អត្ថបទ៖ សំនៀង

យោងតាមការចុះផ្សាយរបស់ បេឡាជាតិសន្តិសុខសង្គម បានឱ្យដឹងថា ក្នុងកម្មវិធីប្រកាសដាក់ឱ្យអនុវត្តជាផ្លូវការនូវកិច្ចព្រមព្រៀងលើគម្រោងស្ដីពី ការពង្រីកការចុះបញ្ជីសមាជិក ប.ស.ស. ជាមួយអង្គការអន្តរជាតិខាងការងារ (ILO)  ឯកឧត្តម ម៉េង ហុង បានថ្លែងថា កិច្ចព្រមព្រៀងលើគម្រោងស្ដីពី ការពង្រីកការចុះបញ្ជីសមាជិក ប.ស.ស. នេះ គឺជាជំហានបន្តថ្មីមួយ ដែលអាចបង្ខិតសេវារបស់ ប.ស.ស. កាន់តែទូលំទូលាយ និងខិតទៅកាន់តែគៀកប្រជាពលរដ្ឋ ដែលជាក្រុមគោលដៅ ក្នុងនោះរួមមាន ម្ចាស់សហគ្រាស គ្រឹះស្ថានដែលមានកម្មករនិយោជិតចាប់ពីម្នាក់ឡើង, បុគ្គលស្វ័យនិយោជន៍ និង​អ្នកក្នុងបន្ទុកសមាជិក ប.ស.ស. អាចចុះបញ្ជី និងទទួលបានប័ណ្ណសមាជិក ប.ស.ស. ភ្លាមៗនៅនឹងកន្លែង។ តាម​​រយៈ​​គម្រោង​នេះ នឹងក្លាយជាយន្តការអនុវត្តន៍យូរអង្វែងទៅមុខទៀតរបស់ ប.ស.ស. ព្រោះជាផ្នែកមួយជួយជំរុញឱ្យចំនួនសមាជិក ប.ស.ស. បន្តកើនឡើងជាបន្ដបន្ទាប់ ស្របតាមផែនការយុទ្ធសាស្រ្តអភិវឌ្ឍន៍វិស័យការងារ សន្តិសុខសង្គម និងបណ្តុះ​​បណ្តាលវិជ្ជាជីវៈ ឆ្នាំ២០២៤-២០២៨ និងឆ្លើយតបទៅនឹងផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកលនៅកម្ពុជា ឆ្នាំ២០២៤-២០៣៥ ដែលដាក់ចេញដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

លោក Koen EVERAERT អនុប្រធានសហប្រតិបតិ្តការ នៃប្រតិភូសហភាពអឺរ៉ុបប្រចាំនៅកម្ពុជា ក្នុងពិធីប្រកាសអនុវត្តគម្រោងនេះ បានសម្ដែងក្ដីរីករាយចំពោះការរីកចម្រើននៃប្រព័ន្ធសន្ដិសុខសង្គមកម្ពុជា ព្រមទាំងគម្រោងការពង្រីកការចុះបញ្ជីសមាជិក ប.ស.ស. នាពេលនេះ ជាការផ្ដល់នូវទំនុកចិត្ត និងភាពងាយស្រួលបន្ថែមទៀត ដល់ការធានាបាននូវសុខុមាលភាពរបស់កម្មករនិយោជិត, បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. ។

លោក Koen EVERAERT បានបន្ថែមទៀតថា សហភាពអ៊ឺរ៉ុប តាមរយៈអង្គការអន្ដរជាតិខាងការងារ (ILO) នឹងបន្ដកិច្ចសហការជាមួយកម្ពុជា ដើម្បីជួយពង្រឹងបន្ថែមទៀត ដល់ប្រព័ន្ធសន្ដិសុខសង្គមមួយនេះ ឱ្យកាន់តែរីកចម្រើន ហើយសង្ឃឹម​​ថាប្រជាពលរដ្ឋកាន់តែច្រើនដែលពុំទាន់ចូលរួមក្នុងប្រព័ន្ធនេះ នឹងចូលរួមកាន់តែច្រើនបន្ថែមទៀតតាមរយៈ​​គម្រោងមួយនេះ។

លោក អាន បឋម អនុប្រធានផ្សារអូរឬស្សី បានប្រាប់បៃតងប៉ុស្តិ៍ថា ការពង្រីកសាខា ក៏ដូចជាសេវារបស់ ប.ស.ស នេះជារឿងមួយដែលល្អសម្រាប់អាជីវករ កសិករ កម្មករ ប្រជាពលរដ្ឋ និងក្រុមបុគ្គលស្វ័យនិយោជន៍ផ្សេងទៀតមានភាពងាយស្រួលក្នុងការចុះឈ្មោះជាសមាជិក ប.ស.ស ដើម្បីទទួលបានអត្ថប្រយោជន៍ផ្សេងៗទៅលើសេវាសុខាភិបាល ពីក្រសួងសុខាភិបាល ជាពិសេសសម្រាប់ស្ត្រីមានផ្ទៃពោះនៅតាមទីជនបទ ពួកគាត់ងាយស្រួលក្នុងការទទួលបានសេវាថែទាំសុខភាព នៅពេលដែលបានចុះឈ្មោះជាសមាជិករបស់ ប.ស.ស។ លោកបានលើកឡើងបន្ថែមថា ប្រសិនបើការពង្រីកនេះបានធ្វើឡើងនៅទូទាំងប្រទេស ជារឿងមួយដែលល្អបំផុតសម្រាប់ប្រជាពលរដ្ឋងាយស្រួលក្នុងការចុះឈ្មោះជាមួយ ប.ស.ស។

 សូមបញ្ជាក់ថា ក្នុងកិច្ចព្រមព្រៀងលើគម្រោងនេះ ប.ស.ស. និងអង្គការអន្តរជាតិខាងការងារ (ILO) បានពិភាក្សាកំណត់ការចុះបញ្ជីចល័តនៅគោលដៅធំៗចំនួន៥ រួមមាន៖ រាជធានីភ្នំពេញ ខេត្តបាត់ដំបង ខេត្តកំពង់ចាម ខេត្តតាកែវ និងខេត្តសៀមរាប ដែលមានទីតាំងសរុបចំនួន ២៧ កន្លែង៕

ររូបភាព៖ Page ប.ស.ស