ដោយ៖ វិចិត្រ

បណ្ដាញសហគមន៍ព្រៃឡង់ ខេត្តព្រះវិហារ បានឱ្យដឹងថា ក្រុមការងាររបស់ខ្លួនបានចុះ​ល្បាត​ការពារធនធានធម្មជាតិរយៈពេល ៣យប់ ៤ថ្ងៃ គិតចាប់ពីថ្ងៃទី២៤ ដល់ថ្ងៃទី២៧ ខែកក្កដា ឆ្នាំ២០២៦ ដោយអះអាងថា បានប្រទះឃើញសកម្មភាពបទល្មើសព្រៃឈើ និងការទន្ទ្រានដី​ព្រៃ​​ជាច្រើនករណីនៅក្នុងតំបន់ព្រៃឡង់។ នេះបើតាមការផ្សព្វផ្សាយរបស់បណ្តាញសហគមន៍​ព្រៃឡង់ នៅថ្ងៃចន្ទម្សិលមិញ។

តាមការរាយការណ៍របស់បណ្ដាញសហគមន៍ ក្នុងអំឡុងពេលចុះល្បាត ក្រុមការងារបាន​ប្រទះ​ឃើញ​រណាយន្តចំនួន ២គ្រឿង គោយន្តចំនួន ៣គ្រឿង និងមនុស្សពាក់ព័ន្ធនឹងបទល្មើសចំនួន ៦នាក់។ លើសពីនេះ ក៏បានរកឃើញឈើក្តារអារជ្រៀករួចចំនួន ២១១សន្លឹក និងឈើ​សសរ​ចំនួន ៤ដើម ដែលមានមាឌសរុបប្រមាណ ៦,៤ម៉ែត្រគូប ព្រមទាំងគល់ឈើកាប់រួចចំនួន ២១​គល់ ក្នុងនោះមានប្រភេទឈើទាល កកោះ ផ្ទៀក និងដួងចែម។

បណ្ដាញសហគមន៍ក៏បានអះអាងថា បានប្រទះឃើញទីតាំងកាប់ឆ្ការដីព្រៃធ្វើចម្ការចំនួន ៥កន្លែង និងទីតាំងដាក់អន្ទាក់ចាប់សត្វសំពោចចំនួន ១កន្លែង។ ទីតាំងបទល្មើសទាំងនោះ ស្ថិតនៅតំបន់អូរពោធិ៍រោង ស្រែក្រពើ ដូនតី ល្បើក ចង្ហារ និងតាងួន ក្នុងភូមិសាស្ត្រព្រៃឡង់ ខេត្តព្រះវិហារ។

ដោយឡែក នៅវេលាម៉ោងប្រមាណ ៨យប់ ថ្ងៃទី២៦ ខែកក្កដា ឆ្នាំ២០២៦ បណ្ដាញ​សហ​គមន៍​ព្រៃឡង់​បានអះអាងថា បានប្រទះឃើញរថយន្តមួយគ្រឿងកំពុងលើកឈើដាក់នៅភូមិភ្ញាក់​រលឹក ឃុំធ្មា ស្រុកជ័យសែន ខេត្តព្រះវិហារ។ ឈើដែលត្រូវបានលើកដាក់នោះជាប្រភេទឈើ​បន្ទះ ទំហំ ២៥សង់ទីម៉ែត្រ x ២សង់ទីម៉ែត្រ x ៤ម៉ែត្រ ចំនួនសរុប ២៨៣សន្លឹក ស្មើនឹងប្រមាណ ៥,៦ម៉ែត្រគូប។

តាមការអះអាងរបស់បណ្ដាញសហគមន៍ ម្ចាស់ឈើ និងម្ចាស់រថយន្តមានឈ្មោះ យ៉ាន ថា រស់​នៅ​ភូមិភ្ញាក់រលឹក ឃុំធ្មា ស្រុកជ័យសែន ខេត្តព្រះវិហារ ហើយរ​ថ​យន្ត​ដឹកឈើនោះ​មិន​មាន​ស្លាក​លេខឡើយ។

ប្រភពដដែលបន្តថា ក្រោយពេលត្រូវបានប្រទះឃើញ មនុស្សដែលនៅកន្លែងកើតហេតុ​បាន​នាំ​​គ្នា​ទម្លាក់​ឈើចេញពីរថយន្ត មុននឹងបើករថយន្តគេចខ្លួនបាត់។ បណ្ដាញសហគមន៍បាន​បញ្ជាក់​ថា សមាជិករបស់ខ្លួនមិនហ៊ានរារាំងរថយន្តដោយផ្ទាល់នោះទេ ដោយសារបារម្ភពី​សុវត្ថិ​ភាព។

ក្នុងហេតុការណ៍នេះ លោក ម៉ា ចិត្រា សមាជិកបណ្ដាញសហគមន៍ បានទាក់ទងទៅ​មន្ត្រី​បរិ​ស្ថាន​ឈ្មោះ យ៉ាន សុផាន់ណា ដើម្បីស្នើសុំអន្តរាគមន៍ ប៉ុន្តែមន្ត្រីរូបនោះបានជម្រាបថា ស្នាក់​ការ​មិនមានកម្លាំងគ្រប់គ្រាន់សម្រាប់ចុះអន្តរាគមន៍ ខណៈរូបលោកក៏កំពុងស្ថិតក្នុង​ការសុំច្បាប់​ឈប់សម្រាករយៈពេលពីរបីថ្ងៃផងដែរ។ នេះបើតាមការបញ្ជាក់បន្ថែមរបស់បណ្តាញសហ​គមន៍​ព្រៃឡង់​។

បណ្ដាញសហគមន៍បន្តថា បន្ទាប់ពីក្រុមការងារចាកចេញពីទីតាំងកើតហេតុ លោក យ៉ាន សុផាន់ណា បានទាក់ទងមកលោក ម៉ា ចិត្រា ម្តងទៀត ដើម្បីសាកសួរអំពីទីតាំងដែលជន​សង្ស័យ​បានទម្លាក់ឈើទុក៕