អត្ថបទ៖ យូ វាសនា

នៅថ្ងៃទី១១ ខែមិថុនាឆ្នាំ២០២៥នេះ ប្រជាពលរដ្ឋនៅក្នុងសហគមន៍មនោរម្យស្ថិតនៅភូមិបារ៉ែន ឃុំស្រយង់ ស្រុកគូលែន ខេត្តព្រះវិហារ ចំនួន៤នាក់តំណាងឲ្យ៣៥គ្រួសារ បានមកដាក់ញត្តិជូន រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ឱ្យជួយដោះស្រាយវិវាទដីធ្លីជូនប្រជាពលរដ្ឋចំនួន ៣៥ គ្រួសារ ដែលមានទំហំដី ១៧៥,៥ហិតា ជាមួយក្រុមហ៊ុនសិលាដាម៉ិច។

លោក ប៉ាង ចន្ថា បានប្រាប់ប៉ៃតងប៉ុស្តិ៍ថា លោកជាប្រជាពលរដ្ឋបានចូលរស់នៅអាស្រ័យផល និងបាន សាងសង់លំនៅដ្ឋានតាំងពីដូនតារហូតតកូនតចៅ លុះដល់ឆ្នាំ២០២៤មានក្រុមហ៊ុនសិលាដាម៉ិចបានដាក់គ្រឿង ចក្រមកឈូកឆាយលើដីធ្លីប្រជាពលរដ្ឋហើយអះអាងថាជាដីរបស់ក្រុមហ៊ុន ដែលទទួលបានការវិនិ​​យោគ​ពីរដ្ឋតាមរយៈដីសម្បទានសេដ្ឋកិច្ចរបស់រាជរដ្ឋាភិបាល ដែលធ្វើឲ្យប៉ះពាល់ដីធ្លីលំនៅដ្ឋាន ដីស្រែចំការរបស់ប្រជាពលរដ្ឋ។ ហើយដីធ្លីពួកគាត់មានឯកសារទទួលស្គាល់ពីមេភូមិម្រេច និងមេឃុំស្រយង់ ចំនួនប្រជាពលរដ្ឋ៣៥ គ្រួសារ មាន ទំហំដី១៧៥,៥ហិចតា ក្នុងនោះមានដីលំនៅដ្ឋាន២៦ហិកតា និងដីស្រែចំការចំនួន​១៤៩,៥ហិកតា ។

ករណីនេះលោក ស្នើសុំសំណូមពរ ឯកឧត្តមឧបនាយករដ្ឋមន្ត្រី សាយ សំអាល់ មេត្តាជួយដោះស្រាយវិវាទដីធ្លី ឱ្យប្រជាពលរដ្ឋ៣៥ គ្រួសារ ជាមួយក្រុមហ៊ុនសិលាដាម៉ិចនេះផង។ លោកបញ្ជាក់ថា ប្រជាពលរដ្ឋដែលមានវិវាទដីធ្លីនេះពុំទាន់ទទួលបានការដោះស្រាយណាមួយឡើយទេ ទើបមកដាក់ញត្តិស្នើរសុំឱ្យ ឯកឧត្តមឧបរដ្ឋមន្ដ្រី ជួយដោះស្រាយជូនប្រជាពលរដ្ឋ។

ក្រោយពីពួកគាត់បានចូលទៅដាក់ញត្តិនៅក្នុងក្រសួងរួចមក មន្ត្រីក្រសួងក៏បានទទួលនូវញត្តិ និងចុះហត្ថលេខា ព្រមទាំងផ្ដល់លេខទូរសព្ទ សម្រាប់ទំនាក់ទំនងអោយពួកគាត់សម្រាប់សួរព័ត៌មាននៅពេលក្រោយ រួមពួកគាត់ក៏ត្រឡប់មកខេត្តព្រះវិហារវិញ៕