ដោយ៖ វិចិត្រ

ក្រសួងធនធានទឹក និងឧតុនិយម បានអំពាវនាវឱ្យប្រជាពលរដ្ឋបង្កើនការប្រុងប្រយ័ត្ន​ចំពោះ​បាតុភូតភ្លៀង ផ្គររន្ទះ និងខ្យល់កន្ត្រាក់ ដែលអាចកើតមាននៅទូទាំងប្រទេស ចាប់ពីថ្ងៃទី៣ ដល់ថ្ងៃទី១២ ខែកក្កដា ឆ្នាំ២០២៦ ដោយសារឥទ្ធិពលប្រយោលនៃព្យុះទី១០ ឈ្មោះ ម៉ៃស័ក (Maysak) T2610 និងការបង្កើនឥទ្ធិពលរបស់ខ្យល់មូសុងនិរតី។

តាមសេចក្តីជូនដំណឹងចុះថ្ងៃទី៣ ខែកក្កដា របស់ក្រសួងបានឱ្យដឹងថា  សម្ពាធទាបដែល​កើត​មាន​នៅ​លើ​មហា​សមុទ្រប៉ាស៊ី​ហ្វិក​​ខាងលិច បានវិវត្តទៅជាព្យុះទី១០ ឈ្មោះ «ម៉ៃស័ក» ដែល​មា​ន​ឥទ្ធិពលលើរបបខ្យល់មូសុង​និរតី​​បក់គ្របដណ្តប់លើឈូងសមុទ្របេងហ្គាល សមុទ្រអាន់​ដាម៉ាន់ សមុទ្រចិនខាងត្បូង អាងទន្លេ​មេគង្គ សមុទ្រកម្ពុជា និងព្រះរាជាណាចក្រកម្ពុជា។ ទោះជាយ៉ាងណា កម្ពុជាពុំស្ថិត​នៅក្នុង​គន្លង​ផ្លូវដើររបស់ព្យុះនេះឡើយ។

ក្រសួងបានបញ្ជាក់ថា ឈ្មោះព្យុះ «ម៉ៃស័ក» ជាឈ្មោះដែលកម្ពុជាបានដាក់ ហើយព្យុះនេះត្រូវ​បានព្យា​ករថា​នឹងរលាយបាត់នៅថ្ងៃទី៦ ខែកក្កដា ឆ្នាំ២០២៦។ ចំណែកព្យុះទី៩ ឈ្មោះ «បាវី (Bavi) T2609» នឹងបន្តមានឥទ្ធិពលរហូតដល់ថ្ងៃទី១២ ខែកក្កដា ឆ្នាំ២០២៦។

តាមការព្យាករ តំបន់វាលទំនាបអាចមានភ្លៀងធ្លាក់ លាយឡំដោយផ្គររន្ទះ និងខ្យល់កន្ត្រាក់​គ្រប​ដណ្តប់ប្រមាណ ៥០ភាគរយនៃផ្ទៃដី ខណៈតំបន់ខ្ពង់រាបអាចមានភ្លៀងគ្រប​ដណ្តប់​ប្រមា​ណ ៦០ភាគរយ។ ដោយឡែក តំបន់មាត់សមុទ្រត្រូវបានព្យាករថានឹងមានភ្លៀងធ្លាក់​ច្រើន​ជាង​គេ ដោយគ្របដណ្តប់ប្រមាណ ៧០ភាគរយនៃផ្ទៃដី អមដោយខ្យល់កន្ត្រាក់ ផ្គររន្ទះ និងរលក​សមុទ្រ​ខ្ពស់ចន្លោះពី ០,៥០ ម៉ែត្រ ដល់ ១,៧៥ ម៉ែត្រ។

ក្រសួងធនធានទឹក និងឧតុនិយម អំពាវនាវឱ្យប្រជាពលរដ្ឋ ជាពិសេសអ្នកធ្វើដំណើរតាម​ផ្លូវ​គោក និងផ្លូវទឹក បង្កើនការប្រុងប្រយ័ត្នខ្ពស់ ដើម្បីបង្ការគ្រោះថ្នាក់ដែលអាចបណ្តាលមកពី​បាតុ​​ភូតអាកាសធាតុខាងលើ។

ជាមួយគ្នានេះ ក្រសួងនឹងបន្តតាមដាន និងវិភាគស្ថានភាពធាតុអាកាសជាបន្តបន្ទាប់ ហើយ​នឹង​ជូន​ដំណឹង​បន្ថែម​ប្រសិនបើមានការប្រែប្រួល៕