អត្ថបទ៖សំនៀង

ចាប់ពីថ្ងៃទី២៨ដល់ថ្ងៃទី៣០ ខែមីនា ឆ្នាំ២០២៥ ប្រជាសហគមន៍ចំនួន៣ រួមមាន សហគមន៍អង្គរធំ សហគមន៍ដូនឪ និងសហគមន៍ត្រពាំងស្វាយ បានសហការគ្នារៀបចំពិធីបុណ្យពូជ ក្រោមមូលបទ«យើងរួមគ្នាគាំទ្រ ថែរក្សា និងអភិរក្សគ្រាប់ពូជបុរាណ» ដែលកម្មវិធីនេះត្រូវបានរៀបចំធ្វើឡើងនៅក្នុងបរិវេណសាលា បឋមសិក្សាដូនឪ ស្ថិតនៅក្នុងភូមិដូនឪ ឃុំលាងដៃ ស្រុកអង្គរធំ ខេត្តសៀមរាប។

លោក លឹម ប៉ូលី ជាតំណាងសហគមន៍ដូនឪ បានឲ្យដឹងថា ការរៀបចំពិធីបុណ្យនេះគឺត្រូវបានធ្វើឡើងជារៀងរាល់ឆ្នាំ ដោយមានការចូលរួមពីបណ្ដារសមាជិកសហគមន៍នៅក្នុងខេត្តផ្សេងៗមកចូលរួម ហើយក្នុងឆ្នាំនេះក៏ដូចគ្នា គឺមានបណ្ដាញសហគមន៍មកពីខេត្តបាត់ដំបង ខេត្តប៉ៃលិន មណ្ឌលគិរី រតនៈគិរី ខេត្តកំពង់ឆ្នាំង និងបណ្ដាញសហគមន៍នៅក្នុងខេត្តសៀមរាបនេះផងដែរ។ លោកបានបន្តថា ការរៀបចំពិធីបុណ្យពូជនេះធ្វើឡើងក្នុងរយៈពេល៣ថ្ងៃ គឺចាប់ពីថ្ងៃទី២៨ ដល់ថ្ងៃទី៣០ ខែមីនា ដោយមានការអញ្ជើញចូលរួមពីសំណាក់អាជ្ជាធរស្រុកអង្គរធំ បណ្ដាអង្គការដៃគូអភិវឌ្ឍ សមាជិកសហគមន៍ និងប្រជាពលរដ្ឋនៅក្នុងស្រុកអង្គរធំ។ ហើយកម្មវិធីបុណ្យនេះរៀបចំធ្វើឡើងក្នុងគោលបំណងធំៗចំនួន៣គឺ ទី១. ចូលរួមបន្តថែរក្សា និងស្ដារពូជស្រូវ ដំណាំក្នុងស្រុក ទី២. ផ្លាស់ប្ដូរ និងចែករំលែកគ្រាប់ពូជ ផ្លាស់ប្ដូរបទពិសោធន៍ ចំណេះដឹង បច្ចេកទេសក្នុងការធ្វើស្រែចម្ការ និងកសិកម្មតាមបែបក្សេត្របរិស្ថាន ឬកសិកម្មតាមបែបធម្មជាតិពីកសិករ ទៅកសិករ និងទី៣. ចូលរួមស្ដារសេដ្ឋកិច្ចគ្រួសារ និងសហគមន៍ តាមរយៈការលើកកម្ពស់ការលើកទឹកចិត្ត កាត់បន្ថយការចំណាយទៅលើធាតុចូលកសិកម្ម ជាពិសេសសារធាតុគីមី។

អ្នកស្រី សៅ លីនដា ជាសមាជិកសហគមន៍អង្គរធំ បានប្រាប់ផងដែរថា គ្រាប់ពូជដែលប្រមូលមកពីបណ្ដាសហគមន៍ យកមករៀបចំក្នុងពិធីបុណ្យនេះមានដូចជា ស្រូវសែនក្រអូប ផ្ការំដួល ដូងបុរាណ គុយ រំដួល រាជប្រឹក្ស ក្រវ៉ាន់ ស្វាយខ្ទិះ ស្វាយខុសរដូវ រំដេង ត្នោត ផ្អាវ និងដើមឈើព្រៃ និងឈើហូបផ្លែជាច្រើនមុខទៀត ដើម្បីចែកគ្នាយកទៅដាំដុះ៕