ដោយ៖ វិចិត្រ

បើទោះជាពុំទាន់ឃើញមានរបាយការណ៍ណាមួយដែលអាចបញ្ជាក់ពីគ្រោះថ្នាក់ដែលបង្កឡើងដោយជំងឺកូវីដ-១៩ បំប្លែងថ្មី ប្រភេទNB.1.8.1 នេះ យ៉ាងណាក៏ដោយ ក៏ក្រសួង​សុខា​ភិបា​ល​កម្ពុ​ជា បានអំពាវនាវក្រើនរំលឹកដល់ប្រជាពលរដ្ឋទាំងអស់ឱ្យយកចិត្តទុកដាក់ប្រុងប្រយ័ត្ន ដើម្បី​បង្ការនូវការចម្លងជំងឺផ្តាសាយ និងជំងឺកូវីដ-១៩ គ្រប់ទម្រង់ ជាយថាហេតុ។ គ្រាដែល​កម្ពុ​ជា​ទើបរកឃើញករណីវិជ្ជមានចំនួន ១ករណី កាលពីពេលថ្មីៗនេះ។

នៅក្នុងសេចក្តីប្រកាសព័ត៌មានចុះថ្ងៃទី២៤ ខែឧសភា ឆ្នាំ២០២៦ ក្រសួងសុខាភិ​បាល​បាន​ឱ្យ​ដឹង​ថា ប្រទេសកម្ពុជា កន្លងមកធ្លាប់បានរកឃើញ វីរុស NB.1.8.1 នៅចន្លោះ ខែឧសភា ដល់​ខែ​ធ្នូ ឆ្នាំ២០២៥។ ចាប់តាំងពីដើមឆ្នាំ២០២៦ មក ប្រព័ន្ធតាមដានជំងឺឆ្លងរបស់នាយកដ្ឋាន​ប្រយុទ្ធ​នឹង​ជំងឺឆ្លង របស់ក្រសួងសុខាភិបាល បានរកឃើញករណីវិជ្ជមានចំនួន ១ករណី កាល​ពី​ថ្ងៃ​ទី​១៨ ខែឧសភា នៅក្នុងចំណោម អ្នកជំងឺដែលកមកទទួលសេវាសុខាភិបាលនៅតាម​មន្ទីរ​ពេទ្យ​។

ក្នុងនោះ​ ក្រសួង បានអំពាវនាវក្រើនរំលឹកដល់ប្រជាពលរដ្ឋទាំងអស់ សូមយកចិត្តទុកដាក់​ប្រុង​ប្រ​យ័ត្ន ដើម្បីបង្ការនូវការចម្លងជំងឺផ្តាសាយ និងជំងឺកូវីដ-១៩ គ្រប់ទម្រង់ ជាយថាហេតុ ដោយត្រូវអនុវត្តនូវវិធានការបង្ការនានា ដូចជាអនុវត្តឱ្យបានខ្ជាប់ខ្ជួននូវ វិធាន​ការ​បង្ការ​ការ​ចម្លង​​គឺ ពាក់​ម៉ាស លាងដៃ​ឱ្យ​ញឹកញាប់​ជាមួយ​សាប៊ូ ឬ​អាល់កុល ឬដែល​លាងដៃ។ ត្រូវខ្ទប់​មា​ត់ និងច្រមុះពេលក្អក កណ្តាស់ ដោយប្រើផ្នត់កែងដៃ ម៉ាស ក្រម៉ា កន្សែង ឬក្រដាសអនាម័យ រួច​ខ្ចប់បោះចោលក្នុងធុងសម្រាបបិទជិត។

ក្រសួងបានរំលឹក​បន្ថែមថា ប្រសិនបើមានរោគសញ្ញាគ្រុនក្តៅ ក្អក ឈឺក្បាល ហៀរសំបោរ ឬពិបាកដកដង្ហើម សូមស្វែងរកការ ពិគ្រោះយោបល់នៅមណ្ឌលសុខភាព ឬមន្ទីរពេទ្យ ឱ្យ​បាន​ទាន់​​ពេលវេលា។

ជាមួយគ្នានេះ ក្រសួង ក៏បានអំពាវនាវឱ្យប្រជាពលរដ្ឋបន្តទៅទទួលវ៉ាក់សាំងកូវីដ-១៩ ឱ្យបាន​គ្រប់​ដួស ទាំងដូសមូលដ្ឋាន និងជួសជម្រុញ នៅតាមមន្ទីរពេទ្យ ឬមណ្ឌលសុខភាព ដើម្បី​ពង្រឹង​ប្រព័ន្ធភាពស៊ាំរៀងៗខ្លួន ឱ្យបានសមស្របដើម្បី បង្ការការឆ្លងកូវីដ-១៩ គ្រប់ទម្រង់។

ពេលថ្មីៗនេះ ប្រទេសមួយចំនួននៅលើសកលលោក មានការកើនឡើងនៃការចម្លងជំងឺកូវីដ-១៩ បំប្លែងថ្មី NB.1.8.1 ជាពិសេសនៅក្នុងតំបន់ប៉ាស៊ីហ្វិកខាងលិច រួមមាន សាធារណ​រដ្ឋ​ប្រជា​មា​និតចិន សិង្ហបុរី និងហុងកុង ដែលកំពុងមានការចរាចរ និងការឆ្លងរាលដាលនៃវីរុសនេះ។ វីរុសបំប្លែងថ្មី NB.1.8.1 គឺជាពូជកូនចៅដែលវិវត្ត ចេញពីពូជអូមីក្រុង (Omicron) ខ្សែស្រឡាយ JN.1។

នៅថ្ងៃទី២៣ ខែឧសភា ឆ្នាំ២០២៥ អង្គការសុខភាព ពិភពលោក (WHO) បានចាត់ថ្នាក់​វីរុស​នេះ​ជា «វីរុសបំប្លែងខ្លួនដែលស្ថិតក្រោមការតាមដាន» បន្ទាប់ពីសង្កេត ឃើញការកើនឡើង​យ៉ាង​ឆា​ប់​ពីទិន្នន័យវិភាគលម្អិតហ្សែន (Virus Sequencing) នៅលើសកលលោក ជាពិសេស នៅ​អា​ស៊ី​អាគ្នេយ៍ និងប៉ាស៊ីហ្វិកខាងលិច។

បច្ចុប្បន្ននេះមិនទាន់មានភស្តុតាងវិទ្យាសាស្ត្រណាមួយ បញ្ជាក់ថា វីរុស NB.1.8.1 បង្កឱ្យ​មាន​ស្ថាន​ភាពជំងឺធ្ងន់ធ្ងរ ការសម្រាកពេទ្យកើនឡើង ឬអត្រាស្លាប់ខ្ពស់ជាងពូជអូមីក្រុង ដែលបាន​ចរាចរ​ពីមុននោះទេ៕