អត្ថបទ៖ យូ វាសនា

 ឯកឧត្តម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ ជួបជាមួយអង្គទូតបរទេសប្រចាំកម្ពុជា ដើម្បីធ្វើការពន្យល់អំពីការវិវត្តនៃស្ថានការណ៍បញ្ហាព្រំដែនកម្ពុជា-ថៃ ។ ជំនួបនេះ ធ្វើឡើងនៅទីស្តីការក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី១៧ ខែមិថុនា ឆ្នាំ២០២៥។

​នៅក្នុងការប្រជុំនេះ ឯកឧត្តម ប្រាក់ សុខុន បានលើកឡើងថា នៅថ្ងៃទី២៨ ខែឧសភា ឆ្នាំ២០២៥ កងទ័ពថៃបានមកឈ្លានពានទឹកដីកម្ពុជានៅតំបន់មុំបី ដោយទាហានថៃបានបាញ់ប្រហារមុន មកលើទាហានខ្មែរ ដែលបណ្ដាលឱ្យលោក សួន រោន ដែលជាកម្លាំងការពារបូរណភាពដែនដីខ្មែរ បានពលីជីវិត។

ជាមួយគ្នានេះ ឯកឧត្តមឧបនាយករដ្ឋមន្ត្រីបានបន្ថែមថា ការវិវត្តនៃស្ថានការណ៍កាន់តែតានតឹងបន្ទាប់ពីហេតុការណ៍នៅថ្ងៃទី២៨ ឧសភា ភាគីថៃបែរជាចោទប្រកាន់កម្ពុជាថា ជាអ្នកផ្ទុះអាវុធមុន ហើយតាមរយៈទង្វើឯកតោភាគីរបស់ភាគីថៃអ្នកបន្តជំរុញឱ្យទំនាក់ទំនងកម្ពុជាថៃ និងស្ថានភាពតាមបន្ទាត់ព្រំដែនបានវិវត្តទៅរកភាពតាន់តឹងឡើងៗ។ សកម្មភាពរបស់ថៃបានបន្តបំពាន និងគំរាមកំហែងមកលើកម្ពុជា ក្នុងនោះមានដូចជា ការបន្ថយម៉ោងបើកច្រកទ្វារព្រំដែនដោយ ឯកតោភាគី គំរាមក្នុងការផ្តាច់អីនធឺណិត និងឈប់ផ្គត់ផ្គង់អគ្គិសនី មកកម្ពុជាជាដើម។

ឯកឧត្តមឧបនាយករដ្ឋមន្ត្រីបន្តថា ទោះជាយ៉ាងណាក៏ដោយ កម្ពុជានៅតែចង់បាន និងស្រឡាញ់សន្តិភាព មិនចង់ឱ្យមានការប្រឈមដាក់គ្នាក្នុងស្ថានភាពតានតឹងចេញនៅលើវិស័យយោធាឡើយ។

ក្នុងនោះឯកឧត្តម ប្រាក់ សុខុន គូសបញ្ជាក់ថា រាជរដ្ឋាភិបាលកម្ពុជាក្រោមការដឹកនាំរបស់ សម្តេចមហាបវរធិបតី ហ៊ុន មាណែត នាយករដ្ឋមន្ត្រី បានដាក់ចេញនូវបណ្តាវិធានការនានាដូចជា ការឈប់ទិញអីនធឺណិតពីប្រទេសថៃ  ឈប់បញ្ចាំងភាពយន្តថៃ ការបិទច្រកដូង នៃព្រំដែនកម្ពុជា-ថៃព្រមទាំងវិធានការត្រៀមនានា ដើម្បីការពារ ផលប្រយោជន៍ និងកិត្តិយសប្រជាជាតិខ្មែរ៕