ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៨ ចាប់ផ្ដើមប្រារព្ធក្រោមប្រធានបទ «TVET បង្កើតឱកាសការងារ សាងក្តីសង្ឃឹមដល់យុវជន»

ម្សិលមិញ ម៉ោង 12:18:PM

អត្ថបទ៖ កែវ រតនៈ

នៅព្រឹកថ្ងៃនេះទី១៥ ខែមិថុនា ឆ្នាំ២០២៥នេះ ការប្រារព្ធទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី៨ ឆ្នាំ២០២៥ បានចាប់ទូទាំងប្រទេស ក្នុងនោះ រាជធានីភ្នំពេញ បានប្រារព្ធនៅមជ្ឈមណ្ឌលសន្និបាត និងពិព័រណ៍កោះពេជ្រ ដោយមានការចូលរួមពីឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួង អប់រំ យុវជន និងកីឡា តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្ដមបណ្ឌិត ពេជ សោភ័ន ទេសរដ្ឋមន្ត្រី ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្តាលវិជ្ជាជីវៈ ឯកឧត្តម លោកជំទាវ រដ្ឋមន្តី រដ្ឋមន្ត្រីប្រតិភូអមនាយករដ្ឋមន្ត្រី តំណាងក្រសួង ស្ថាប័ន និងសិស្ស និសិត្ស សរុបប្រមាណ១ពាន់នាក់។

ក្នុងឱកាសនោះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្តាលវិជ្ជាជីវៈ មានប្រសាសន៍ថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៨ ឆ្នាំ២០២៥ ត្រូវបានប្រារព្ធឡើងនៅទីនេះ និងគ្រប់ខេត្តទូទាំងប្រទេស ព្រមទាំងមានការតាំងបង្ហាញពិព័រណ៍ស្នាដៃ មុខជំនាញ និងចង្វាក់ផលិតកម្មថ្មីៗ ពីបច្ចេកវិទ្យានាពេលបច្ចុប្បន្ន របស់សិស្ស និស្សិតអប់រំបណ្ដុះ បណ្តាលបច្ចេកទេស និងវិជ្ជាជីវៈ ដែលជាស្នាដៃកូនខ្មែរ ជាប្រយោជន៍ដល់ការស្រាវជ្រាវ និងបម្រើដល់វិស័យនានានៅក្នុងសង្គម, ការទទួលបានព័ត៌មានអាហារូបករណ៍សិក្សាបច្ចេកទេសជំនាញ ទាំងក្នុង និងក្រៅប្រទេស, ជាពិសេសព័ត៌មានសិក្សាអំពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១,៥លាននាក់ និងអាចចុះឈ្មោះចូលរៀនភ្លាមៗបានដោយផ្ទាល់ និងអាចមកដាក់ពាក្យស្វែងរកការងារភ្លាមៗជាមួយក្រុមហ៊ុនធំៗតែម្តង។

ឯកឧត្តមបន្ថែមថា ការប្រារព្ធទិវាជាតិលើកទី៨ នាថ្ងៃនេះ នឹងជួយបន្តជំរុញឱ្យ "កម្មវិធីបណ្តុះបណ្តាលជំនាញ វិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំង ប្រទេស” សម្រាប់គោលដៅ ចំនួនប្រមាណ ១,៥ លាននាក់ លើកម្រិតសញ្ញាបត្របច្ចេកទេស និង វិជ្ជាជីវៈ១ ដោយមិនបង់ថ្លៃសិក្សា និងទទួលបាននូវប្រាក់ឧបត្ថម្ភចំនួន ២៨ម៉ឺនរៀល ប្រចាំខែ ដែលសម្ដេចធិបតី បានប្រកាសដាក់ឱ្យអនុវត្តជាផ្លូវការកាលពីថ្ងៃទី១៤ ខែវិច្ឆិកា ឆ្នាំ២០២៣។

ជាមួយគ្នានេះឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួង អប់រំ យុវជន និងកីឡា មានប្រសាសន៍ថា ឯកឧត្តមពិតជាពេញចិត្ត និងសាទរជាមួយនឹងក្រសួងការងារនិងបណ្ដុះបណ្ដាលវិជ្ជាជីវៈចំពោះការជ្រើសរើសប្រធានបទថា TVET បង្កើតឱកាសការងារសាងក្ដីសង្ឃឹមដល់យុវជន ព្រោះ ប្រធានបទឆ្នាំនេះ គឺមិនត្រឹមតែមានអត្ថន័យជ្រាលជ្រៅថែមទាំងបានឆ្លុះបញ្ចាំងនូវស្ថិរភាពនិងស្ថានភាពជាក់ស្ដែងនិងបានចូលរួមចំណែកសម្រេចឲ្យបាននូវចក្ខុវិស័យកម្ពុជាឆ្នាំ២០៥០។ ឯកឧត្តមលើកឡើងថា TVET បានបង្កើតការងារតាមរយៈការផ្ដល់ការបណ្ដុះបណ្ដាលជំនាញបច្ចេកទេស និងវិជ្ជាជីវៈដែលកំពុងមានតម្រូវការខ្ពស់លើទីផ្សារការងារដល់យុវជន សិស្ស និស្សិត និងសាធារណជនដោយផ្តល់ឲ្យពួកគាត់នូវចំណេះដឹងនិងសមត្ថភាពជំនាញ ដែលអាចបំពេញការងារបានយ៉ាងមានប្រសិទ្ធភាពព្រមទាំងអាចរកប្រាក់ចំណូលតាមរយៈការទទួលបានឱកាសការងារខ្ពស់ឬអាចបង្កើតមុខរបរដោយខ្លួនឯងបាន។

យោងតាមសារាចរណែនាំរបស់រាជរដ្ឋាភិបាល ចុះថ្ងៃទី២៣ ខែឧសភា ឆ្នាំ២០២៥ បានកំណត់យកថ្ងៃទី១៥ ខែមិថុនា ជារៀងរាល់ឆ្នាំ សម្រាប់ប្រារព្ធទិវាជាតិអប់រំបណ្តុះបណ្តាល បច្ចេកទេស និងវិជ្ជាជីវៈ ក្នុងគោលបំណងដើម្បីលើកកម្ពស់ការអប់រំបណ្តុះបណ្តាលបច្ចេកទេស និងវិជ្ជាជីវៈ និងធ្វើការផ្សព្វផ្សាយទៅដល់សិស្សានុសិស្ស និស្សិត យុវជន មាតាបិតា អាណាព្យាបាល និងវិស័យឯកជនឱ្យបានយល់ អំពីសារៈសំខាន់នៃ «ការអប់រំបណ្តុះបណ្តាលបច្ចេកទេស និងវិជ្ជាជីវៈ (Technical Vocational Education and Training) ហៅថា ធីវេត (TVET)» ក្នុងការជំរុញការបណ្តុះបណ្តាលកម្លាំងពលកម្មជំនាញ ប្រកបដោយគុណភាព និងប្រសិទ្ធភាពឱ្យឆ្លើយតបទៅនឹងតម្រូវការទីផ្សារការងារទាំងក្នុងនិងក្រៅប្រទេស៕