ដោយ៖ វិចិត្រ

 ប្រធានក្លិបអ្នកកាសែតកម្ពុជា លោក ពុយ គា បានស្នើទទូចដល់ប្រជាពលរដ្ឋឱ្យលើកទឹកចិត្ត ដល់មន្ត្រីរដ្ឋាភិបាលទាំងអស់ក្នុងការផ្តល់នូវជ្រុងព័ត៌មានពិត ជំនួសពីការរិះគន់បន្ទច់បង្អាក់ ដែលធ្វើឱ្យបាត់នូវសិទ្ធិផ្តល់ និងទទួលបានជ្រុងព័ត៌មានទាំងអស់គ្នា។

ការស្នើរបស់ប្រធានក្លឹបអ្នកកាសែតបែបនេះ គឺបន្ទាប់ពីអ្នកលេងបណ្តាញសង្គមនៅកម្ពុជាបាន នាំគ្នារិះគន់យ៉ាងចាស់ដៃទៅលើអភិបាលខេត្តស្ទឹងត្រែង ឯកឧត្តម សរ សុពុត្រា ក្រោយពេល ដែលលោកបានផ្តល់បទសម្ភាសន៍ជាមួយក្រុមអ្នកសារព័ត៌មានអំពីការដែលមិនអាចហាម ឃាត់ទាំងស្រុងលើទំនិញរបស់ថៃចូលមកប្រទេសកម្ពុជាតាមព្រំដែនកម្ពុជា-ឡាវ។

ថ្លែងនៅក្នុងជំនួបជាមួយក្រុមសារព័ត៌មានកាលពីពេលថ្មីៗកន្លងទៅនេះ នៅឯខេត្តស្ទឹងត្រែង ដោយឯកឧត្តម សរ សុពុត្រា បានទទួលស្គាល់ថា ទំនិញរបស់ប្រទេសថៃ នៅតែមាននាំចូល មកកម្ពុជា តាមច្រកព្រំដែនកម្ពុជាឡាវពិតមែន។ ពីព្រោះកម្ពុជាមិន អាចហាមឃាត់មិនឱ្យ ទំនិញទាំងអស់នេះហូរចូលមកកម្ពុជាបានទេ ហើយរដ្ឋាភិបាលក៏មិនអាច ចេញសេចក្តី សម្រេចណាមួយស្តីពីការដាក់បម្រាមទាំងស្រុងមិនឱ្យទំនិញថៃចូលមកដែរ ពីព្រោះកម្ពុជាជា សមាជិកអង្គការពាណិជ្ជកម្មពិភពលោក។ កម្ពុជាអាចនឹងរងទណ្ឌកម្មពីសំណាក់អង្គការ ពាណិជ្ជកម្មពិភពលោក បើកម្ពុជាបដិសេធ ទំនិញណាមួយរបស់ប្រទេសដែលជាមាជិករបស់ អង្គការពាណិជ្ជកម្មពិភពលោកមកកាន់ប្រទេសរបស់ខ្លួននោះ។

ចំពោះលោក ពុយ គា បានដាក់នូវក្តីបារម្ភក្នុងនាមជាអ្នកសារព័ត៌មាន ដោយលោកថា ប្រសិន បើមានការរិះគន់បែបនេះអាចនឹងធ្វើឱ្យសេរីភាពនៅក្នុងការផ្តល់ព័ត៌មាននេះនឹងកាន់តែខើចទៅ ហើយសេរីភាពនៅក្នុងការទទួលព័ត៌មានរបស់ប្រជាពលរដ្ឋក៏កាន់តែរួចទៅដែរ។ នៅពេលនោះហើយជាអ្វី ដែលប្រធានក្លឹបអ្នកកាសែតរូបនេះចាត់ទុកថា វិបត្តិព័ត៌មានមួយ ដ៏ធំនៅក្នុងសង្គមកម្ពុជា។ ដូចនេះហើយលោកនៅតែអំពាវនាវធ្វើយ៉ាងណាចង់ឱ្យមន្ត្រី និងអាជ្ញាធរ បន្តផ្តល់ព័ត៌មានទៅកាន់សារធារណៈជន៕