ដោយ៖ កែវ រតនៈ

ក្នុងការប្រារព្ធទិវាអន្តរជាតិនារី នៅក្នុងភូមិឬស្សីស្រុក ឃុំរួសរាន់ ស្រុករវៀង  ខេត្តព្រះវិហារ កាលពីថ្ងៃទី១១ ខែមីនា កន្លងទៅក្រុមប្រជាពលរដ្ឋបានលើកឡើងស្រដៀងគ្នាថា ពួកគាត់​ ​មាន​វីវាទ​ដីធ្លី​ជាមួយ​ក្រុមហ៊ុន​ គ្លូប៊​ល​ ហ្គ្រី​ន​ (ខេ​ម​បូ​ឌា) អេនើ​ជី​ ​ឌី​វេឡុ​ប​មេន​ ​ដោយពួកគាត់អះអាង​ថា​ក្រុមហ៊ុន​នេះ​បាន​ចាប់ផ្តើម​ឈូស​ឆាយដី​ ​និង​ដំណាំ​របស់​ពួកគាត់​ក្នុង​ខែកញ្ញា​ ​ឆ្នាំ​២​០​២​៥​ ​ដែលធ្វើឱ្យប៉ះពាល់ដល់ការប្រកបរបរកសិកម្មរបស់ពួកគាត់។ ករណីនេះ ក្រុមប្រជាពលរដ្ឋទាំងនោះស្នើឱ្យលោកអភិបាលស្រុករវៀងជួយដោះស្រាយវិវាទដីធ្លីនេះជូនពួកគាត់។

ករណីនេះអភិបាលស្រុករវាងគឺលោក ហោ ប៊ុនហួរ ដែលបានចូលរួមក្នុងទិវាអន្តរជាតិនារីដែរនោះ មានប្រ សាសន៍ថាលោក មិនទាន់បានដឹងរឿងនេះលម្អិតនោះទេ ដូចនេះលោកមិនទាន់អាចដោះស្រាយវិវាទដីធ្លីនេះជូនប្រជាពលរដ្ឋបាននោះទេ។ យ៉ាងនេះក្តីលោកស្នើឱ្យប្រជាពលរដ្ឋរកពេលវេលាណាសមរម្យដើម្បីដោះស្រាយ ដោយមានការចូលរួមពីមន្ត្រីជំនាញ ភាគីក្រុមហ៊ុន និងប្រជាពលរដ្ឋ ព្រោះថា លោកមកចូលរួមនេះគឺលោកបានត្រៀមតែរឿងសិទ្ធិនារីប៉ុណ្ណោះ។

ទោះជាយ៉ាងណាមិនទាន់មានការឆ្លើយតបពីភាគីក្រុមហ៊ុនគ្លូប៊​ល​ ហ្គ្រី​ន​ (ខេ​ម​បូ​ឌា) អេនើ​ជី​ ​ឌី​វេឡុ​ប​មេន ដែលរងការចោទប្រកាន់នោះទេ។

បើតាមប្រជាពលរដ្ឋវិវាទធី្លរវាងប្រជាពលរដ្ឋជាមួយ​ក្រុមហ៊ុន​ គ្លូប៊​ល​ ហ្គ្រី​ន​ (ខេ​ម​បូ​ឌា) អេនើ​ជី​ ​ឌី​វេឡុ​ប​មេន​នេះ គឺហាក់កាន់តែកើតឡើងខ្លាំងនៅប្រមាណ២ទៅ៣ខែចុងក្រោយនេះពោលគឺនៅដើមឆ្នាំ២០២៦នេះតែម្ដង៕