អត្ថបទ៖ វិចិត្រ

រដ្ឋបាលខេត្តក្រចេះ នឹងធ្វើការចែកប័ណ្ណកម្មសិទ្ធិដីធ្លីជូនប្រជាពលរដ្ឋដែលរស់នៅក្នុងភូមិចំនួន៧ នៃឃុំសំបូរ ស្រុកសំបូរ ចាប់ពីថ្ងៃទី៤ ខែកញ្ញាស្អែកនេះតទៅ។ ភូមិទាំង៧នោះរួមមាន ភូមិសំបូរ ភូមិកែងប្រាសាទ ភូមិដូនមាស ភូមិកោះរាល ភូមិស្រែខឿន ភូមិចារថ្កោល និងភូមិសំរោង។ នេះបើតាមសេចក្តីជូនដំណឹងរបស់រដ្ឋបាលខេត្តក្រចេះ ចុះថ្ងៃទី២៧ ខែសីហា ឆ្នាំ២០២៥។

ក្នុងនោះរដ្ឋបាលខេត្តក៏បានជូនដំណឹងអំពីការធ្វើមោឃភាពចំពោះប័ណ្ណសម្គាល់សិទ្ធិកាន់កាប់ដីធ្លី (ប័ណ្ណស្លាបមាន់) ឬប័ណ្ណសម្គាល់សិទ្ធិកាន់កាប់អចលនវត្ថុ ដែលចេញដោយរដ្ឋបាលសុរិយោដីកន្លងមកនៅក្នុងតំបន់នេះ ចាប់ពីថ្ងៃប្រគល់វិញ្ញាបនបត្រសម្គាល់ម្ចាស់អចលនវត្ថុថ្មីនេះតទៅ។

នៅក្នុងសេចក្តីជូនដំណឹងខាងលើនេះដែរ រដ្ឋបាលខេត្តក្រចេះ សូមឱ្យម្ចាស់ក្បាលដីស្ថិតក្នុងទីតាំងខាងលើ ដែលមានបណ្ណសម្គាល់សិទ្ធិកាន់កាប់ ប្រើប្រាស់ដីធ្លី ឬ បណ្ណសម្គាល់សិទ្ធិកាន់កាប់អចលនវត្ថុកន្លងមក សូមឱ្យយកបណ្ណទាំងអស់នោះមកប្រគល់ឱ្យមន្ត្រី រដ្ឋបាលសុរិយោដី ដើម្បីទទួលយកវិញ្ញាបនបត្រសម្គាល់ម្ចាស់អចលនវត្ថុថ្មីជំនួសវិញ ដែលនឹងត្រូវប្រគល់ជូនដោយ មន្ត្រីរដ្ឋបាលសុរិយោដី នៅស្នាក់ការរបស់ក្រុមការងារ (ចំណុចភូមិចាម មាត់ទន្លេ) ស្ថិតនៅភូមិកែងប្រាសាទ ឃុំសំបូរ ស្រុកសំបូរ ខេត្តក្រចេះ ចាប់ពីថ្ងៃទី៤ ខែកញ្ញា ដល់ថ្ងៃទី១៩ ខែកញ្ញា ឆ្នាំ២០២៥។

ចំពោះម្ចាស់បំណុលដែលបានទទួលបញ្ចាំ ឬដាក់ធានា ពាក់ព័ន្ធនឹងក្បាលដីក្នុងតំបន់វិនិច្ឆ័យខាងលើ រដ្ឋបាលខេត្តក៏បានស្នើឱ្យយកបណ្ណទាំងអស់នោះមកជូនមន្ត្រីរដ្ឋបាលសុរិយោដីធ្វើនិយ័តកម្ម ដើម្បីធានាប្រាក់របស់ពួកគេ៕