អត្ថបទ៖ សំនៀង

ក្នុងខែមករា ឆ្នាំ២០២៦ កន្លងមកនេះ នាយកដ្ឋានពេទ្យការងារ នៃក្រសួងការងារ និងបណ្តុះបណ្តាល​វិជ្ជាជីវៈ បានរៀបចំវគ្គបណ្តុះបណ្តាលអំពីសុវត្ថិភាព និងសុខភាពការងារដល់សិក្ខាកាមសរុបចំនួន ៣០៨​នាក់ ក្នុងនោះស្រីចំនួន១៧៣នាក់ មកពីសហគ្រាស ក្រុមហ៊ុន រោងចក្រសរុបចំនួន ១៣ នៅក្នុងរាជ​ធានី​ភ្នំ​ពេ​ញ។ នេះបើតាមការចុះផ្សាយដោយក្រសួងការងារ និងបណ្តុះបណ្តាលវិជ្ជាជីវិៈនៅថ្ងៃទី៦ ខែកុម្ភៈ ឆ្នាំ២០២៦។

នៅក្នុងវគ្គបណ្តុះបណ្តាលនេះ មន្រ្តីជំនាញផ្នែកបណ្តុះបណ្តាល នៃនាយកដ្ឋានពេទ្យការងារបានធ្វើបទ​បង្ហា​ញ​យ៉ាងច្បាស់លាស់ ដើម្បីផ្សព្វផ្សាយ ណែនាំ និងបង្កើនចំណេះដឹងជូនដល់ប្រតិភូបុគ្គលិក សហជីព និង​និយោជកប្រចាំសហគ្រាស ក្រុមហ៊ុន និងរោងចក្រ ពាក់ព័ន្ធទៅនឹងសុវត្ថិភាព និងសុខភាពការងារ។ ប្រធានបទសំខាន់ៗរួមមាន ការសង្គ្រោះបឋម ការលើកដាក់ទម្ងន់ ឥរិយាបថបំពេញការងារ ការទប់​ស្កាត់​មេ​រោគអេដស៍ និងគ្រឿងញៀន និងក៏មានការចូលរួមផ្សព្វផ្សាយពីបញ្ហាជំងឺមិនឆ្លងជាដើម។

វគ្គបណ្តុះបណ្តាលនេះ ក៏បានចូលរួមផ្តល់ចំណេះដឹងបន្ថែមពាក់ព័ន្ធនឹងសុវត្ថិភាព និងសុខភាពការងារ​នៅ​កន្លែងធ្វើការ ក៏ដូចជាការពង្រឹងវិសាលភាពក្នុងការបង្ការ និងទប់ស្កាត់រាល់គ្រោះថ្នាក់ការងារ​ដល់ប្រតិភូ​បុគ្គ​លិក កម្មករនិយោជិត ជាពិសេស អាចជួយអាយុជីវិតផ្ទាល់ខ្លួន និងមិត្តរួមការងារនៅកន្លែងធ្វើការ ដោយ​ប្រើវិធីសាស្ត្រត្រឹមត្រូវឱ្យបានទាន់ពេលវេលា និងមិនបង្កភាពស្លន់ស្លោនៅក្នុងគ្រាអាសន្ន​ដែលអាច​កើត​មានឡើងជាយថាហេតុ៕