អត្ថបទ៖ កែវ រតនៈ

ពិធីប្រគល់-ទទួលវិញ្ញាបនបត្រសម្គាល់ម្ចាស់អចលនវត្ថុនេះប្រារព្ធធ្វើនារសៀលថ្ងៃទី៧ ខែសីហា ឆ្នាំ២០២៤ដោយមានការចូលរួមពី ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺផងដែរ។

ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ដ្រីក្រសួងរៀបចំដែនដី នគរូបនីយកម្ម​ និងសំណង់​ មានប្រសាសន៍ក្នុងកម្មវិធីនោះថា​ រាជរដ្ឋាភិបាលកម្ពុជា បាន​និងកំពុងខិតខំប្រឹងប្រែងយ៉ាងខ្លាំង​ ដើម្បីពន្លឿនការចុះបញ្ជីកម្មសិទ្ធិដីធ្លី ផ្តល់ជូនប្រជាពលរដ្ឋយកទៅប្រើប្រាស់តាមតម្រូវការ សំដៅធានាសុវត្ថិភាពនៃការកាន់កាប់ដីធ្លី និងកាត់បន្ថយវិវាទដីធ្លីនៅទូទាំងប្រទេស។

ជាក់ស្ដែងដូចជាការប្រគល់វិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន ៣០ភូមិ នៅឃុំអង្គពពេល និងឃុំវាល ស្រុកគងពិសី ខេត្តកំពង់ស្ពឺដែលស្មើនឹង១៩៨៤០ប័ណ្ណ​នេះ។  ឯកឧត្តមក៏បានថ្លែងអំណរគុណដល់រដ្ឋបាលខេត្ត មន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ និងមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពង់ស្ពឺ មន្ត្រីរាជការ កងកម្លាំងប្រដាប់អាវុធ មេភូមិ មេឃុំ និងអាជ្ញាធរពាក់ព័ន្ធទាំងអស់ ដែលបានបំពេញបេសកកម្មដ៏វិសេសវិសាលថ្លៃថ្លាជូនដល់ប្រជាពលរដ្ឋខេត្តកំពង់ស្ពឺរហូតសម្រេចបាននូវការចេញប័ណ្ណសម្គាល់ម្ចាស់អចលនវត្ថុជូននាពេលនេះ។

បើតាមឯកឧត្ដម សាយ សំអាល់​  គិតរហូតមកដល់ពេលនេះ ក្រសួងបានប្រគល់ប័ណ្ណកម្មសិទ្ធិដីធ្លីប្រមាណ​ ៨លានប័ណ្ណ​ ជូនប្រជាពលរដ្ឋ ហើយនៅសល់ប្រមាណជាង​ ៣លានប័ណ្ណ​ទៀតប៉ុណ្ណោះ​ ដែលក្នុងនោះជាង​ ២លានប័ណ្ណ​ កំពុងចេញប័ណ្ណចែកបន្តរាល់ថ្ងៃ​ និងសេសសល់ជាង​ ១លានប័ណ្ណទៀត​ នៅមិនទាន់បានវាស់៕