ក្នុងឆមាសទី១ ឆ្នាំ២០២៦ ក្រសួងបរិស្ថានបានចាត់មន្ត្រីឱ្យចុះល្បាតសរុបចំនួន ៥,៩៥៣ លើក និងបង្ក្រាបបទល្មើសធនធានធម្មជាតិសរុប ៩៦៧ ករណី នៅទូទាំងប្រទេស ដើម្បីពង្រឹង​ការ​អនុ​វត្តច្បាប់ និងការពារធនធានធម្មជាតិ។

តាមរបាយការណ៍របស់ក្រសួងបរិស្ថាន ករណីដែលបានបង្ក្រាបរួមមាន បទល្មើសព្រៃឈើ ៣១៨ ករណី ការបរបាញ់សត្វព្រៃ ២៤២ ករណី ការឈូសឆាយដីព្រៃ ២៦២ ករណី បទល្មើ​ស​នេសាទ ១៣២ ករណី និងបទល្មើសធនធានរ៉ែ ១២ ករណី។

បើតាមរបាយការណ៍ខាងលើនៅក្នុងប្រតិបត្តិការបង្ក្រាបនេះ បានដកហូតវត្ថុតាងជាច្រើន រួម​មាន គ្រឿងចក្រអេស្កា ២ គ្រឿង ត្រាក់ទ័រ ៥ គ្រឿង រថយន្ត ៥ គ្រឿង រថយន្តកែច្នៃ ២ គ្រឿង គោយន្ត ២១ គ្រឿង ម៉ូតូ ៣៥ គ្រឿង ទូក ៥ គ្រឿង និងរណាយន្ត ២៤១ គ្រឿង។ មន្ត្រីឧទ្យា​នុ​រក្ស​ក៏បានដោះអន្ទាក់ឆក់ ១,៣៩៥ គ្រឿង អន្ទាក់ខ្សែ ១១,៤២៨ ខ្សែ អាវុធ ៥ ដើម គ្រាប់កាំភ្លើង ៥១ គ្រាប់ និងអាវុធកែច្នៃ ៩៤ ដើម ព្រមទាំងគ្រាប់អាវុធកែច្នៃ ១៧ គ្រាប់។

ជាមួយគ្នានេះ មន្ត្រីជំនាញបានកសាងសំណុំរឿងបញ្ជូនទៅតុលាការចំនួន ៧៤ ករណី និង​ឃាត់​ខ្លួនជនសង្ស័យពាក់ព័ន្ធបទល្មើសធនធានធម្មជាតិចំនួន ៤៤ នាក់។

ក្រសួងបរិស្ថានបានឱ្យដឹងថា ចំនួនករណីបង្ក្រាបក្នុងឆមាសទី១ ឆ្នាំ២០២៦ បានថយចុះ ១៩ ករណី បើធៀបនឹងរយៈពេលដូចគ្នាកាលពីឆ្នាំ២០២៥ ដែលមានចំនួន ៩៨៦ ករណី។ ការថយ​ចុះ​នេះត្រូវបានចាត់ទុកថា ជាសញ្ញាបង្ហាញពីការកើនឡើងនៃការយល់ដឹង និងការចូលរួម​របស់​​ភាគីពាក់ព័ន្ធ ជាពិសេសប្រជាពលរដ្ឋនៅតាមសហគមន៍ ក្នុងការទប់ស្កាត់ និងរាយ​ការណ៍​អំពីបទល្មើសធនធានធម្មជាតិ។

ក្រសួងបរិស្ថានបញ្ជាក់ថា ខ្លួននឹងបន្តពង្រឹងការអនុវត្តយុទ្ធសាស្ត្រចក្រាវិស័យបរិស្ថានឆ្ពោះ​ទៅ​រក​កម្ពុជាស្អាត បៃតង និងប្រកបដោយចីរភាព តាមរយៈការសហការជាមួយក្រសួង ស្ថាប័ន​ពា​ក់​ព័ន្ធ រដ្ឋបាលថ្នាក់ក្រោមជាតិ កងកម្លាំងប្រដាប់អាវុធ ដៃគូអភិវឌ្ឍន៍ និងសហគមន៍មូលដ្ឋាន ដើម្បីពង្រឹងការអនុវត្តច្បាប់ ការពារធនធានធម្មជាតិ អភិរក្សជីវចម្រុះ និងឆ្លើយតបនឹងការ​ប្រែ​ប្រួល​អាកាសធាតុ។

ជាមួយគ្នានេះ ក្រសួងក៏បន្តជំរុញយុទ្ធនាការ «ពន្លកបៃតង» ដោយចែកកូនឈើជូន​ប្រជា​ពល​រដ្ឋ​ដោយឥតគិតថ្លៃ សម្រាប់ដាំនៅតាមសាលារៀន វត្តអារាម លំនៅឋាន និងសហគមន៍ ព្រម​ទាំង​លើកកម្ពស់ការយល់ដឹងថា ធនធានធម្មជាតិជាទ្រព្យសម្បត្តិរួម ដែលត្រូវការពារ និងថែ​រក្សា​សម្រាប់មនុស្សជំនាន់ក្រោយ។ ទន្ទឹមនឹងនេះ ក្រសួងក៏កំពុងជំរុញគម្រោងលើកកម្ពស់ជីវ​ភាពសហគមន៍ តាមរយៈការអភិវឌ្ឍសេដ្ឋកិច្ចបៃតង និងការរស់នៅប្រកបដោយចីរភាព៕