ស្ត្រីជនជាតិដើមភាគតិចកួយម្នាក់ រស់នៅក្នុងស្រុករវៀង ខេត្តព្រះវិហារ បានអះអាងថា បញ្ហាជីវភាពក្រីក្រ និង​បំណុល​ជាច្រើន បានធ្វើឱ្យអ្នកស្រីមិនហ៊ានធ្វើដំណើរទៅព្យាបាលជំងឺនៅមន្ទីរពេទ្យ នៅពេល​មាន​អា​ការៈ​ឈឺថ្កាត់ម្តងៗ។

អ្នកស្រី ដែង ឡឹក បានប្រាប់សារព័ត៌មានបៃតងប៉ុស្តិ៍ថា កន្លងមក អ្នកស្រីធ្លាប់ស្នើសុំបណ្ណសមធម៌ ឬបណ្ណក្រីក្រ ដើម្បីអាចទទួលបានសេវាព្យាបាលដោយមិនចំណាយថវិកា ប៉ុន្តែពុំទទួល​បានការអនុ​ម័ត​ឡើយ​។ មន្ត្រីពាក់ព័ន្ធបានបញ្ជាក់ថា មូលហេតុគឺដោយសារប្តីរបស់អ្នកស្រី ជាអតីតមន្ត្រីនគរបាល ដែល​ទទួល​បានប្រាក់ចូលនិវត្តន៍។

ស្ត្រីវ័យ ៤៩ ឆ្នាំរូបនេះ បានបន្តថា បច្ចុប្បន្ន គ្រួសាររបស់អ្នកស្រីកំពុងប្រឈមបញ្ហាបំណុលជាច្រើន និងខ្វះ​លទ្ធ​ភាពសងត្រឡប់។ ដោយសារតែសម្ពាធហិរញ្ញវត្ថុ អ្នកស្រីបានសម្រេចយកកាតបើកប្រាក់​ចូលនិវត្តន៍​របស់ប្តី ទៅដាក់បញ្ចាំ ដើម្បីដោះស្រាយបំណុលប្រចាំខែ។

អ្នកស្រីបញ្ជាក់ថា សព្វថ្ងៃ អ្នកស្រីប្រកបរបរដើរស៊ីឈ្នួលដាំដំឡូងឱ្យគេ ដើម្បីរកប្រាក់ចំណូលបន្តិចបន្តួច សម្រាប់ដោះស្រាយការចំណាយប្រចាំថ្ងៃ និងទប់ទល់នឹងជីវភាពដ៏លំបាក។

អ្នកស្រី ដែង ឡឹក បានឱ្យដឹងដែរថា សូម្បីដីស្រែក៏អ្នកស្រីមិនមានដែរ ដោយឡែកដីស្រែក្នុងទំហំ​ប្រមាណ​ជាកន្លះហិកតាដែលអ្នកស្រីកំពុងព្រោះស្រូវនេះ  គឺជាដីដែលគេឱ្យអ្នកស្រីធ្វើស្រែយកផលដោយ​ពុំមានគិត​ថ្លៃ​ឈ្នួលឡើយ។

ករណីនេះ បានបង្ហាញពីបញ្ហាប្រឈមផ្នែកជីវភាព និងការចូលដំណើរការសេវាសុខាភិបាលរបស់ប្រជាជន​ជន​ជាតិដើមភាគតិច នៅតំបន់ជនបទ ដែលនៅតែជាបញ្ហាត្រូវការការយកចិត្តទុកដាក់ពីអាជ្ញាធរ និង​ស្ថាប័ន​ពាក់ព័ន្ធ។

ក្រុមអង្គការសង្គមស៊ីវិល និងសហគមន៍មូលដ្ឋាន បានលើកឡើងថា ការពង្រឹងប្រព័ន្ធគាំពារសង្គម ការពង្រីកការចូលដំណើរការបណ្ណសមធម៌ និងការធានាសិទ្ធិកាន់កាប់ដីធ្លីសម្រាប់ប្រជាពលរដ្ឋក្រីក្រ និងជនជាតិដើមភាគតិច គឺជាកត្តាសំខាន់ក្នុងការកាត់បន្ថយភាពក្រីក្រ និងធានាការរស់នៅប្រកបដោយសេចក្តីថ្លៃថ្នូរ៕