ដោយ៖ វិចិត្រ

ក្រសួងបរិស្ថាន បានចាត់វិធានការបញ្ឈប់ឱ្យមានការចាក់សំណល់គ្រប់ប្រភេទនៅទីលានទុក​ដាក់​​សំណល់​មួយក្នុងស្រុកស្ទឹងហាវ ខេត្តព្រះសីហនុ បន្ទាប់ពីរកឃើញថា សំណល់រាវ​ហូរ​ចូល​​អូរ​ធម្មជាតិ បង្កការបំពុលបរិស្ថាន និងបណ្តាលឱ្យត្រីចិញ្ចឹមរបស់ប្រជាពលរដ្ឋងាប់។

ក្រសួងបរិស្ថានបានឱ្យដឹងនៅថ្ងៃអង្គា ទី៧ នេះថា ការសម្រេចនេះធ្វើឡើង ​ក្រោយ​ក្រុម​ការ​ងារ​អធិ​ការកិច្ចនៃក្រសួងបរិស្ថាន សហការជាមួយ​មន្ទីរ​បរិ​ស្ថាន​ខេត្ត រដ្ឋបាលស្រុកស្ទឹងហាវ និង​អាជ្ញា​ធរមូលដ្ឋាន ចុះពិនិត្យទីតាំងនៅថ្ងៃទី៥ ខែកក្កដា ឆ្នាំ២០២៦។

បើតាមក្រសួងបរិស្ថាន ការត្រួតពិនិត្យនេះបានរកឃើញថា ទីលានទុកដាក់សំណល់រឹងឧស្សា​ហ​កម្ម ដែលប្រតិបត្តិដោយ​ក្រុម​ហ៊ុន Mi Ner Va Investment Co., Ltd. មិនបានរៀបចំតាមស្តង់​ដារបច្ចេកទេសបរិស្ថាន បណ្តាលឱ្យសំណល់រាវលេចធ្លាយចូលប្រភពទឹកធម្មជាតិ។ ក្រុមការ​ងារ​ ក៏បានប្រមូល​សំណា​ក​​ទឹកទៅវិភាគបន្ថែម ដើម្បីវាយតម្លៃកម្រិតសារធាតុបំពុល។

ជាមួយគ្នានេះ មន្ត្រីជំនាញបានបញ្ជាឱ្យបញ្ឈប់ការចាក់សំណល់គ្រប់ប្រភេទនៅទីតាំងខាងលើ និងបង្វែរ​ទៅ​ទីតាំងដែលមានការអនុញ្ញាតត្រឹមត្រូវ ព្រមទាំងចាត់វិធានការផ្លូវច្បាប់ ដោយ​ពិន័យ​អន្តរ​ការណ៍​លើក្រុមហ៊ុន និងតម្រូវឱ្យទទួលខុសត្រូវផ្តល់សំណងដោយផ្ទាល់ និងដោយប្រយោល រួមនឹងការស្តារបរិស្ថានឡើងវិញ។ នេះជាការបញ្ជាក់បន្ថែមរបស់ក្រសួងបរិស្ថាន៕