អត្ថបទ៖ វិចិត្រ

តាមរយៈលទ្ធផលនៃការស្ទាបស្ទង់មតិលើជម្លោះព្រំដែនកម្ពុជា-ថៃ ដែលចេញផ្សាយនៅថ្ងៃទី១៨ ខែមិថុនា ឆ្នាំ២០២៥ ដោយវិទ្យាស្ថានចក្ខុវិស័យអាស៊ី (AVI) បង្ហាញថា ពលរដ្ឋច្រើនលើសលប់ពេញចិត្តចំពោះចំណាត់ការរដ្ឋាភិបាលកម្ពុជា។

AVI បានឱ្យដឹងថា ការស្ទាបស្ទង់មតិលើជម្លោះតំបន់ព្រំដែនកម្ពុជា-ថៃ របស់ខ្លួន គឺដើម្បីស្វែងយល់អំពីមតិសាធារណៈ និងការយល់ឃើញរបស់ ប្រជាជនកម្ពុជា ជាពិសេសចំពោះចំណាត់ការរបស់រដ្ឋាភិបាលកម្ពុជា ក្នុងការដោះស្រាយជម្លោះ តំបន់ព្រំដែនជាមួយភាគីថៃ។

ការស្ទង់មតិនេះ បានធ្វើការប្រមូលទិន្នន័យបឋមតាមរយៈប្រព័ន្ធអនឡាញ និងសម្ភាសន៍ដោយផ្ទាល់ជាមួយប្រជាជនចំនួន ១.៥៨៨ នាក់ ក្នុងនោះមាន យុវជន វ័យកណ្តាល និងវ័យ​ចំណាស់ មកពីមជ្ឈដ្ឋានផ្សេងៗគ្នា រួមមានពលករក្នុង និងក្រៅស្រុក បុគ្គលិកឯកជន មន្ត្រីរាជការ និស្សិត ក្រុមផ្សេងៗ និងអាជីវករ ដែលជាលទ្ធផល ៩៣,៦% ពេញចិត្តចំពោះចំណាត់ការទូទៅរបស់ រដ្ឋាភិបាលកម្ពុជាក្នុងការដោះស្រាយជម្លោះព្រំដែនកម្ពុជា-ថៃ ៩៩,៨% គាំទ្រដល់រដ្ឋាភិបាលក្នុងការដោះស្រាយជម្លោះព្រំដែននៅតំបន់ មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី តាមយន្តការតុលាការយុត្តិធម៌អន្តរជាតិ (ICJ)។ ក្នុងនោះដែរ ប្រជាជនបានផ្តល់តម្លៃលើការចរចាទ្វេភាគី ២៩,៣% ដរាបណាមានការតភ្ជាប់ជាមួយតុលាការ ICJ ហើយមនុស្សប្រមាណ ១,១% មានជំនឿលើការប្រើប្រាស់យន្តការទ្វេភាគីដែលមានស្រាប់តែមួយមុខ ហើយប្រមាណ ០,២% បានជ្រើសរើសមាគ៌ាសង្គ្រាម។

តាមរយៈការស្ទាបស្ទង់មតិនេះ វិទ្យាស្ថានចក្ខុវិស័យអាស៊ី បានធ្វើការសន្និដ្ឋានថា រដ្ឋាភិបាលកម្ពុជាជាប្រទេសឯករាជ្យ អធិបតេយ្យ មានភាពម្ចាស់ការ និងមានបទពិសោធន៍ចាស់ទុំផ្នែក នយោបាយ មានយុទ្ធសាស្ត្រគ្រប់ជ្រុងជ្រោយស៊ីជម្រៅ និងវែងឆ្ងាយក្នុងការដោះស្រាយជម្លោះតំបន់ព្រំ ដែនជាមួយថៃ៕