អគ្គស្នងការដ្ឋាននគរបាលជាតិ ជូនដំណឹងអំពីការផ្តើមរឹតបន្តឹងវិធានការចរាចរណ៍ផ្លូវគោកជាថ្មី ក្រោយផ្អាកមួយរយៈបន្ទាប់ពីប្រទេសជួបបញ្ហាញាំញីដោយសារសង្គ្រាមតាមខ្សែព្រំដែន

15 ម៉ោងមុន

ដោយ៖ វិចិត្រ

អគ្គស្នងការរដ្ឋានគរបាលជាតិ បានជូនដំណឹងអំពីការផ្តើមរឹតបន្តឹងវិធានការអនុវត្តច្បាប់ចរាចរណ៍ផ្លូវគោកជាថ្មីឡើងវិញ ក្រោយផ្អាកមួយរយៈបន្ទាប់ពីប្រទេសជួបបញ្ហាញាំញីដោយសារសង្គ្រាមនៅតាមបន្ទាត់ព្រំដែនកម្ពុជា-ថៃ។ នេះបើតាមសេចក្តីប្រកាសព័ត៌មានរបស់អគ្គស្នងការដ្ឋាននគរបាលជាតិ ចុះថ្ងៃទី៣ ខែកុម្ភៈ ឆ្នាំ២០២៦។

បើតាមអគ្គស្នងការដ្ឋាននគរបាលជាតិ ការផ្តើមរឹងបន្តឹងនៃការអនុវត្តច្បាប់ចរាចរណ៍ផ្លូវគោក ឡើងវិញនេះ ដោយសារតែមានកើនឡើងនៃគ្រោះថ្នាក់ចរាចរណ៍ផ្លូវគោក អំឡុងពេលនៃការបន្ធូរបន្ថយមួយរយៈនូវការត្រួតពិនិត្យការអនុវត្តច្បាប់។

ក្នុងសេចក្តីប្រកាសព័ត៌មានខាងលើនេះបញ្ជាក់ថា ការបន្ធូរបន្ថយ នូវការត្រួតពិនិត្យការអនុវត្តច្បាប់រយៈពេល១៦០ថ្ងៃ ដោយគិតចាប់ពីថ្ងៃទី២៥ ខែកក្កដា ដល់ថ្ងៃទី៣១ ខែធ្នូ ឆ្នាំ២០២៥ នោះ ករណីគ្រោះថ្នាក់ចរាចរណ៍មានការកើនឡើងរហូតដល់៣៤លើក ស្មើ៣% អ្នកស្លាប់កើន៦២នាក់ ស្មើ១០% និងអ្នករបួសកើន២០៩នាក់ ស្មើ១៥% បើធៀបរយៈពេលដូចគ្នាក្នុងឆ្នាំ២០២៤។

ក្នុងនោះអគ្គស្នងការដ្ឋាននគរបាលជាតិ ក៏បានបញ្ជាក់ផងដែរថា ក្នុងខែមករា ដើមឆ្នាំ២០២៦ ធៀបនឹងខែមករា ឆ្នាំ២០២៥ គ្រោះថ្នាក់ចរាចរណ៍កើន៤២លើក ស្មើ១៩% អ្នកស្លាប់កើន២៥ នាក់ ស្មើ១៨% និងអ្នករបួសកើន៦៤នាក់ ស្មើ២៣%។ មូលហេតុដែលបង្កឱ្យមានគ្រោះថ្នាក់កើតឡើង គឺបណ្តាលមកពីការបើកបរល្មើសល្បឿន មិនគោរពសិទ្ធិ មិនប្រកាន់ស្តាំ វ៉ាជែង បត់ខ្វះការប្រុងប្រ័ត្ន ស្រវឹង សញ្ញាចរាចរណ៍ កត្តាយានយន្ត ងងុយដេក និងកត្តាផ្លូវ។

កាលពីខែកក្កដា ឆ្នាំ២០២៥ ឯកឧត្តម ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានសម្រេចបញ្ជាឱ្យអគ្គស្នងការនគរបាលជាតិ ដែលមានស្នងការនគរបាលរាជធានី-ខេត្ត ជាសេនាធិការ ផ្អាកជាបណ្ដោះអាសន្ន នូវការអនុវត្តច្បាប់ ស្ដីពី ចរាចរណ៍ផ្លូវគោក នូវទូទាំងប្រទេស៕