‎អត្ថបទ៖ សំនៀង

មន្រ្តីរាជការដែលមានសហព័ទ្ធ (ប្តីឬប្រពន្ធ) និងកូនក្នុងបន្ទុក សូមអញ្ជើញមកចុះបញ្ជីចូលជាសមាជិក ប.ស.ស. ដើម្បីទទួលបានសេវាពិនិត្យ ព្យាបាល និងថែទាំសុខភាព ដោយឥតគិតថ្លៃនៅតាមមន្ទីរពេទ្យ ជាដៃគូ ប.ស.ស.។ នេះជាការអំពាវនាវរបស់ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង​បេឡា​ជាតិរបបសន្តិសុខសង្គម (ប.ស.ស.) តំណាង ឯកឧត្តម ម៉េង ហុង ប្រតិភូរាជរដ្ឋាភិ​បាល​ទទួល​បន្ទុក​ជា​អគ្គនា​យក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ ក្នុងឱកាសអញ្ជើញជាសហធិបតី​បើក​សិក្ខាសាលាផ្សព្វផ្សាយស្ដីពី "ការអនុវត្តរបបសន្ដិសុខសង្គមផ្នែកហានិភ័យការងារ និងផ្នែកថែទាំសុខ​ភាព​សម្រាប់មន្រ្តីសាធារណៈ" ជូនដល់ថ្នាក់ដឹកនាំ និងមន្រ្តីរាជការក្រោមឱវាទរដ្ឋបាលខេត្តតាកែវ នាថ្ងៃទី៤ ខែកុម្ភៈ ឆ្នាំ២០២៦ ដោយមានអ្នកចូលរួមប្រមាណជា១៩០នាក់។

ក្នុងនោះឯកឧត្តម ក៏បានបញ្ជាក់ដែរថា នៅក្នុងខេត្តតាកែវ មន្រ្តីរាជការដែលចុះបញ្ជីជាមួយ ប.ស.ស. មាន​ចំនួនជាង ២ម៉ឺន ៤ពាន់នាក់ ប៉ុន្តែមានមន្រ្តីរាជការចំនួន ៧ ២៨៣នាក់ នៃចំនួនមន្រ្តីរាជការសរុប​ក្នុង​ខេត្ត​តាកែវ ដែលបានចុះបញ្ជីអ្នកក្នុងបន្ទុករបស់ពួកគាត់ ក្នុងនោះមានសហព័ទ្ធចំនួន ៥ ០៨១នាក់ និង​កូន​ក្នុង​បន្ទុកចំនួន ៩ ២១៤នាក់។

ជាមួយគ្នានោះដែរ លោក មូល វិចិត្រ អភិបាលរង ខេត្តតាកែវ បានមានប្រសាសន៍ថា ការយល់ដឹងអំពី​របប​សន្តិសុខសង្គម មិនមែនគ្រាន់តែជាការដឹងអំពីកាតព្វកិច្ចនោះទេ ប៉ុន្តែវាគឺជាការការពារសិទ្ធិ និងសុខុមាល​ភាពផ្ទាល់ខ្លួនរបស់មន្ត្រីរាជការយើងគ្រប់រូប។ លោកបានផ្តាំផ្ញើដល់អ្នកចូលរួម​ទាំង​អស់ ត្រូវយក​ចិត្ត​ទុក​ដាក់ក្រេបជញ្ជក់ចំណេះដឹងពីការធ្វើបទបង្ហាញដោយមន្ត្រីជំនាញ ប.ស.ស. ដើម្បីយល់ឱ្យច្បាស់ពីនីតិវិធី និងអត្ថប្រយោជន៍ផ្សេងៗដែលត្រូវទទួលបាន ជាពិសេសសូមឱ្យមន្ទីរ អង្គភាព និងអាជ្ញាធរក្រុង/ស្រុក/ឃុំ/​សង្កាត់ ជួយផ្សព្វផ្សាយបន្តដល់មន្ត្រីក្រោមឱវាទ ដែលមិនបានមកចូលរួមនៅទីនេះ ដើម្បីឱ្យពួកគាត់​បាន​ជ្រួតជ្រាប និងប្រើប្រាស់សិទ្ធិរបស់ខ្លួនបានត្រឹមត្រូវ៕