អត្ថបទ៖ សំនៀង

តាមរយៈសេចក្តីជូនដំណឹងរបស់រដ្ឋបាលខេត្តតាកែវ ដែលចុះថ្ងៃទី៥ ខែកញ្ញា ឆ្នាំ២០២៥ បានឱ្យដឹងថា គណៈកម្មការរដ្ឋបាលនឹងធ្វើការបិទផ្សាយជាសាធារណៈនូវឯកសារនៃការវិនិច្ឆ័យដែលមានប្លង់សុរិយោដី និងបញ្ជីឈ្មោះអ្នកកាន់កាប់ដីដែលក្រុមប្រតិបត្តិកម្មវិធីបានធ្វើការវាស់វែង និងប្រមូលទិន្នន័យកន្លងមក ក្នុងភូមិកំពែងធំ និងភូមិកំពែងត្បូង ឃុំកំពែង នៃស្រុកព្រៃកប្បាស។

រដ្ឋបាលខេត្ត ស្នើឱ្យសាធារណជនជាអ្នកកាន់កាប់ដីស្រែ ចម្ការ និងដីលំនៅឋាន ឬដី សាងសង់ ព្រមទាំងគ្រប់មន្ទីរ អង្គភាពនានា ដែលមានការពាក់ព័ន្ធនឹងដីធ្លីក្នុងតំបន់វិនិច្ឆ័យខាងលើ ឱ្យចូលរួមពិនិត្យលើ ទិន្នន័យដែលមាននៅក្នុងឯកសារនៃការវិនិច្ឆ័យ ដើម្បីបញ្ជាក់ពីភាពត្រឹមត្រូវ ឬខុសឆ្គងដែលត្រូវកែតម្រូវ ឬជំទាស់ លើទិន្នន័យទាំងនោះក្នុងរយៈពេល១៥ថ្ងៃ (ដោយរាប់បញ្ចូលទាំងថ្ងៃឈប់សម្រាក) គិតពីថ្ងៃទី២៦ ខែកញ្ញាឆ្នាំ២០២៥ ដល់ថ្ងៃទី ១០ ខែតុលា ឆ្នាំ២០២៥ ទីតាំងនៃការបិទផ្សាយស្ថិតនៅវត្តកំពែង ក្នុងភូមិកំពែងធំ ឃុំកំពែង ស្រុកព្រៃកប្បាស ខេត្តតាកែវ។

ក្នុងនោះរដ្ឋបាលខេត្តបានបញ្ជាក់ថា ផុតរយៈពេលកំណត់ខាងលើ គណៈកម្មការរដ្ឋបាលសន្មត់ថា ទិន្នន័យដែលបើកចំហរជូនពិនិត្យជា សាធារណៈនេះមានភាពត្រឹមត្រូវហើយមិនអាចជំទាស់ ឬតវ៉ានៅពេលក្រោយទៀតបានឡើយ៕