អត្ថបទ៖ កែវ រតនៈ

យោងតាមទំព័រហ្វេសប៊ុកផ្លូវការរបស់ក្រសួងបរិស្ថានបានឱ្យដឹងថា ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន នៅថ្ងៃទី១៩ ខែវិច្ឆិកា ឆ្នាំ២០២៤នេះ បានថ្លែងសន្ទរកថា ក្នុងវេទិកាក្នុងក្របខណ្ឌនៃសន្និសីទកំពូលលើកទី២៩ បណ្តា​​​​​រដ្ឋភាគីនៃអនុសញ្ញាក្របខណ្ឌសហប្រជាជាតិ ស្តីពីការប្រែប្រួលអាកាសធាតុ (COP) នាទីក្រុងបាគូ ប្រទេសអាស៊ែបៃហ្សង់ ។

ឯកឧត្តមបានមានប្រសាសន៍ថា កម្ពុជាបាននិងកំពុងពង្រីកការផ្លាស់ប្តូរប្រព័ន្ធអាហារ តាមរយៈការផ្តល់អាទិភាពដល់វិស័យកសិកម្ម ធានាសន្តិសុខស្បៀង និងការលើកកម្ពស់ការអភិវឌ្ឍសេដ្ឋកិច្ចជនបទ។

ឯកឧត្តមបណ្ឌិត អ៊ាង សុផល្លែត ក៏បានលើកឡើងពីវឌ្ឍនភាពជាមួយគោលនយោបាយ និងយុទ្ធសាស្ត្រ ក្នុងនាមជាសមា​​ជិក​​ហត្ថលេខី និងជាស្ថាបនិកឈានមុខមួយសម្រាប់ការផ្លាស់ប្តូរប្រព័ន្ធស្បៀង កម្ពុជាប្តេជ្ញាជំរុញការផ្លាស់ប្តូរជាប្រព័ន្ធ ដើម្បីផ្តល់លទ្ធផលល្អប្រសើរសម្រាប់មនុស្ស ធម្មជាតិ និងអាកាសធាតុ។

ឯកឧត្តមរដ្ឋមន្ត្រីបានឱ្យដឹងថា បច្ចុប្បន្នកម្ពុជាកំពុងធ្វើសមាហរណកម្មតំបន់សកម្មភាពអាទិភាពទាំង១០ របស់ ACF ទៅក្នុងយុទ្ធសាស្ត្រជាតិសម្រាប់សន្តិសុខស្បៀង និងអាហារូបត្ថម្ភឆ្នាំ២០២៤-២០២៨ ហើយកំពុងស្ថិតក្នុងដំណើរការធ្វើបច្ចុប្បន្នភាពផែនទីផ្លូវសម្រាប់ប្រព័ន្ធស្បៀងអាហារសម្រាប់ការអភិវឌ្ឍប្រកបដោយចីរភាពឆ្នាំ២០៣០។

នៅចំពោះមុខថ្នាក់ដឹកនាំក្រសួងបរិស្ថាន រួមជាមួយដៃគូមកពីបណ្តាប្រទេសនានា, ឯកឧត្តមបណ្ឌិត អ៊ាង សុផល្លែត បានឱ្យដឹងថា យុទ្ធសាស្ត្របញ្ចកោណដំណាក់កាលទី១ យុទ្ធសាស្ត្រចក្រាវិស័យបរិស្ថាន យុទ្ធសាស្ត្រ និងផែនការសកម្មភាពអភិរក្សជីវៈចម្រុះ​​ជាតិ និងគោលនយោបាយ ពាក់ព័ន្ធផ្សេងទៀត អនុវត្តគោលការណ៍ដូចគ្នា ធម្មជាតិ និងបរិស្ថាន គឺជាមូលដ្ឋានគ្រឹះនៃជីវភាពរស់នៅរបស់កម្ពុជា គាំទ្រដល់ផលិតកម្មស្បៀង សន្តិសុខស្បៀង វិបុលភាពសេដ្ឋកិច្ច និងសន្តិសុខ។ ក៏ដូចជាកំណើនបៃតង។

ឯកឧត្តមរដ្ឋមន្ត្រីបានថ្លែងថា ប្រទេសកម្ពុជា បានអនុវត្តវិធានការបន្ស៊ាំ និងកាត់បន្ថយផ្សេងៗ តាមរយៈគោលនយោបាយ និងយុទ្ធសាស្ត្រសំខាន់ៗនៃការប្រែប្រួលអាកាសធាតុ។កម្ពុជាបានចូលរួមយ៉ាងសកម្មក្នុងកិច្ចព្រមព្រៀងបម្រែបម្រួលអាកាសធាតុអន្តរជាតិ និងបំពេញការប្តេជ្ញាចិត្តនៃកិច្ចព្រមព្រៀងទីក្រុងប៉ារីស៕