អត្ថបទ៖ វិចិត្រ

ជាថ្មីម្តងទៀត សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាដែលជាបក្សកាន់អំណាច ស្នើឱ្យសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជាជួយសម្រួលបំណុលពលករខ្មែរដែលត្រលប់ពីប្រទេសថៃ។ ការស្នើបែបនេះធ្វើឡើងក្នុងឱកាសដែលសម្តេចថ្លែងសារពិសេសទៅកាន់ជនរួមជាតិក្នុងសម័យប្រជុំពេញអង្គលើកទី ៣ ព្រឹទ្ធសភា នីតិកាលទី៥ ថ្ងៃទី១៦ ខែមិថុនា ឆ្នាំ២០២៥។

សម្តេចតេជោបានថ្លែងថា ស្ថានភាពជម្លោះព្រំដែនរវាងកម្ពុជា និងថៃ អាចនឹងអូសបន្លាយពេលវេលាយូរ ដោយមិនងាយចប់ឡើយ ដែលការណ៍នេះធ្វើឱ្យប្រជាពលករខ្មែរធ្វើការនៅប្រទេសថៃអាចទទួលរងការប្រមាថ ម៉ាក់ងាយ និងធ្វើបាបផ្សេងៗ ពីជនជាតិថៃជ្រុលនិយមមួយចំនួន។ ក្នុងនោះសម្តេចមានប្រសាសន៍បន្តថាជាពេលវេលាដ៏សក្តិសមដែលពលរដ្ឋខ្មែរទាំងអស់ត្រលប់មកកម្ពុជាវិញឱ្យបានមុនដែលពួកគេត្រូវរងការប្រមាថ ម៉ាក់ងាយ និងធ្វើបាប។

កាលពីថ្ងៃទី១៤ ខែមិថុនាកន្លងទៅនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវទៅដល់សមាគមធនាគារនៅកម្ពុជា(ABC) និងសមាគមមីក្រូហិរញ្ញវត្ថុកម្ពុជា(CMA) ឱ្យពិនិត្យលទ្ធភាពក្នុងការជួយសម្រាលបន្ទុកហិរញ្ញវត្ថុសម្រាប់ប្រជាពលករដែលត្រលប់មកពីថៃវិញ ចំពោះអ្នកដែលមានជាប់ជំពាក់បំណុលជាមួយធនាគារ ឬគ្រឹះស្ថានមីក្រូហិរញ្ញវត្ថុ ទៅតាមលទ្ធភាព ឬ ក្នុងមួយរយៈពេលកំណត់ណាមួយដែលអាចធ្វើទៅបាន។

នៅថ្ងៃជាមួយគ្នានោះដែរ សមាគមន៍ទាំងពីរបានចេញសេចក្តីថ្លែងការណ៍រួមគាំទ្រចំពោះសារអំពាវនាវនោះ និងបានចាត់ទុកការអំពាវនាវរបស់សម្តេចបវរធិបតីនេះថាជាការបង្ហាញពីជម្រៅទឹកចិត្ត និងកាយវិការដ៏ល្អប្រពៃក្នុងភាពជាអ្នកដឹកនាំគំរូ ដោយសមាគម ថាគ្រឹះស្ថានសមាជិកនៃសមាគមទាំងពីរនឹងពិនិត្យឱ្យអស់លទ្ធភាពចូលរួមដាក់ចេញនូវវិធានការសមស្របក្នុងការបន្ធូរបន្ថយបន្ទុកហិរញ្ញវត្ថុសម្រាប់បងប្អូនប្រជាពលករ តាមរយៈការរៀបចំឥណទានឡើងវិញ ដែលជាយន្តការរបស់សមាគម បាននិងបន្តអនុវត្ត។

សមាគមទាំងពីរបញ្ជាក់បន្ថែមថា ខ្លួននឹងបន្តសហការជាមួយធនាគារជាតិនៃកម្ពុជា និងភាគីពាក់ព័ន្ធ ដើម្បីធានាថា គ្រឹះស្ថានហិរញ្ញវត្ថុនៅតែចូលរួមយ៉ាងពេញលេញនិងទូលំទូលាយក្នុងការគាំទ្រដល់ការអភិវឌ្ឍសង្គម-សេដ្ឋកិច្ចជាតិ និងលើកស្ទួយជីវភាពរបស់ប្រជាជន ទៅតាមលទ្ធភាពជាក់ស្តែង និងការដឹកនាំចង្អុល បង្ហាញរបស់ធនាគារជាតិ នៃកម្ពុជា និងរាជរដ្ឋាភិបាល៕