អត្ថបទ៖ សំនៀង

នៅក្នុងឱកាសប្រារព្ធទិវាពលកម្មអន្តរជាតិ ០១ ឧសភា ខួបលើកទី១៣៩ ឆ្នាំ២០២៥ នាព្រឹកថ្ងៃទី០១ ខែឧសភា ឆ្នាំ២០២៥ ក្រោមប្រធានបទ«ចូលរួមសហជីព សមាគម ដើម្បីរួមគ្នាលើកកម្ពស់ជីវភាព និងប្រព័ន្ធគាំពារ​​សង្គម» សហភាពសហជីព សហព័ន្ធសហជីព សហជីព និងសមាគម ធ្វើការក្នុងវិស័យការងារនៅកម្ពុជា រួមមាន វិស័យវាយនភណ្ឌកាត់ដេរ ឩស្សាហកម្ម ទេសចរណ៍ សេវាកម្ម ដឹកជញ្ជូន កសិកម្ម សំណង់ និងសេដ្ឋកិច្ចក្រៅប្រព័ន្ធ ចំនួន១០ស្ថាប័ន បានដាក់សំណើរជាក់លាក់ចំនួន១៩ចំណុច ស្នើទៅរាជរដ្ឋាភិបាល រដ្ឋសភាជាតិ និងក្រសួងការងារនិងបណ្ដុះបណ្ដាលវិជ្ជាជីវៈ ដើម្បីជួយអន្តរាគមន៍ និងដោះស្រាយរួមមាន៖

១.​ស្នើសុំរាជរដ្ឋាភិបាល​​តម្លើងប្រាក់ឈ្នួលអប្បបរមា២៥០​​ដុល្លារក្នុងមួយខែ ជូនកម្មករនិយោជិតវិស័យកាត់​​ដេរ ព្រមទាំង​កំណត់ប្រាក់​ឈ្នួលអប្បបរមាសម្រាប់កម្មករនិយោជិត នៃវិស័យទេសចរណ៍ សេវា​កម្ម សំណង់ កសិកម្ម និងវិស័យដឹកជញ្ជូន។

២.ស្នើសុំរាជរដ្ឋាភិបាលបញ្ចុះតម្លៃប្រេងឥន្ធនៈ ជីកសិកម្ម និងបន្ថយអត្រាការប្រាក់ធនាគារ ឱ្យមកនៅក្នុងកម្រិតសមរម្យ។

៣.ស្នើសុំរាជរដ្ឋាភិបាលបញ្ចូលមកវិញនូវថ្ងៃឈប់សម្រាកបុណ្យជាតិដែលមានប្រាក់ឈ្នួល ជាពិសេសថ្ងៃ ទិវារំ​ឮក​ខួបនៃកិច្ចព្រមព្រៀងសន្តិភាពទីក្រុងប៉ារីស(២៣តុលា) និងទិវាសិទ្ធិមនុស្សអន្តរជាតិ​(១០ធ្នូ)។

៤.ស្នើសុំរាជរដ្ឋាភិបាលជួយអន្តរាគមន៍ឱ្យមានការដោះលែងលោក ម៉ម រិទ្ធី ប្រធានសហព័ន្ធCTSWF ហើយទម្លាក់ចោលបទចោទលើរូបលោក ម៉ម រិទ្ធី ព្រមទាំងសមាជិក​សហជីព​​​ឈ្មោះ ម៉ម ស្រីល័ក្ខ នៃកាស៊ីណូ ជីនប៉ី គ្រុប ឯ.ក (ជីនប៉ីកួយជូ) នៅខេត្តព្រះសីហនុ និងសុំឱ្យ​​មានការលើកលែងទោសលើអ្នកស្រី ឌុល ណារ៉េត  បុគ្គលិកក្រុមហ៊ុនលក់​ថ្នាំពេទ្យ(វី អ៊ី)។

៥.  ស្នើសុំរាជរដ្ឋាភិបាល អន្តរាគមន៍ឱ្យតំណាងសហជីពនៃក្រុមហ៊ុនដឹកជញ្ជូន កាពីតូល, អេលីត, អេស៊ាន វែលហ្វែរ ឡតធើរី, ហូលីដេឌីហ្សាញ, វ៉ៃស៊ីង ប្រូដាក់ ខ្មែរអេឡិចទ្រីខលផៅវ័រ (KEP) ក្រុមហ៊ុន VINCI នៃព្រលាន​​យន្តហោះសៀមរាប ចំនួន១៣០នាក់ និងក្រុមហ៊ុនស៊ីធីខេ ​ឱ្យបានចូលធ្វើការវិញ និងទូទាត់ប្រាក់​​រំឮក​​ឱ្យបានត្រឹមត្រូវតាមច្បាប់។

៦.  ស្នើសុំរាជរដ្ឋាភិបាល និងរដ្ឋសភាជាតិធ្វើវិសោធនកម្មច្បាប់ស្តីពីសហជីព (មាត្រា១៣, មាត្រា៥០, មាត្រា​៥៨,មាត្រា៥៩)។

៧.  ស្នើសុំរាជរដ្ឋាភិបាល និងសភាជាតិផ្តល់សច្ចាប័នលើអនុសញ្ញាលេខ១៨៩​ស្តីពី “ការការពារសិទ្ធិកម្មករ​ធ្វើការ​​តាម​ផ្ទះ” និងអនុសញ្ញាលេខ១៩០ស្តីពី “អំពើហិង្សា និងការយាយី” ដើម្បីលុបបំបាត់រាល់អំពើហិង្សាប្រឆាំង​​នឹងយេនឌ័រ និងការយាយីនៅក្នុងពិភពការងារ។

៨.ស្នើសុំរាជរដ្ឋាភិបាល អនុវត្តរបបសន្តិសុខសង្គមផ្នែកនិកម្មភាព ឱ្យបានឆាប់ និងត្រូវពង្រឹងសេវាព្យាបាល និងថែទាំជំងឺឱ្យមានគុណភាពខ្ពស់ស្មើភាព និងពង្រីកការចុះឈ្មោះជាសមាជិក ប.ស.ស. ឱ្យបានគ្រប់ៗគ្នា ជាពិសេសកម្មករនិយោជិតងាយរងគ្រោះ។

៩.ស្នើសុំរាជរដ្ឋាភិបាល អនុវត្តរបបសន្តិសុខសង្គមផ្នែកថែទាំសុខភាព សម្រាប់បុគ្គលស្វ័យនិយោជន៍ ឱ្យមានជាកញ្ចប់គ្រួសារ និងឆាប់អនុវត្តរបបសោធននិវត្តគ្របដណ្តប់បុគ្គលស្វ័យនិយោជន៍។

១០.ស្នើសុំរាជរដ្ឋាភិបាល បង្កើតគោលនយោបាយ និងប្រកាសស្តីពីសុខភាព និងសុវត្ថិភាពនៅកន្លែងការងារដើម្បីការពារកម្មករនិយោជិតងាយ​រង​​គ្រោះ ព្រមទាំងចេញប្រកាសស្តីពីនីតិវិធីដោះស្រាយវិវាទបុគ្គលនៅក្រុមប្រឹក្សាអាជ្ញាកណ្តាល។

១១.ស្នើសុំរាជរដ្ឋាភិបាលបង្កើតច្បាប់ បញ្ចូលកម្មករដឹកជញ្ជូនទំនិញ ឬប្រកបមុខរបរតាមប្រព័ន្ធ (Platform Worker) ឱ្យក្រុមហ៊ុនចុះបញ្ជីនៅបេឡាជាតិសន្តិសុខសង្គម (ប.ស.ស.) ។

១២.ស្នើសុំរាជរដ្ឋាភិបាល និងរដ្ឋសភាជាតិ ជំរុញឱ្យអនុវត្តតុលាការការងារមួយដែលឯករាជ្យ អព្យាក្រឹត និងយុត្តិធម៌ ឱ្យបានឆាប់ និងមានប្រសិទ្ធភាព ដើម្បី​ដោះស្រាយ​វិវាទការងារជូន​កម្មករនិយោជិត​ឱ្យបានឆាប់រហ័ស។

១៣.ស្នើសុំរាជរដ្ឋាភិបាលជំរុញឱ្យនិយោជកអនុវត្តច្បាប់ឱ្យបានត្រឹមត្រូវ និងទូទាត់សំណងតាមច្បាប់ចំនួន​៥ចំណុច នៅពេលក្រុមហ៊ុនបិទទ្វា និងបញ្ឈប់ដោយខុសច្បាប់ ​និងផ្តល់ប្រាក់ឧបត្ថម្ភដល់កម្មករក្នុងអំឡុងពេលមានវិបត្តិ។

១៤.ស្នើសុំក្រសួងការងារ និងបណ្ដុះបណ្តាលវិជ្ជាជីវៈ និងអាជ្ញាធរពាក់ព័ន្ធ ចុះធ្វើអធិការកិច្ចនៅក្រុមហ៊ុនចម្ការកៅស៊ូ ចម្ការដូងប្រេង ចម្ការចេក ចម្ការអំពៅ និងក្រុមហ៊ុនចម្ការផ្សេងទៀត ដែលកំពុងប្រើប្រាស់កម្មករតាមរូបភាពជួលជាថ្ងៃ ឬបណ្ដែតខុសច្បាប់ និងមិនបានផ្តល់សិទ្ធិការងារ អតីតភាពការងារ និងរបបសន្តិសុខសង្គម (ប.ស.ស.) ឱ្យបានត្រឹមត្រូវ។

១៥.ស្នើសុំរាជរដ្ឋាភិបាលរៀបចំទីកន្លែងឱ្យបានសមរម្យ សម្រាប់បងប្អូនកម្មករសេដ្ឋកិច្ចក្រៅ​​ប្រព័ន្ធបាន​ប្រកបមុខរបរប្រកបដោយសុវត្ថិភាព និងឧបត្ថម្ភដើមទុន និងចំណេះដឹងសម្រាប់ពួកគាត់ប្រកបមុខរបរ។

១៦.ស្នើសុំរាជរដ្ឋាភិបាលផ្តល់ទុន ដីសម្បទានសង្គមកិច្ច  ការបណ្តុះបណ្តាលជំនាញបចេ្ចកទេសកសិកម្ម និង​​រក​ទីផ្សារសម្រាប់លក់ផលិតផលកសិកម្ម ឱ្យបានតម្លៃសមរម្យជូនកសិករ។

១៧.ស្នើសុំរាជរដ្ឋាភិបាលរៀបចំយន្តការការពារកម្មករចំណាកស្រុកទាំងនៅក្នុង និងក្រៅប្រទេសឱ្យមាន​ប្រសិទ្ធភាព និងធានាការពារសុវត្ថិភាពសម្រាប់កម្មករចំណាកស្រុក។

១៨.ស្នើសុំរាជរដ្ឋាភិបាលចាត់វិធានការតឹងរឹងដល់ក្រុមហ៊ុនឱ្យរៀបចំបរិស្ថាន សន្តិសុខ និងសុវត្ថិភាពទីកន្លែង ការងារដើម្បីផ្តល់សេចក្តីសុខ និងផាសុកភាពដល់កម្មករនិយោជិត ។

១៩​. ស្នើសុំរាជរដ្ឋាភិបាលរៀបចំគោលនយោបាយ បទដ្ឋានគតិយុទ្ធ ស្ដីពីការគ្រប់គ្រង ការប្រើប្រាស់សារធាតុអាបេស្តុសនៅកម្ពុជា និងដាក់បញ្ចូលជំងឺដែលបណ្ដាលមកពីសារធាតុអាបេស្តុស ក្នុងបញ្ជីជំងឺវិជ្ជាជីវៈ។

ការស្នើសុំទាំង១៩​ចំណុចនេះ ត្រូវបានទទួលដោយតំណាងរដ្ឋសភា តំណាងរាជរដ្ឋាភិបាល និងតំណាងបេឡាជាតិសន្តិសុខសង្គម ហៅកាត់ ប. ស​. ស. តែទោះជាយ៉ាងណាស្ថាប័នទាំង៣ មានទាន់ឆ្លើយតបយ៉ាងណាចំពោះរឿងនេះនៅឡើយទេ៕