ដោយ៖ កែវ រតនៈ

យោងតាមសេចក្តីថ្លែងការណ៍របស់ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា ដែលចេញនៅថ្ងៃទី១៣ ខែឧសភា ឆ្នាំ២០២៦នេះ បាន តវ៉ាយ៉ាងម៉ឺងម៉ាត់ និងច្រានចោលយ៉ាងដាច់អហង្កាចំពោះការសម្រេចចិត្តរបស់នាយកដ្ឋានវិចិត្រសិល្បៈថៃ ក្នុងការចុះបញ្ជីប្រាសាទតាមាន់ ប្រាសាទតាក្របី ប្រាសាទខ្នា និងទីតាំងបុរាណវត្ថុដទៃទៀត ដែលស្ថិតនៅតាមព្រំដែន និងស្ថិតក្រោមអធិបតេយ្យភាពនៃព្រះរាជាណាចក្រកម្ពុជា ក្នុងការចុះបញ្ជីបូជនីយដ្ឋានជាតិរបស់ប្រទេសថៃ។

សេចក្តីថ្លែងការណ៍ប​​ន្តថា​សកម្មភាពឯកតោភាគីនេះគឺខុសច្បាប់ ទុកជាមោឃៈ និងគ្មានប្រសិទ្ធភាពផ្លូវច្បាប់។ ការចុះឈ្មោះបែបនេះគឺគ្មានមូលដ្ឋានទាំងស្រុង ហើយមិនអាចធ្វើជាភស្តុតាងសម្រាប់អធិបតេយ្យភាពទឹកដី ឬជាឧបករណ៍សម្រាប់កំណត់ព្រំដែនឡើយ។ អធិបតេយ្យភាព និងការបោះបង្គោលព្រំដែនរវាងកម្ពុជា និងថៃ ត្រូវតែដោះស្រាយ ស្របតាមច្បាប់អន្តរជាតិ រួមទាំងសន្ធិសញ្ញាបារាំង-សៀមឆ្នាំ ១៩០៧ និងឧបករណ៍ពាក់ព័ន្ធ ព្រមទាំងតាមរយៈយន្តការទ្វេភាគីដែលបានបង្កើតឡើង ជាពិសេស អនុស្សរណៈនៃការយោគយល់គ្នាឆ្នាំ ២០០០ (MoU 2000)។

ក្រសួង​ចាត់​ទុក​ការ​ចុះ​បញ្ជី​នេះ​ថា​ជា​ការ​ប៉ុនប៉ង​ខុស​ច្បាប់​ក្នុង​ការ​បង្កើត​រូបរាង​ស្រប​ច្បាប់​លើ​ទីតាំង​វប្បធម៌​ដែល​ស្ថិត​ក្នុង​ដែន​អធិបតេយ្យ​នៃ​ព្រះរាជាណាចក្រ​កម្ពុជា។ សកម្មភាពបែបនេះគឺជាការរំលោភលើអធិបតេយ្យភាព និងបូរណភាពទឹកដីរបស់កម្ពុជា និងធ្វើឱ្យខូចស្មារតីនៃកិច្ចសន្ទនាដោយសន្តិវិធី និងការគោរពគ្នាទៅវិញទៅមក រវាងប្រទេសទាំងពីរ។

ក្រសួងវប្បធម៌ និងវិចិត្រសិល្បៈ អំពាវនាវឱ្យរាជរដ្ឋាភិបាលថៃ ដកការចុះបញ្ជីខុសច្បាប់នេះចេញជាបន្ទាន់ និងចៀសវាងសកម្មភាពឯកតោភាគីណាមួយ ដែលធ្វើឲ្យប៉ះពាល់ដល់កិច្ចខិតខំប្រឹងប្រែងរបស់កម្ពុជា ឆ្ពោះទៅរកដំណោះស្រាយដោយសន្តិវិធី តាមរយៈយន្តការទ្វេភាគី៕