អត្ថបទ៖ កែវ រតនៈ

ក្នុងបណ្ដាញសង្គមហ្វេសប៊ុករបស់ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិគឺឯកឧត្តមទៀ សីហា ដែលបានផ្សព្វផ្សាយប៉ុន្មានម៉ោងមុននេះ បានសរសេរថា យោធាថៃចោទថា៖ «កម្ពុជាបង្វែរកាណុងកាំភ្លើងទៅភូមិដ្ឋាន និងបន្ទាយរបស់យោធាថៃ»។ ឯកឧត្តម បានលើកឡើងថា  នេះជាយុទ្ធវិធីការពារជាតិរបស់កម្ពុជា ពេលយើងបំពាក់សព្វាវុធគឺដើម្បីការពារបូរណភាពទឹកដី ច្បាស់ណាស់គោលដៅគឺតម្រង់ទៅខ្មាំងសត្រូវ មិនដែលមានក្បួនទ័ពណាដែលបង្វែរកាណុង មកផ្ទះខ្លួនឯងនោះទេ ។ ឯកឧត្តម ក៏បានលើកជាចម្ងល់ថា« ឬមួយកងទ័ពថៃរៀនយុទ្ធវិធី ខុសពីកម្ពុជា???  »

យ៉ាងនេះ ក្តីឯកឧត្តមក៏បានសរសេរថា «ជម្រើសសន្តិវិធី គឺការចរចារវាងរដ្ឋាភិបាលទាំងពីរ ទាំងផ្នែកនយោបាយ ផ្នែកសេដ្ឋកិច្ច និងផ្នែកផ្សេងៗ ចំពោះផ្នែកយោធា គឺជម្រើសចុងក្រោយ។យើងត្រៀមរួចជាស្រេចក្នុងការការពារទឹកដីកម្ពុជា ដោយគ្មានមហិច្ឆតាឈ្លានពានទៅប្រទេសជិតខាងឡើយ៕»

ការឆ្លើយតបរ​បស់រដ្ឋមន្ត្រីក្រសួងការពារជាតិកម្ពុជានេះ បន្ទាប់ពីសម្ដេចតេជោហ៊ុន សែន​ ប្រធានព្រឹទ្ធសភាបានថ្លែងក្នុងសារពិសេសមួយថា កម្ពុជា មិនមែនខ្វះអាវុធ ឬខ្វះកម្លាំងដើម្បីវៃគ្នាទេ តែកម្ពុជាមិនចង់វៃគ្នាទេ មិនចង់វៃអ្នកណាទាំងអស់ ត្រឹមតែការពារទឹកដីរបស់ខ្លួនប៉ុណ្ណោះ៕