អត្ថបទ៖ វិចិត្រ

តាមរយៈសេចក្តីជូនដំណឹងរបស់ក្រសួងបរិស្ថានចុះកាលពីថ្ងៃទី១៨ ខែមេសា ឆ្នាំ២០២៥ ស្តីពី ការប្រឡងប្រណាំង “ភូមិ ឃុំ-សង្កាត់មានសុវត្ថិភាព” ក្នុងក្របខ័ណ្ឌលក្ខណសម្បត្តិទី៦ ផ្ញើជូនអភិបាល នៃគណៈអភិបាលក្រុង ស្រុក ខណ្ឌ ឱ្យដឹងថា ក្រសួងបរិស្ថាននឹងរៀបចំការប្រលងប្រណាំង «ភូមិ ឃុំ-សង្កាត់មានសុវត្ថិភាព» ក្រោមប្រធានបទ “ផ្លូវជាតិ ផ្លូវខេត្តស្អាតគ្មានសំរាមប្លាស្ទិក» ក្នុងក្របខ័ណ្ឌលក្ខណសម្បត្តិទី៦ «មានអនាម័យ មានសោភ័ណភាពល្អ និងបរិស្ថានល្អ នៃគោលនយោបាយ ភូមិ ឃុំ-សង្កាត់មានសុវត្ថិភាព» ដើម្បីផ្តល់បណ្ណមេត្រីបរិស្ថាន សម្រាប់ឆ្នាំ២០២៥។ សេចក្តីជូនដំណឹងដដែលនេះបញ្ជាក់ថា ការប្រលងប្រណាំងនេះ រៀបចំឡើងក្នុងគោលបំណង ដើម្បីគាំទ្រ និងអនុវត្តគោលនយោបាយរបស់ រាជរដ្ឋាភិបាលកម្ពុជា តាមរយៈការផ្តល់តម្លៃ និងលើកទឹកចិត្តដល់ ភូមិ ឃុំ-សង្កាត់ ដែលអនុវត្តបានល្អនូវ លក្ខណសម្បត្តិទី៦ នៃគោលនយោបាយ «ភូមិ ឃុំ-សង្កាត់មានសុវត្ថិភាព»។

បើតាមសេចក្តីជូនដំណឹងនេះ ពាក្យស្នើសុំចូលរួមប្រលងប្រណាំងនេះ មាននៅគ្រប់មន្ទីរបរិស្ថានរាជធានី ខេត្ត សាមី សម្រាប់ចែកជូន ដោយឥតគិតថ្លៃ ចាប់ពីថ្ងៃផ្សាយដំណឹងនេះ ដែលនឹងផុតកំណត់ការទទួលពាក្យ នៅថ្ងៃសុក្រ ទី២៧ ខែមិថុនា ឆ្នាំ២០២៥។

ក្រុង ស្រុក ខណ្ឌ នីមួយៗត្រូវធ្វើការជ្រើសរើសបេក្ខភាព ឃុំ-សង្កាត់ឆ្នើមរៀងៗខ្លួន ដែលបានគ្រប់គ្រង ថែរក្សា ការពារធនធានធម្មជាតិ និងបរិស្ថាន និងបញ្ជ្រាបការយល់ដឹងដល់ប្រជាពលរដ្ឋអំពីអនាម័យក្នុង ភូមិ ឃុំ-សង្កាត់ ប្រកបដោយប្រសិទ្ធិភាព ហើយបញ្ជូនទៅកាន់ នាយកដ្ឋានរង្វាន់ និងលើកទឹកចិត្ត នៃអគ្គនាយកដ្ឋានចំណេះដឹង និងព័ត៌មានបរិស្ថាន ក្រសួងបរិស្ថាន៕