អត្ថបទ៖ CCFC

លោក ថេង សាវឿន ប្រធានសម្ព័ន្ធសហគមន៍កសិករកម្ពុជា CCFC រួមជាមួយបុគ្គលិកសមាគម និងក្រុម​ប្រឹក្សា​តំណាងទាំង១៤ខេត្ត ចូលរួមពិធីសំណេះសំណាល និងចុះអនុស្សរណៈ នៃការយោគ​យល់​គ្នារ​វាង​ក្រសួងរៀបចំដែនដី នគរូបនីយកម្ម និងសំណង់ និងសម្ព័ន្ធសហគមន៍កសិករកម្ពុជា ក្រោមអធិបតីភាព ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី៣១ ខែមីនា ឆ្នាំ២០២៦ នៅសាលប្រជុំនៃទីស្តីការក្រសួង។

នៅក្នុងពិធីនោះ ឯកឧត្តម ទព ធន រដ្ឋលេខាធិការ ក្រសួងរៀបចំដែនដី នគរូបនីយកម្មនិងសំណង់ ធ្វើបទ​បង្ហាញ​អំពីរបាយការណ៍ស្តីពីលទ្ធផលនៃកិច្ចសហការរវាងក្រសួងដែនដី ជាមួយនឹងសម្ព័ន្ធសហគមន៍​កសិករ​កម្ពុជា នាពេលកន្លងមក លោកបានមានប្រសាសនថា ចាប់ពីខែមីនា ឆ្នាំ២០២៤មក សមាគម CCFC បានកិច្ចប្រត្តិបត្តការជាមួយនឹងក្រសួងដែនដី ក្នុងការរួមចំណែកចូលរួមដោះស្រាយបញ្ហាដីធ្លីបាន​កាន់​តែប្រសើរជាមួយនឹងគ្រប់ផ្នែកនៃអ្នកពាក់ព័ន្ធទាំងអស់។ ជាលទ្ធផលឃើញថា ស្ថានភាពនៃការកៀរគរ និងការប្រមូលផ្ដុំពាក់ព័ន្ធនឹងបញ្ហាដីធ្លីត្រូវបានកាត់បន្ថយជាអតិបរមា ដោយគ្រប់ភាគីពាក់ព័ន្ធបានយល់​ព្រមក្នុងការចូលរួមដោះស្រាយដោយសន្តិវិធីតាមរយៈការចចារ ការសម្របសម្រួលប្រកបរ​ដោយការទទួល​ខុសត្រូវ និងយោគយល់គ្នាបានល្អប្រសើរជាងពេលកន្លងមក ដែលមានការភាន់ច្រលំ ឬមិនយល់ពីគ្នារវាង​សមាជិករបស់សមាគម និងអជ្ញាធរមានសមត្ថកិច្ច។

ឯកឧត្តម បានបន្តថា ថ្ងៃនេះជាពេលវេលាដ៏វិសេសវិសាល ដែលឯកឧត្តម ឧបនាយករដ្ឋមន្ត្រី បានអញ្ជើញ​ជាអធិបតីក្នុងពិធីចុះអនុស្សរណៈ នៃការយោគយល់គ្នារវាងក្រសួងរៀបចំដែនដី នគរូបនីយកម្ម និង​សំណង់ និងសម្ព័ន្ធសហគមន៍កសិករកម្ពុជា ដោយមានការចូលរួមពីសំណាក់ រដ្ឋលេខាធិការ អនុរដ្ឋ​លេខា​ធិការ ដែលជាប្រធានក្រុមប្រត្តិបត្ត ក្រុមការងារសម្របសម្រួលដោះស្រាយវិបត្តដីធ្លីក្នុងភូមិសាស្ត្រនៃ​ខេត្តគោលដៅទាំង១៤របស់សមាគម CCFC ដែលកំពុងអនុវត្តការងារជាមួយ។

ជាមួយគ្នានេះ លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា បានធ្វើបទបង្ហាញ​របាយ​​ការណ៍​​ស្តីពីលទ្ធផលនៃសកម្មភាពការងាររបស់សម្ព័ន្ធសហគមន៍កសិករកម្ពុជា ដោយលោក​បាន​លើក​​ឡើងអំពីស្ថានភាពទូទៅនៃការដោះស្រាយវិវាទដីធ្លី គិតមកដល់ត្រឹមឆ្នាំ២០២៥ សមាគមសម្ព័ន្ធ​សហ​​​គមន៍កសិករកម្ពុជា (CCFC) បានកំពុងធ្វើការជាមួយក្រុមគោលដៅសំខាន់ៗ រួមមាន កសិករខ្នាត​តូច​នៅ​តំបន់​ជនបទដែលរងផលប៉ះពាល់ពីបញ្ហាដីធ្លី ក្រុមស្រ្តីជនបទ យុវកសិករ សមាជិក និងសមាជិកា សកម្មជន គណៈកម្មការសហគមន៍មូលដ្ឋាន គណៈកម្មការបណ្តាញកសិករថ្នាក់ខេត្ត និងក្រុមប្រឹក្សា​តំណាង។

លោកបានបន្តថា ការអនុវត្តគម្រោងនេះ បានគ្របដណ្តប់លើសហគមន៍/ក្រុម និងបណ្តាញសរុបចំនួន ១៧៤ រួមមាន សហគមន៍ចំនួន ៩៣ ដែលមានបញ្ហាដីធ្លី និងសហគមន៍វិស័យស្បៀងអាហារ ក្រុមសន្សំចំនួន ២១ ក្រុមស្រ្តីជនបទចំនួន៤០ ក្រុមយុវកសិករចំនួន៨ សហគ្រាសទឹកសុទ្ធចំនួន ១ បណ្តាញកសិករថ្នាក់ខេត្តចំនួន១២ ដែលស្ថិតនៅក្នុងខេត្តគោលដៅចំនួន ១៤ រួមមាន ខេត្តព្រះសីហនុ កោះកុង កំពង់ស្ពឺ កំពត តាកែវ កណ្តាល ស្វាយរៀង ព្រៃវែង ត្បូងឃ្មុំ ក្រចេះ ព្រះវិហារ សៀមរាប កំពង់ធំ និងកំពង់ចាម។ លោកបានបន្តថាសកម្មភាពអនុវត្តគម្រោងមានអ្នកទទួលផលសរុបចំនួនជាង ១៥៨០០​គ្រួសារ ក្នុងនោះគិតជាអ្នកប្រមាណ ៦៣២០០ នាក់ ស្រ្តីជនបទចំនួន ៣៧៩២០ នាក់ និងយុវ​កសិករ​ជនបទចំនួន ១៧៦៩៦ នាក់ ដែលបង្ហាញពីការផ្ដោតសំខាន់លើការចូលរួមរបស់ស្រ្តី និងយុវជន ក្នុងដំណើរការ អភិវឌ្ឍសហគមន៍ និងការកសាងជីវភាពប្រកបដោយចីរភាព។

បើតាមលោក ថេង សាវឿន នៅឆ្នាំ២០២៤ សមាគមសម្ព័ន្ធសហគមន៍កសិករ (CCFC) បានដាក់ស្នើ​ករណីវិវាទដីធ្លីសរុបចំនួន ៥៦ករណី ដើម្បីស្វែងរកដំណោះស្រាយតាមនីតិវិធីច្បាប់ ដែលក្នុងចំណោមនេះ មានករណីចំនួន៤៥ករណី ទទួលបានលទ្ធផលវិជ្ជមាន ដែលបង្ហាញពីការវិវឌ្ឍ និងកិច្ចសហការល្អ​រវាង​សហ​គមន៍ អាជ្ញាធរ និងភាគីពាក់ព័ន្ធ។ លោកសាវឿនបានបញ្ជាក់បន្ថែមថា ក្នុងចំណោមករណី​ដែល​បានដោះស្រាយ ២២ករណី កំពុងរងចាំការវាស់វែងតាមនីតិវិធីបន្ទាប់ពីធ្វើកំណត់ហេតុព្រមព្រៀង ២៣​ករណី បានព្រមព្រៀង មានកំណត់ហេតុ និងបានបញ្ជូនទៅអាជ្ញាធរខេត្ត ដើម្បីបន្តដំណើរការតាមផ្លូវច្បាប់ លទ្ធផលនេះបង្ហាញថា ការដោះស្រាយវិវាទកំពុងដំណើរការទៅមុខ ទោះបីជាត្រូវការពេលវេលា និងការ​សម្រប​សម្រួលបន្ថែមក៏ដោយ ហើយករណីនៅសេសសល់ និងការបន្តស្ទើរសុំជជកស្វែងរក​ដំណោះ​ស្រា​យ នៅមានករណីចំនួន ១២ករណី មិនទាន់មានកំណត់ហេតុព្រមព្រៀង រួមមាន ខេត្តកំពង់ស្ពឺ ៣ករណី ខេត្តត្បូងឃ្មុំ ៤ករណី ខេត្តព្រះសីហនុ ៣ករណី ខេត្តសៀមរាប ១ករណី ដែលករណី​ទាំង​នេះ​ត្រូវការបន្ត​ជំរុញការសន្ទនា និងការសម្របសម្រួលជាមួយអាជ្ញាធរ និងភាគីពាក់ព័ន្ធ ដើម្បីឈានទៅរក​ដំណោះ​ស្រាយ​ដោយសន្តិវិធី និងយុត្តិធម៌។ សម្រាប់ករណីអាទិភាពធំៗ ដែលបានឯកភាពជាគោលការណ៍សម្ប​ទានសង្គមកិច្ចថ្នាក់ជាតិ រួមមាន ខេត្តកំពង់ស្ពឺ កោះកុង និងស្វាយរៀង បច្ចុប្បន្នស្នើសុំគោល​ការណ៍​ពីឯកឧត្តមឧបពិនិត្យសម្រេចក្នុងការដោះស្រាយជូនប្រជាពលរដ្ឋតាមគោលការណ៍ច្បាប់សមស្របដើម្បីលើកម្ពស់ “យន្តការបរិយាកាគ្មានវីវាទ” ករណីទាំងនេះជាឱកាសសំខាន់ក្នុងការផ្ដល់ដីធ្លីដល់​ប្រជាពល​រដ្ឋ​ខ្វះខាត និងលើកកម្ពស់សុវត្ថិភាពជីវភាពរស់នៅរបស់ពួកគេ។ ការគាំទ្រពីក្រសួងដែនដី​និងលទ្ធផល​គម្រោង​ដំណាក់កាលទី១ សមាគមសម្ព័ន្ធសហគមន៍កសិករកម្ពុជា បានទទួលការគាំទ្រហិរញ្ញវត្ថុ ពីក្រសួង​ដែនដី នគររូបណីយកម្ម និងសំណង់ បានគាំទ្រយ៉ាងសកម្មលើគម្រោង “ការពង្រឹងភាពអង់​អាច​សហគមន៍អំពីសិទ្ធិ និងច្បាប់ដីធ្លី” ដែលគម្រោងចាប់ផ្តើមពីខែតុលា ឆ្នាំ២០២៤ ដល់ខែសីហា ឆ្នាំ២០២៥ ដែលអនុវត្តនៅ ខេត្តគោលដៅចំនួន១៤។    

ថ្លែងនាឱកាសនេះដែរ ឯកឧត្តម សាយ សំអាល់ ឧបនាយករដ្ឋមន្តី រដ្ឋមន្ត្រីក្រសួងរៀបចំដែនដី នគរូបនី​យកម្ម និងសំណង់ បានមានប្រសាសនថា កិច្ចសហប្រតិការរវាងក្រសួងរៀបចំដែនដី នគរូបនីយកម្ម និងសំណង់ និងសម្ព័ន្ធសហគមន៍កសិករកម្ពុជា (CFCC) នាពេលនេះ ជាកិច្ចសហប្រតិបត្តិការគំរូមួយ ដែល​បង្ហាញពីការប្រកាន់យកនូវវប្បធម៌សន្ទនា វប្បធម៌នៃការយោគយល់គ្នា និងធ្វើការរួមគ្នាដើម្បី​សង្គម​ជាតិ​យើងទាំងមូល។

ឯកឧត្តម ក៏បានស្នើឱ្យសមាគមសម្ព័ន្ធសហគមន៍កសិករកម្ពុជា សហការជាមួយក្រសួង ក្រសួងរៀប​ចំដែន​ដី នគរូបនីយកម្ម និងសំណង់ ងាកមកគិតគូរ ពីការលើកកម្ពស់ជីវភាពបងប្អូន​ពលរដ្ឋយើងឱ្យប្រសើរឡើង គិតគូរពីក្រុមគ្រួសារនៅតាមភូមិ ដោយកំណត់នូវតម្រូវការចាំបាច់ដែលសមាគម និងក្រសួង អាចជួយ​គាំ​ទ្រ​ពួកគាត់ ដែលជាកិច្ចការដ៏ត្រឹមត្រូវសម្រាប់ជួយកសិករយើង ធ្វើយ៉ាងណាឱ្យគាត់មានលំនៅឋានរស់នៅ​សមរម្យ ម្ហូបលើតុ មានប្រាក់សន្សំ កូនទៅរៀន និងមានពេលវេលាលំហែជួបជុំគ្រួសារ ដែលនេះជាផ្នែក​មួយ​ជួយកសាងខឿនសេដ្ឋកិច្ចសង្គមជាតិឱ្យរឹងមាំ៕