ដោយ៖ កែវ រតនៈ

នៅព្រឹកថ្ងៃទី៣០ខែមីនា ឆ្នាំ២០២៦នេះ ក្រុមប្រជាពលរដ្ឋ១២៦នាក់តំណាងប្រជាពលរដ្ឋ១៩៦គ្រួសារ បានធ្វើដំណើរមកពីស្រុកចំនួន២នៃខេត្តព្រះវិហារគឺស្រុកសង្គមថ្មី និងស្រុករវៀង ខេត្តវិហារ​ដើម្បីដាក់ញត្តិជូនខុទ្ធកាល័យនាយករដ្ឋមន្ត្រី និង ក្រសួងរៀបចំដែនដី នគររូបនីយកម្ម និងសំណង់ ស្នើសុំអន្តរាគមន៍ករណីវិវាទលើដីធ្លីទំហំជាង៣ពាន់ហិកតា។

ក្នុងការដាក់ញត្តិនេះក្រុមប្រជាជាពលរដ្ឋបានចាត់តំណាងចំនួន៨រូបចូលដាក់ញត្តិ ដោយឡែកអ្នកផ្សេងទៀត​បានរងចាំនៅតំបន់បឹងកក់ក្នុងខណ្ឌដូចពេញ រាជធានីភ្នំពេញ និងខ្លះទៀតរងចាំនៅមុខស្ថានីយ៍រថភ្លើង ដោយមានការឃ្លាំមើលពីអាជ្ញាធរមូលដ្ឋាន និងអង្គការសង្គមស៊ីវិល។ បន្ទាប់ដាក់ញត្តិនៅខុទ្ធកាល័យនាយករដ្ឋមន្ត្រីរួចមក ក្រុមប្រជាពលរដ្ឋទាំងនោះបានចាកចេញតំបន់បឹងកក់នៅម៉ោងប្រមាណជាង១​រសៀល ឆ្ពោះទៅកាន់ក្រសួងរៀបចំដែនដី នគររូបនីយកម្ម និងសំណង់បន្តទៀតដោយមានរថយន្តរបស់រដ្ឋបាល​រាជធានីភ្នំពេញជួយដឹកជញ្ជូនផងដែរ។

បន្ទាប់ពីដាក់ញត្តិជូនខុទ្ធការល័យនាយករដ្ឋមន្ត្រី និងក្រសួងរៀបចំដែនដី និងសំណងរួចមក លោក មុត ឈាត តំណាងប្រជាពលរដ្ឋ១រូបក្នុងចំណោង៨រូបមកពីឃុំរមទម ស្រុករវៀង ខេត្តព្រះវិហារ បានប្រាប់បៃតងប៉ុស្តិ៍ថា ប្រជាពលរដ្ឋដែលរងផលប៉ះពាល់ពីការវិនិយោគរបស់ក្រុមហ៊ុនឆាយណា ហ្គ្រេតខស(ខេមបូឌា) អ៊ិន​វេសមេន គឺមានរហូតដល់ទៅ៣៩៧គ្រួសារ នៅក្នុងឃុំស្តៅ​ ឃុំចំរើន ស្រុកសង្គមថ្មី  និងឃុំរមទម ស្រុករវៀង ខេត្តព្រះវិហារ ក្នុងនោះដីនៅក្នុងស្រុករវៀង មានចំនួនជាង២ពាន់ហិកតា និងនៅក្នុងស្រុកសង្គមថ្មីមានចំនួនជាង១ពាន់ហិកតា។ លោកបន្តថា ដំបូងឡើយក៏មានការចចារផ្ដល់ប្រាក់ជូនជាពលរដ្ឋជាថ្នូរនឹងការចាកចេញចំនួន១លានរៀលក្នុង១ហិកតា និងក្រោយមកទៀតផ្ដល់ប្រាក់១លាន២សែនរៀលក្នុង១ហិកតា ប៉ុន្តែប្រជាពលរដ្ឋមិនយល់ព្រមក៏បានធ្វើញត្តិស្នើសុំអន្តរាគមន៍យ៉ាងដូច្នេះ។

លោក មុត ឈាត បន្តថា បន្ទាប់ពីតំណាងស្ថាប័នទាំង២បានទទួលយកញត្តិហើយនោះក៏បានសន្យាថា នឹងដោះស្រាយវិវាទនេះក្នុងពេលឆាប់ៗ

ក្រោយពីដាក់ញត្តិរួចក្រុមប្រជាពលរដ្ឋបានចាកចេញពីមុខក្រសួងរៀបចំដែនដីនគររូបនីយកម្ម និងសំណង់ត្រឡប់ទៅខេត្តព្រះវិហារវិញនៅម៉ោងប្រមាណជាង៣រសៀលថ្ងៃដដែល។

បៃតងប៉ុស្តិ៍មិនទាន់អាចទាក់ទងសុំព័ត៌មានបន្ថែមពីតំណាងក្រុមហ៊ុនឆាយណា ហ្គ្រេតខស(ខេមបូឌា) អ៊ិនវេសមេន បាននៅឡើយទេ ប៉ុន្តែយោងតាមយោងតាមសេចក្តីជូនដំណឹងរបស់រដ្ឋបាលខេត្តព្រះវិហារចុះថ្ងៃទី២៧ ខែមីនា ឆ្នាំ២០២៦ បានឱ្យដឹងថា រាជរដ្ឋាភិបាលបានសម្រេចផ្ដល់ដីសម្បទានសេដ្ឋកិច្ចសម្រាប់វិនិយោគដំណាំកសិ-ឧស្សាហកម្មជូនក្រុមហ៊ុនឆាយណា ហ្គ្រេតខស(ខេមបូឌា) អ៊ិនវេសមេន ស្ថិតក្នងភូមិសាស្ត្រស្រុករវៀង និងស្រុកសង្គមថ្មី ខេត្តព្រះវិហារលើផ្ទៃដីទំហំ៥,៨៩០ ហិកតា តាមរយៈអនុក្រឹត្យចុះថ្ងៃទី២៤ ខែកុម្ភៈ ឆ្នាំ២០១២៕