អត្ថបទ៖ វិចិត្រ

រដ្ឋបាលខេត្តក្រចេះនឹងរៀបចំកិច្ចប្រជុំផ្សព្វផ្សាយសេចក្តីប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ នៅថ្ងៃទី៨ ខែមេសា ឆ្នាំ២០២៥ ដែលនឹងរៀបចំឡើងនៅបរិវេណវត្តនវភូមិការាម (ហៅដូនត្រី)។ នេះបើតាមសេចក្តីជូនដំណឹងរបស់រដ្ឋបាលខេត្តក្រចេះ ចុះថ្ងៃទី១ ខែមេសា ដែលបៃតងប៉ុស្តិ៍ទើបទទួលបាននៅថ្ងៃនេះ។

នៅក្នុងលិខិតជូនដំណឹង បានប្រាប់ដល់សាធារណជន ព្រមទាំងគ្រប់មន្ទីរ អង្គភាព និងស្ថាប័ន ដែលពាក់ព័ន្ធនឹងក្បាលដីទាំងអស់ស្ថិតក្នុងភូមិវាលសំបូរ ភូមិត្នោត ភូមិក្រសាំង ភូមិមានជ័យ ភូមិខ្មោច ភូមិច្រណោល ភូមិថ្មី ភូមិស្វាយជ្រុំ ភូមិប្អៀរ ភូមិចំរើន ភូមិ១០៥ និងភូមិទ្រាប ឃុំថ្មី ស្រុកចិត្របុរី ខេត្តក្រចេះ ឲ្យបានជ្រាបថា គណៈកម្មការរដ្ឋបាលនឹងបើកកិច្ចប្រជុំផ្សព្វផ្សាយសេចក្តីប្រកាសកំណត់តំបន់ ធ្វើការវិនិច្ឆ័យក្នុងភូមិវាលសំបូរ ភូមិត្នោត ភូមិក្រសាំង ភូមិមានជ័យ ភូមិខ្មោច ភូមិច្រណោល ភូមិថ្មី ភូមិស្វាយជ្រុំ ភូមិ បៀរ ភូមិចំរើន ភូមិ១០៥ និងភូមិទ្រាប ឃុំថ្មី ស្រុកចិត្របុរី ខេត្តក្រចេះ ជាតំបន់ធ្វើការចុះបញ្ជីដីធ្លីមានលក្ខណៈជា ប្រព័ន្ធ នៅថ្ងៃទី០៨ ខែមេសា ឆ្នាំ២០២៥ នៅបរិវេណវត្ត នវភូមិការាម ហៅវត្តដូនត្រី ស្ថិតនៅភូមិច្រណោល ឃុំថ្មី ស្រុកចិត្របុរី ខេត្តក្រចេះ។

សូមបញ្ជាក់ថា កាលពីថ្ងៃទី២១ ខែមីនា កន្លងទៅ ក្រសួងដែនដី នគរូបនីយកម្ម និងសំណង់ គណៈកម្មការសុរិយោដីថ្នាក់ជាតិ អាជ្ញាធរជាតិដោះស្រាយដីធ្លី និងរដ្ឋបាលខេត្តក្រចេះ បានរៀបចំកិច្ចប្រជុំពិភាក្សាការងារដោះស្រាយបញ្ចប់វិវាទដីធ្លី ក្នុងភូមិសាស្ត្រខេត្តក្រចេះ ដែលដឹកនាំដោយ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលជាលទ្ធផល នៅក្នុងកិច្ចប្រជុំនោះបានឯកភាព និងសម្រេចយកនីតិវិធីសុរិយោដី ដើម្បីចុះបញ្ជីដីបង្ហើយ និងដោះស្រាយបញ្ចប់វិវាទលើទីតាំង ដីរដ្ឋនិងដីឯកជន ក្នុងភូមិសាស្ត្រខេត្តក្រចេះ ឈានទៅបង្កើតបរិយាកាសគ្មានវិវាទ ដូចជា ជំរុញបញ្ចប់ការចុះបញ្ជីដីធ្លីមានលក្ខណៈជាប្រព័ន្ធ ទាំងដីរដ្ឋ និងដឹឯកជន ដែលនៅសេសសល់ ស្នើសុំកាត់ដីចេញពីបញ្ជីសារពើភណ្ឌរបស់រដ្ឋ ចំនួន ១១ករណី ដើម្បីធ្វើ អនុប្បយោគ និងប្រទានកម្ម បន្តពិនិត្យ និងដោះស្រាយជូនប្រជាពលរដ្ឋដែលបានរស់នៅ ប្រើប្រាស់ និងអាស្រ័យផលជាក់ស្តែង ករណីប្រជាពលរដ្ឋចំនួន ៧គ្រួសារ ស្នើសុំគោលការណ៍កាត់ផ្ទៃដីទំហំ ៤,១៤ហិកតា មានទីតាំងស្ថិត នៅភូមិក្បាលស្នួល ឃុំស្នួល ស្រុកស្នួល ខេត្តក្រចេះ និងជំរុញការដោះស្រាយវិវាទដែលនៅសេសសល់ទាំង ១៣ករណី៕