(ភ្នំពេញ)៖ ដោយ៖ ភិន ស្រីពុំ៖ ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្ត្រី​ក្រសួងយុត្តិធម៌ មានប្រសាសន៍ថា ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា មន្ត្រីតុលាការ និងតួអង្គពាក់ព័ន្ធណាមួយ ដែលបានប្រព្រឹត្តខុសច្បាប់ ឬបានឆ្លៀតយកឱកាសនៃយុទ្ធនាការនេះ ដើម្បីស្វែងរកផលប្រយោជន៍ផ្ទាល់ខ្លួន តាមរបៀប "ត្រីងៀតឆ្លៀតពង" ឬដែលប្រព្រឹត្តផ្ទុយនឹងអភិក្រមត្រូវកត់ត្រាទុកជាកំហុស ដែលត្រូវឆ្លើយតបជាមួយនឹងការអនុវត្តយ៉ាងម៉ឺងម៉ាត់ទាំងវិធានការវិន័យទាំងវិធានការច្បាប់។  
          ឯកឧត្តម  កើត រិទ្ធ ឧបនាយករដ្ឋមន្ត្រី​   រដ្ឋមន្ត្រី​ក្រសួងយុត្តិធម៌បានមានប្រសាសន៍បែបនេះ នៅក្នុងសន្និសីទ​សារព័ត៌មាន​ស្តីពី ការបង្កើត​អាជ្ញាធរ​ជាតិ ដោះស្រាយ​វិវាទក្រៅតុលាការ នៅទីស្តីការក្រសួង​យុត្តិធម៌នារសៀលថ្ងៃទី​០៩ខែ​មករា ឆ្នាំ២០២៤។​ 
          ​ឯកឧត្តមលោកបានបន្ថែមទៀតថា    យុទ្ធនាការទី២ នេះនឹងក្លាយជា កពា្ចក់ឆ្លុះឱ្យឃើញការពិត នៅពេលមានបណ្តឹងអំពីភាពមិនប្រក្រតី ណាមួយនៅតាមតុលាការ។ ក្នុងករណីដែលរកឃើញការពិត ថាពិតជាមានភាពមិនប្រក្រតីកើតឡើងមែននោះ យើងត្រូវហ៊ានទទួលស្គាល់ការពិត ហើយត្រូវខិតខំស្វែងរកនូវដំណោះស្រាយមួយដែលត្រឹមត្រូវ និងយុត្តិធម៌ ជូនប្រជាពលរដ្ឋដែលរងគ្រោះ។ ផ្ទុយទៅវិញ ប្រសិនបើការប្ដឹងអំពីភាពមិនប្រក្រតីនេះ មិនមានមូលដ្ឋានត្រឹមត្រូវ និងខុសពីការពិតជាក់ស្ដែង ហើយតុលាការបានសម្រេចសេចក្តីយ៉ាងត្រឹមត្រូវ និងយុត្តិធម៌តាមច្បាប់រួចហើយនោះ យើងក៏ត្រូវការពារកិត្តិយស និងសេចក្ដីថ្លៃថ្នូររបស់អង្គចៅក្រម និងផ្តល់យុត្តិធម៌ដល់ចៅក្រមដែលទទួលបន្ទុកដោះស្រាយសំណុំរឿងហើយរងការចោទប្រកាន់ដោយមិនត្រឹមត្រូវនោះវិញដែរ។  
          លោកឧបនាយករដ្ឋមន្រ្តីបានមានប្រសាសន៍ថា  យន្តការដែលមានការពាក់ព័ន្ធខាងលើនេះ ត្រូវប្រកាន់ ខ្ជាប់នូវអភិក្រមការងារ ដូចតទៅ៖

អភិក្រមទី១-មិនត្រូវធ្វើឱ្យប៉ះពាល់ដល់ឯករាជ្យនៃអំណាចតុលាការ 
អភិក្រមទី២-មិនត្រូវធ្វើបុរេវិនិច្ឆ័យលើការសម្រេចសេចក្ដីរបស់តុលាការថា មិនប្រក្រតី ឬអយុត្តិធម៌ និង អភិក្រមទី៣-ត្រូវអនុវត្តប្រកបដោយតម្លាភាព ភាពច្បាស់លាស់ភាពត្រឹមត្រូវនិងយុត្តិធម៌។  
          ជាមួយគ្នា​នេះផងដែរ គ្រប់តួអង្គពាក់ព័ន្ធទាំងអស់ រួមទាំង ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា និងមន្ត្រីតុលាការ ដែលបានចូលរួមអនុវត្តការងារក្នុងក្របខ័ណ្ឌនៃយុទ្ធនាការនេះ បានត្រឹមត្រូវនិងទទួលបានលទ្ធផលល្អ និងត្រូវបានកត់ត្រាទុកជាគុណសម្បត្តិការងារ ដែលនឹងក្លាយជាមូលដ្ឋានសម្រាប់ការលើកទឹកចិត្តនាពេលខាងមុខ ស្របតាមគោលការណ៍ គុណាធិបតេយ្យ។

          យោងតាមការមានប្រសាសន៍របស់ឯកឧត្ដម កើត រិទ្ធ រដ្ឋមន្ត្រី​យុត្តិធម៌​សង្កត់​ធ្ងន់​ថា ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា មន្ត្រីតុលាការនិងតួអង្គពាក់ព័ន្ធណាមួយដែលបានប្រព្រឹត្តខុសច្បាប់ នឹងការអនុវត្តយ៉ាងម៉ឺងម៉ាត់ទាំងវិធានការវិន័យទាំងវិធានការច្បាប់ខាងលើនេះគឺពិតជាល្អពីព្រោះ ធ្វើអោយមន្ត្រីមួយចំនួនដែលប្រព្រឹត្តខុសនិងទទួលវិធានការតាមផ្លូវច្បាប់ហើយនិងមិនហ៊ានធ្វើខុសទៅនឹងច្បាប់ មិនប្រព្រឹត្តអំពើពុករលួយ ព្រមទាំងជួយដំណោះស្រាយវិវាទជូនប្រជាពលរដ្ឋបានត្រឹមត្រូវ និងយុត្តិធម៌ ដូចនេះបើប្រទេសជាតិមិនមានអំពើពុករលួយមន្ត្រីមិនប្រព្រឹត្តខុសទៅនិងច្បាប់និងធ្វើឪ្យប្រទេសជាតិពិតជាមានការរីកចម្រើនជាក់ជាពុំខានឡើយ។