អត្ថបទ៖ កែវ រតនៈ

អគ្គលេខាធិការដ្ឋាន នៃគណៈកម្មាធិការជាតិ សន្តិសុខលម្ហសមុទ្របានឱ្យដឹងថា នៅវេលាម៉ោង ០៩ និង  ០០នាទី ថ្ងៃទី ២៨ ខែមេសា ឆ្នាំ២០២៥នេះ នាវាចំបាំងកងទ័ពជើងទឹក សហព័ន្ធរុស្ស៊ី ចំនួន ៣ គ្រឿង ដឹក​​នាំ​​ដោយលោក វរនាវីឯក ALEKSEI ANTSIFEROV នាយសេនាធិការ នៃផ្នែកនាវានៅលើផ្ទៃទឹក កងនាវាប៉ាស៊ីហ្វិកនៃសហព័ន្ធរុស្ស៊ី ជាប្រធានប្រតិភូ ដឹកនាំកងនាវាសហព័ន្ធរុស្ស៊ី ចំនួន ៣ គ្រឿង មាននាវិកសរុបចំនួន ២៦២ នាក់ បានចូលសំចតនៅកំពង់ផែស្វយ័តក្រុងព្រះសីហនុ និងធ្វើទស្សនកិច្ចនៅកម្ពុជា រយៈពេល ៤ ថ្ងៃចាប់ពីថ្ងៃទី ២៨ ខែមេសា ដល់ ថ្ងៃទី១ ខែឧសភា ឆ្នាំ២០២៥ ក្នុងនោះគណៈប្រតិភូនាវាអញ្ជើញចូលជួបសំដែង​​ការគួរសមជាមួយ ឯកឧត្តម អភិបាល នៃគណៈអភិបាលខេត្តព្រះសីហនុ

ឯកឧត្តម មេបញ្ជាការមូលដ្ឋានសមុទ្ររាម ឯកឧត្តម មេបញ្ជាការកងទ័ពជើងទឹក នៃកងយុទ្ធពលខេមរភូមិន្ទ និងមានការលេងកីឡាជាមិត្តភាព បាល់ទះ បាល់ទាត់ រវាងនាវិកកងទ័ពជើងទឹកសហព័ន្ធរុស្ស៊ី ជាមួយនាវិក​​កងទ័ពជើងទឹកមូលដ្ឋានសមុទ្ររាម។

អគ្គលេខាធិការដ្ឋាន នៃគណៈកម្មាធិការជាតិ សន្តិសុខលម្ហសមុទ្រឱ្យដឹងទៀតថា លក្ខណៈបច្ចេកទេសនាវាទាំង៣រួមមាន៖ នាវាទីមួយឈ្មោះ REZKIY លេខ 343 មានទម្ងន់ផ្ទុក២,២៥០ តោន បណ្ដោយ១០៤,៥ ម៉ែត្រ ទទឹង ១៣ ម៉ែត្រ ជម្រៅទឹក៧,៩៥ ម៉ែត្រ មាននាវឹកសរុបចំនួន ១០០ នាក់ មេបញ្ជាការនាវា គឺលោក វរនាវីឯក Evgenii KOVA LEV។ នាវាទីពីរឈ្មោះ HERO លេខ 339 ទម្ងន់ផ្ទុក ២,២៥០ តោន បណ្ដោយ ១០៤,៥ ម៉ែត្រ ទទឹង ១៣ ម៉ែត្រ ជម្រៅទឹក ៧,៩៥ ម៉ែត្រ មាននាវឹកសរុបចំនួន១០០នាក់ មេបញ្ជាការនាវា គឺលោកវរនាវីឯក DMITRII GUNKO។ និងនាវាទីបីឈ្មោះ PECHENGA  មានទម្ងន់ផ្ទុក១២,៨៩១ តោន បណ្ដោយ១៣០ម៉ែត្រ ទទឹង២០ ម៉ែត្រ ជម្រៅទឹក៧,២ម៉ែត្រ មាននាវឹកសរុបចំនួន ៦២ នាក់ មេបញ្ជាការនាវា គឺលោក GONCHAR Aleksandr៕