ដោយ៖ វិចិត្រ

ក្រុមអ្នកសង្កេតការណ៍អាស៊ាន (AOT) នៅថ្ងៃទី២៩ ខែមីនា ឆ្នាំ២០២៦ បានចុះសង្កេតការណ៍ ផ្ទៀង​ផ្ទាត់ និងរាយការណ៍អំពីស្ថានភាពព្រំដែននៅតំបន់ច្រកអូរស្មាច់ ក្រុងសំរោង ខេត្តឧត្តរ​មាន​​ជ័យ លើការគោរព និងអនុវត្តវិធានការទាំងអស់ក្នុងសេចក្តីប្រកាសរួម ក្រោយបទឈប់​បាញ់​​ចូលជាធរមាន ដោយមានការសម្រេបសម្រួលពី ក្រុមសម្របសម្រួល (CLG) នៃព្រះរាជា​ណាច​ក្រកម្ពុជា។ នេះបើតាមការបញ្ជាក់ពីអ្នកនាំពាក្យក្រសួងការពារជាតិកម្ពុជានៅលើទំព័រ​ហ្វេស​ប៊ុកផ្លូវការរបស់ក្រសួង នៅថ្ងៃដដែលនេះ។

បើតាមឧត្តមសេនីយ៍ឯក ម៉ាលី សុជាតា ការចុះសង្កេតការណ៍លើកនេះ គឺជាបេសកកម្ម​នៃ​ការ​ចុះសង្កេតការណ៍ប្តូរវេនរវាងប្រធានក្រុមអ្នកសង្កេតការណ៍ចប់អាណត្តិម៉ាឡេស៊ី ដែលនឹងត្រូវ​ផ្ទេរជូនប្រទេសហ្វីលីពីនដឹកនាំបន្ត ក្នុងនាមជាប្រធានអាស៊ានប្តូរវេន និងជាប្រធានដឹកនាំក្រុម​អ្នកសង្កេតការណ៍អាស៊ាន (AOT) បន្ត ប្រចាំនៅកម្ពុជា។

ក្នុងនោះលោកស្រី ម៉ាលី សុជាតា អ្នកនាំពាក្យក្រសួងការពារជាតិ បានឱ្យដឹងបន្ថែមថា រដ្ឋា​ភិបាល និងក្រសួងការពារជាតិកម្ពុជា នៅតែបញ្ជាក់ពីការប្តេជ្ញាចិត្តយ៉ាងម៉ឺងម៉ាត់ ស្មោះ​ត្រង់ របស់​ខ្លួន ប្រកបដោយការទទួលខុសត្រូវខ្ពស់ក្នុងការគោរព និងអនុវត្តយ៉ាងពេញលេញ និង ខ្ជាប់​ខ្ជួន​បំផុតនូវសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូ ទៅ​ កម្ពុជា-ថៃ (GBC) នៅថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ច​ព្រមព្រៀង​សន្តិ​ភាព​រ​វាងកម្ពុជា និងថៃ នៅថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេង​ទៀត ដើ​ម្បី​ឆ្ពោះ​​ទៅការធ្វើឱ្យប្រសើរឡើងវិញឆាប់រហ័ស និងការវិលត្រឡប់ទៅរកប្រក្រតីភាព សន្តិភាព ស្ថិរភាពយូរអង្វែង៕