល់ ក្រុមការងារកំពុងបន្តប្រមូល និងដឹកជញ្ជូនចេញពីទីតាំងបទល្មើស។

សមត្ថកិច្ចបញ្ជាក់ថា ប្រតិបត្តិការនេះជាផ្នែកមួយនៃការពង្រឹងការអនុវត្តច្បាប់ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ព្រមទាំងការពារធនធានព្រៃឈើក្នុងតំបន់ដែនជម្រកសត្វព្រៃភ្នំឱរ៉ាល់ឱ្យមានប្រសិទ្ធភាព៕