ដោយ៖ វិចិត្រ

ក្រសួងធនធានទឹក និងឧតុនិយម បានឱ្យដឹងថា សម្ពាធទាបដែលកើតមាននៅលើមហា​សមុទ្រ​​ប៉ាស៊ីហ្វិកខាងលិច បានវិវត្តទៅជាព្យុះទី៩ ឈ្មោះបាវី (Bavi) T2609 ដែលកំពុង​មាន​ឥទ្ធិ​ពលលើរបបខ្យល់មូសុងនិរតី បក់គ្របដណ្តប់លើឈូងសមុទ្របេងហ្គាល សមុទ្រអាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រកម្ពុជា និងព្រះរាជាណាចក្រកម្ពុជា។

ទោះជាយ៉ាងណា កម្ពុជាមិនស្ថិតនៅក្នុងគន្លងផ្លូវដើររបស់ព្យុះបាវី នោះទេ ប៉ុន្តែនឹងរង​ឥទ្ធិ​ពល​ប្រយោលពីប្រព័ន្ធខ្យល់មូសុងនិរតី ដែលបង្កើនលទ្ធភាពកើតមានភ្លៀងធ្លាក់ លាយឡំជាមួយ​ខ្យល់​កន្ត្រាក់ និងផ្គររន្ទះ នៅតំបន់មួយចំនួនទូទាំងប្រទេស។

តាមការព្យាករ ចាប់ពីថ្ងៃទី៣ ដល់ថ្ងៃទី៥ ខែកក្កដា ឆ្នាំ២០២៦ តំបន់វាលទំនាប​នឹង​មាន​សីតុណ្ហ​ភាព​​ចន្លោះពី ២៥ ដល់ ៣៦អង្សាសេ ដោយខេត្តបន្ទាយមានជ័យ បាត់ដំបង ពោធិ៍សាត់ សៀម​រាប កំពង់ឆ្នាំង កំពង់ធំ កំពង់ចាម ត្បូងឃ្មុំ ស្វាយរៀង ព្រៃវែង តាកែវ កណ្តាល និងរាជធានី​ភ្នំពេញ អាចមានភ្លៀងធ្លាក់គ្របដណ្តប់ប្រមាណ ៦០ភាគរយនៃផ្ទៃដី។

សម្រាប់តំបន់ខ្ពង់រាប សីតុណ្ហភាពស្ថិតនៅចន្លោះពី ២៤ ដល់ ៣៥អង្សាសេ ខណៈខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និង​តំបន់​ជួរភ្នំ​ក្រវាញ អាចមានភ្លៀងធ្លាក់ជាមួយខ្យល់កន្ត្រាក់ និងផ្គរ រន្ទះ គ្របដណ្តប់ប្រមាណ៥០​ភាគរយ​នៃផ្ទៃដី។

ចំណែកតំបន់មាត់សមុទ្រ រួមមានខេត្តកោះកុង ព្រះសីហនុ កំពត កែប និងតំបន់ជួរភ្នំបូកគោ នឹងមានសីតុណ្ហភាពចន្លោះពី ២៥ ដល់ ៣៥អង្សាសេ និងអាចមានភ្លៀងធ្លាក់គ្របដណ្តប់​ប្រមា​ណ ៥០ភាគរយនៃផ្ទៃដី។ រីឯរលកសមុទ្រ មានកម្ពស់ជាមធ្យមពី ០,៥០ម៉ែត្រ ដល់ ១,៥០ម៉ែត្រ​។​

ជាមួយគ្នានេះ ក្រសួងធនធានទឹក និងឧតុនិយម បានអំពាវនាវឱ្យប្រជាពលរដ្ឋ បង្កើនការ​ប្រុង​ប្រយ័ត្ន​​ចំពោះ​ភ្លៀង ផ្គររន្ទះ និងខ្យល់កន្ត្រាក់ ដែលអាចកើតមានក្នុងអំឡុងពេលខាងមុខ៕