ដោយ៖សំនៀង

ប្រជាពលរដ្ឋរងគ្រោះក្នុងគម្រោងដីឡូត៍ និងផ្ទះល្វែងផ្លូវជាតិលេខ៦A របស់ក្រុមហ៊ុន​លោក​ឧកញ៉ា ឡេង ណាវ៉ាត្រា ប្រមាណជាង១០០នាក់ បានមកប្រមូលផ្តុំគ្នាធ្វើកូដកម្មដោយលើក​បដា និងបិទផ្លូវនៅចំណុចខាងមុខក្រសួងដែនដី នៅព្រឹកថ្ងៃទី១៥ ខែមករា ឆ្នាំ២០២៦ ម៉ោង​៩:០០នាទីព្រឹក នៅចំនុចក្រសួងដែនដីនគរូបនីយកម្ម និងសំណង់ មានទីតាំង​ស្ថិតនៅ​ផ្លូវ​រុក្ខ​វិថីអង្គរ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

ហេតុការធ្វើកូដកម្ម និងបិទផ្លូវពីសំណាក់ប្រជាពលរដ្ឋរងគ្រោះនេះធ្វើឡើងក្នុងគោលបំណង​ស្នើសុំឱ្យរដ្ឋមន្ត្រីក្រសួងដែនដីជួយពន្លឿនការដោះស្រាយជូនពួកគាត់ និងទាមទារឱ្យ​ឈ្មោះ​ឡេង ណាវ៉ាត្រា​ ម្ចាស់បុរីកំណត់ពេលវេលាច្បាស់លាស់ជាលាយលក្ខណ៍អក្សរ ទៅលើលក្ខ​ខណ្ឌចំនួន៥ចំណុច ដោយទី១ ចាប់ផ្ដើមការបុកគ្រឹះ ទី២ចាប់ផ្ដើមការសាងសង់ ទី៣បញ្ចប់​ការសាងសង់ទាំងមូលនៅក្នុងប្លុកC E1RA ក្នុងឆ្នាំ ២០២៦ ជាកំហិត ទី៤ប្រគល់ផ្ទះជូន អតិថិជន ប្លុកC E1RA ក្នុងឆ្នាំ ២០២៦ ជាកំហិត និងទី៥ សងលុយជូនដល់ពួកគាត់វិញ៕