ដោយ៖ វិចិត្រ

ក្រសួងទេសចរណ៍ បានចេញសេចក្តីណែនាំទៅដល់ទាំងមន្ត្រីរាជការ និងឯកជន ដែលកំពុងបម្រើការងារ និងរកស៊ីក្នុងវិស័យទេសចរណ៍ទាំងអស់ ហាមឃាត់ពាក់ព័ន្ធនឹងឧបករណ៍អេឡិចត្រូនិក និងសារធាតុគីមីសម្រាប់ជក់ និងស៊ីស្សា បើពុំនោះទេនឹងត្រូវទទួលរងពិន័យផ្សេងៗ។ នេះបើយោងតាមលិខិតណែនាំរបស់ក្រសួងទេសចរណ៍ ចុះថ្ងៃទី១៧ ខែវិច្ឆិកា ឆ្នាំ២០២៥។

ការចេញសេចក្តីណែនាំរបស់ក្រសួងទេសចរណ៍នាពេលនេះ ដោយយោងតាមបទបញ្ជាលេខ ០២បប. ចុះថ្ងៃទី២១ ខែតុលា ឆ្នាំ២០២៥ របស់រាជរដ្ឋាភិបាលកម្ពុជាស្តីពី ការដាក់ចេញវិធានការហាមឃាត់ការនាំចូល ការចែកចាយ ការលក់ ការផ្សាយពាណិជ្ជកម្ម ការប្រើប្រាស់ ការកាន់កាប់ ការផលិត និងការស្តុកទុកឧបករណ៍អេឡិចត្រូនិកនិងសារធាតុគីមីសម្រាប់ជក់ និងស៊ីស្សា។

ក្នុងខ្លឹមសារលិខិតខាងលើនេះក្រសួងទេសចរណ៍បានធ្វើការណែនាំដល់មន្ត្រីរាជការ និងមន្ត្រីជាប់កិច្ចសន្យានៃក្រសួងទេសចរណ៍ ទាំងថ្នាក់ជាតិ និងថ្នាក់ក្រោមជាតិ និងម្ចាស់ ឬ អ្នកគ្រប់គ្រងមូលដ្ឋានអាជីវកម្មសេវាកម្មទេសចរណ៍នៅក្នុងប្រទេសកម្ពុជាមិនត្រូវនាំចូល ចែកចាយ លក់ ផ្សាយពាណិជ្ជកម្ម ប្រើប្រាស់ កាន់កាប់ ផលិត ឬស្តុកទុក ឧបករណ៍អេឡិចត្រូនិកនិងសារធាតុគីមីសម្រាប់ជក់ និងស៊ីស្សាឡើយ។

ក្នុងនោះក្រសួងក៏បានណែនបន្តថា មន្ត្រីរាជការ និងមន្ត្រីជាប់កិច្ចសន្យានៃក្រសួងទេសចរណ៍ ដែលនាំចូល ចែកចាយ លក់ ផ្សព្វផ្សាយពាណិជ្ជកម្ម ប្រើប្រាស់ និង/ឬកាន់កាប់ ផលិត ឬស្តុកទុកឧបករណ៍អេឡិចត្រូនិក និងសារធាតុគីមីសម្រាប់ជក់ និងស៊ីស្សាគ្រប់ប្រភេទនឹងត្រូវទទួលការព្រមានដោយផ្ទាល់មាត់ ព្រមទាំងដកហូតឧបករណ៍អេឡិចត្រូនិកនិង សារធាតុគីមីសម្រាប់ជក់ និងស៊ីស្សា។ ករណីមិនរាងចាលនឹងត្រូវព្រមានជាលាយលក្ខណ៍អក្សរ ធ្វើកិច្ចសន្យា ឈប់ប្រើប្រាស់ និងទទួលទណ្ឌកម្មរដ្ឋបាល។

ជាមួយគ្នានេះមូលដ្ឋានអាជីវកម្មសេវាកម្មទេសចរណ៍ដែលចែកចាយ លក់ ស្តុកទុក ផ្សព្វផ្សាយពាណិជ្ជកម្ម ផលិត និង/ឬនាំចូលឧបករណ៍អេឡិចត្រូនិក និងសារធាតុគីមី សម្រាប់ជក់ និងស៊ីស្សា តាមមធ្យោបាយណាក៏ដោយ ត្រូវទទួលការព្រមានជាលក្ខណ៍អក្សរ ដកហូត ឬព្យួរអាជ្ញាបណ្ណ ឬ លិខិតអនុញ្ញាតប្រកបអាជីវកម្មសេវាកម្មទេសចរណ៍៕