អត្ថបទ៖ យូ វាសនា

លោកសួស សារ៉េត ជាប្រជាពលរដ្ឋរស់នៅភូមិពូធឿង ឃុំបិតត្រាំង ស្រុកព្រៃនប់ បានរៀបរាប់ប្រាប់បៃតងប៉ុស្តិ៍ថា គាត់រស់នៅទីនោះតាំងពីឆ្នាំ១៩៩៣មកម្លេះ ហើយអាជ្ញាធរក៏បានដឹងឮ និងចុះវាស់វែងដីធ្លីជូនពួកគាត់រួចរាល់ហើយដែរ ព្រមទាំងបានចេញបង្កាន់ដៃបញ្ជាក់កម្មសិទ្ធិរួចរាល់ហើយ  ប៉ុន្តែមានការប្តឹងជំទាស់ពីក្រុមហ៊ុនមួយមិនឱ្យចេញបណ្ណកម្មសិទ្ធិជូនប្រជាពលរដ្ឋដែលមានបង្កាន់ដៃបញ្ជាក់នោះទៅវិញ។ នេះជាផលពិបាកដែលចំពោះប្រជាពលរដ្ឋរស់នៅទីនេះ ព្រោះពួកគាត់ចង់យកបណ្ណកម្មសិទ្ធិនោះមកដើម្បីខ្ចីប្រាក់ពីធនាគារពង្រីកមុខរបរ ដូចជាសាងសង់បន្ទប់ជួលជាដើម។ ករណីនេះលោកស្នើសុំឱ្យរាជរដ្ឋាភិបាលចេញបណ្ណកម្មសិទ្ធស្របច្បាប់ឱ្យប្រជាពលរដ្ឋរស់នៅមានផ្ទះសំបែងពិតប្រាក ដើម្បីឱ្យប្រជាពលរដ្ឋមានភាពកក់ក្តៅក្នុងការរស់នៅ។

លោក ស៊ុន សុផាត តំណាងប្រជាសហគមន៍ដីធ្លី សេអី៥ បានមានឱ្យដឹងថា ប្រជាពលរដ្ឋបានរស់នៅ សហគមន៍សេអី៥ស្ថិតនៅភូមិពូធឿង ឃុំបិតត្រាំង ស្រុកព្រៃនប់ តាំងពីឆ្នាំ១៩៩៣មករហូតទល់បច្ចុប្បន្ននេះដោយអាស្រ័យផលដីនេះតាមរយៈការដាំដំណាំ ដំឡូង ស្វាយ ខ្នុរ និងមានផ្លែឈើផ្សេងេជាច្រើនមុខទៀត ហើយប្រជាពលរដ្ឋេខ្លះប្រកបមុខរបបដូចជា ធ្វើស្រូវប្រាំង នេសាទ ឡើងភ្នំកាប់វល្លិ៍ បេះសំរង ដុតធ្យូងជាដើម ។ លោកបន្តថា  ដីនៅតំបន់នេះក៏មានការវាស់វែងដីលក្ខណៈជាប្រពន្ធ័ស្របតាមច្បាប់ភូមិបាលទាំង៥យ៉ាង និងស្របតាមលិខិតជូនដំណឹងរបស់អាជ្ញាធរខេត្តទៀតផង។

យ៉ាងនេះក្តីលោកថា មានក្រុមឈ្មួញបានទៅប្តឹងទាស់ការវាស់វែងដីធ្លីរបស់ពួកគាត់មិនឱ្យចេញបណ្ណកម្មសិទ្ធិ​ជូន​ប្រជាពលរដ្ឋដែលធ្វើឱ្យប្រជាពលរដ្ឋមានការព្រួយបារម្ភ មិនមានភាពកក់ក្តៅក្នុងការអាស្រ័យផលលើដីដែល​​ខ្លួនកំពុងកាន់កាប់។

បើតាមលោក  ស៊ុន សុផាត ប្រជាសហគមន៍សេអី៥ មានចំនួន៦១៧គ្រួសារកំពុងរស់នៅ និងអាស្រ័យ​​ផល​​លើដី​​​ទំហំ ១១១ហិកតា​ និង ៥២អា ៕