ដោយ៖ សំនៀង

មន្ត្រី និងអាជ្ញាធរខេត្តកណ្តាល បានចែកបណ្ណកម្មសិទ្ធិដីធ្លីចំនួន៤៦៨២ ដល់ប្រជាពលរដ្ឋ​ដែលស្ថិតនៅ​ក្នុង​ភូមិចំនួន៩ នៃសង្កាត់ចំនួន២ ក្នុងសំពៅពូន នៅថ្ងៃទី១ ខែមេសា ឆ្នាំ២០២៦។ ភូមិទាំង៩នោះមាន​ដូចជា ភូមិជ្រោយស្នោ ភូមិព្រែកជ្រៃ ភូមិខ្នារតាំងយូ ភូមិព្រែកជ្រៃក្រៅ ភូមិខ្នាតាំងយូត្បូង ភូមិព្រែកទន្លា សង្កាត់ព្រែកជ្រៃ, ភូមិកំពង់ថ្កុល ភូមិកប៉ាល់គឿង និងភូមិជ្រៃធំ សង្កាត់សំពៅពូន ក្រុងសំពៅពូន ខេត្តកណ្តាល។

ថ្លែងនាឱកាសនោះ ឯកឧត្តម គួច ចំរើន អភិបាលខេត្តកណ្ដាល បានបញ្ជាក់ថា ការផ្ដល់កម្មសិទ្ធិ​នៅ ពេលនេះ គឺផ្ដល់ជូនប្រជាពលរដ្ឋនៅកាយាល័យច្រកចេញចូលតែមួយរបស់សាលាក្រុងសំពៅពូន ដោយ​​ត្រូវផ្ដល់ជូនប្រជាពលរដ្ឋរហូតដល់អស់បណ្ណកម្មសិទ្ធិ និងបានស្នើឱ្យប្រជា​ពលរដ្ឋដែលជា​ម្ចាស់​កម្មសិទ្ធិ​ដីធ្លី​ស្ថិតនៅភូមិខាងលើ ឱ្យទៅទទួលបានកម្មសិទ្ធិដីធ្លីនេះឱ្យបានគ្រប់ៗគ្នា។

លោកបានបន្ថែមថា ការផ្ដល់បណ្ណកម្មសិទ្ធិនៅការិយាល័យច្រកចេញចូលតែមួយនេះ គឺប្រជាពលរដ្ឋមិន​តម្រូវឱ្យកាន់ឯកសាររត់ការទៅកន្លែងណាផ្សេងឡើយ គឺមកទទួលនូវការិយាល័យច្រកចេញចូលតែមួយ ហើយរាល់ឯកសារទាំងអស់ គឺមន្ត្រីជាអ្នកសម្របសម្រួល ធ្វើជូនប្រជាពលរដ្ឋដោយមិនគិតលុយឡើយ តែប្រជាពលរដ្ឋនៅតែមានកាតព្វកិច្ច ក្នុងការបង់ពន្ធជូនរដ្ឋ តាមការកំណត់របស់រដ្ឋ។ ជាមួយគ្នានេះដែរ អភិបាលខេត្តកណ្ដាលរូបនេះ បានណែនាំដល់មន្ត្រីសុរិយោដីទាំងអស់ ត្រូវធានាថារាល់​បានកម្មសិទ្ធិ​ទាំង​អស់ ត្រូវបានផ្ដល់ជូនដល់ដៃកម្មសិទ្ធិករបានគ្រប់ៗគ្នា ហើយមិនត្រូវរុញឯកសារឱ្យប្រជាពលរដ្ឋ ធ្វើការរត់​ឯក​សារដោយផ្ទាល់នោះទេ។ ក្នុងករណីដែលមានមន្ត្រីឱ្យឯកសារទៅប្រជាពលរដ្ឋ ដើម្បីរត់ការ ឯកឧត្តម គួច ចំរើន បានស្នើឱ្យពលរដ្ឋរាយការណ៍ទៅកាន់លោកដោយផ្ទាល់ ដើម្បីមានវិធានការដោះស្រាយបាន​ទាន់​​ពេលវេល។

អភិបាលខេត្តកណ្តាលរូបនេះ ប្រាប់ឱ្យប្រជាពលរដ្ឋរក្សាទុកដាក់បណ្ណកម្មសិទ្ធិដីធ្លីនេះឱ្យបានត្រឹមត្រូវ ក្រោយ​ទទួបានហើយនោះ ព្រោះវាមានសារៈសំខាន់ និងមានសម្លៃ ក្នុងការសម្គាល់សិទ្ធិកាន់កាប់ ការ​ទិញ​លក់ បញ្ចាំដីធ្លីរបស់ខ្លួនស្របតាមច្បាប់ ធ្វើឱ្យដីមានសុវត្ថិភាព ទទួលស្គាល់ដោយអាជ្ញាធរ ជៀសផុត​ពីការ​រំលោភ​បំពាន កាត់បន្ថយជម្លោះ។

ក្រុងសំពៅពូន គឺជាក្រុងមួយក្នុងចំណោមក្រុង-ស្រុកទាំង១៣ ផ្សេងទៀត ដែលបានបិទបញ្ចប់ការចុះបញ្ជី​ដីធ្លី​មានលក្ខណៈជាប្រព័ន្ធ ហើយរាល់ឯកសារទាំងអស់ដែលមិនមែនជាប័ណ្ណកម្មសិទ្ធិដីធ្លី(ប្លង់រឹង) អាជ្ញា​ធរ​គ្រប់លំដាប់ថ្នាក់ មិនត្រូវទទួលស្គាល់នោះទេ មានតែប័ណ្ណកម្មសិទ្ធិដីធ្លីមួយមុខគត់ ដែលមានសិទ្ធិគ្រប់​គ្រាន់​ក្នុងការ លក់ ជួល សាងសង់ និងធ្វើអ្វីផ្សេងៗទៀតបាន។ ហើយដីធ្លីដែលមិនទាន់មានបានកម្មសិទ្ធិ ចង់លក់ ជួល សាងសង់ ឬធ្វើអ្វីផ្សេងទៀត ត្រូវស្នើសុំចុះបញ្ជីដីធ្លីឡើងវិញ ទើបមានសិទ្ធិប្រើ​ប្រាស់ដី​នោះបាន។ នេះជាការបញ្ជាក់បន្ថែមពីឯកឧត្តម គួច ចំរើន៕