ដោយ៖ សំនៀង

តាមរយៈសេចក្តីជូនដំណឹង ស្តីពីការបិទផ្សាយជាសាធារណៈនូវឯកសារនៃការវិនិច្ឆ័យ រដ្ឋបាលខេត្តក្រចេះ ចុះថ្ងៃទី៨ ខែមករា ឆ្នាំ២០២៥ បានឱ្យដឹងថា រដ្ឋបាលខេត្តក្រចេះ សូមជូនដំណឹងដល់សាធារណជន ព្រមទាំងគ្រប់មន្ទីរ អង្គភាព និងគ្រប់ស្ថាប័ន ឬភ្នាក់ងារ ហិរញ្ញវត្ថុ ដែលពាក់ព័ន្ធនឹងក្បាលដីទាំងអស់ស្ថិតនៅក្នុងតំបន់វិនិច្ឆ័យនៃភូមិថ្មី និងភូមិសង្គម ឃុំ សណ្តាន់ ស្រុក សំបូរ ខេត្តក្រចេះ ឲ្យបានជ្រាបថាៈ ដើម្បីអនុវត្តតាមខ្លឹមសារនៃអនុក្រឹត្យខាងលើ គណៈកម្មការរដ្ឋបាលនឹងធ្វើការបិទ ផ្សាយជាសាធារណៈនូវឯកសារសុរិយោដីដែលមានប្លង់សុរិយោដីនិងបញ្ជីឈ្មោះអ្នកកាន់កាប់ដីដែលក្រុមប្រតិបត្តិ កម្មវិធីអនុវិស័យរដ្ឋបាលដីធ្លីបានធ្វើការវាស់វែង និងប្រមូលទិន្នន័យកន្លងមក។

រដ្ឋបាលខេត្តក្រចេះបានបន្តថា ហេតុដូចបានជម្រាបជូនខាងលើ សូមសាធារណជន និងអង្គភាពនានាដែលពាក់ព័ន្ធនឹងដីធ្លីទាំងអស់ស្ថិតក្នុង តំបន់វិនិច្ឆ័យខាងលើ មេត្តាចូលរួមពិនិត្យទិន្នន័យដែលមាននៅក្នុងឯកសារនៃការវិនិច្ឆ័យដើម្បីបញ្ជាក់ពីភាព ត្រឹមត្រូវ ឬ ខុសឆ្គង ដែលត្រូវកែតម្រូវ ឬ ជំទាស់លើទិន្នន័យទាំងនោះ ក្នុងរយៈពេល ១៥ ថ្ងៃ (ដោយរាប់បញ្ចូល ទាំងថ្ងៃឈប់សំរាក) គិតចាប់ពីថ្ងៃទី១៥ ខែមករា ដល់ថ្ងៃទី២៩ ខែមករា ឆ្នាំ២០២៦ ជាកំហិត ដែលមានទីតាំងនៅ នៅបរិវេណវត្តសទ្ធារាម ភូមិថ្មី ស្ថិតនៅភូមិថ្មី ឃុំសណ្តាន់ ស្រុកសំបូរ ខេត្តក្រចេះ។ ផុតកំណត់ខាងលើ គណៈកម្មការរដ្ឋបាលសន្មត់ថា  ទិន្នន័យដែលបានបើកចំហរជូនពិនិត្យជាសាធារណៈនេះ មានភាពត្រឹមត្រូវហើយ មិនអាចជំទាស់ ឬ តវ៉ានៅពេលក្រោយទៀតបានឡើយ។

សូមបញ្ជាក់ ផុតកំណត់រយៈពេលនៃការបិទផ្សាយជាសារធារណៈនេះ គណៈកម្មការរដ្ឋបាលនឹងធ្វើការបូក សរុបហើយលើកសំណើផ្តល់សិទ្ធិលើអចលនវត្ថុទៅអភិបាលខេត្តដើម្បីពិនិត្យសម្រេច រួចបញ្ចូនអោយរដ្ឋបាលសុរិយោដី ចេញវិញ្ញាបនបត្រសម្គាល់ម្ចាស់អចលនវត្ថុ(ប័ណ្ណកម្មសិទ្ធិ) ជូនអ្នកកាន់កាប់ណាដែលបានបំពេញត្រឹមត្រូវតាមច្បាប់។ គណៈកម្មការរដ្ឋបាល នឹងដាក់ទីតាំងបណ្តោះអាសន្ននៅកន្លែងបិទផ្សាយដើម្បីរង់ចាំទទួលពិគ្រោះ និងផ្ដល់យោបល់ដល់អ្នកដែលមានសំណូមពរ៕