ក្រសួងធនធានទឹក និងឧតុនិយម បានឱ្យដឹងថា សម្ពាធទាបនៅលើមហាសមុទ្រប៉ាស៊ីហ្វិក​ខាង​លិច បានវិវត្តទៅជាព្យុះទី៨ ឈ្មោះ ហ៊ីហ្គោស (Higos) T2608 ខណៈព្យុះទី៧ ឈ្មោះ មេខឡា (Mekkhala) T2607 បានបង្កើនឥទ្ធិពលទៅជាព្យុះសង្ឃរា ដែលជះឥទ្ធិពលដល់​របប​ខ្យល់​មូសុងនិរតីនៅក្នុងតំបន់។

យោងតាមព្រឹត្តិបត្រព័ត៌មានស្តីពីស្ថានភាពធាតុអាកាស ព្យុះទាំងពីរនេះកំពុងមានឥទ្ធិពល​លើ​ឈូង​សមុទ្របេងហ្គាល សមុទ្រអាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រ​កម្ពុ​ជា និងតំបន់មួយចំនួនក្នុងប្រទេសកម្ពុជា ។ ទោះជាយ៉ាងណា កម្ពុជាមិនស្ថិតនៅក្នុងគន្លង​ផ្លូវ​ដើរ​ផ្ទាល់របស់ព្យុះទាំងពីរនេះឡើយ។

ក្រសួងបានបញ្ជាក់ថា ចាប់ពីថ្ងៃទី២៤ ដល់ថ្ងៃទី២៦ ខែមិថុនា ឆ្នាំ២០២៦ ស្ថានភាពអាកាស​ធាតុ​នៅកម្ពុជា នឹងបន្តទទួលឥទ្ធិពលពីខ្យល់មូសុងនិរតី ដែលអាចបង្កឱ្យមានភ្លៀងធ្លាក់រាយ​ប៉ាយ អមដោយផ្គររន្ទះ និងខ្យល់កន្ត្រាក់នៅតាមតំបន់មួយចំនួន។

នៅតំបន់វាលទំនាប សីតុណ្ហភាពអប្បបរមាជាមធ្យមស្ថិតនៅ ២៦អង្សាសេ និងអតិបរមា ៣៦​អង្សា​សេ ខណៈខ្យល់បក់ពីទិសនិរតី និងអាគ្នេយ៍ក្នុងល្បឿនប្រមាណ ៣ម៉ែត្រក្នុង​មួយ​វិនាទី។ ខេត្តបន្ទាយមានជ័យ សៀមរាប កំពង់ឆ្នាំង កំពង់ធំ កំពង់ចាម ត្បូងឃ្មុំ ស្វាយរៀង តាកែវ កណ្តាល និងរាជធានីភ្នំពេញ អាចមានភ្លៀងធ្លាក់គ្របដណ្តប់ប្រមាណ ២០ភាគរយនៃផ្ទៃដី។

សម្រាប់តំបន់ខ្ពង់រាប សីតុណ្ហភាពអប្បបរមាជាមធ្យម ២៤អង្សាសេ និងអតិបរមា ៣៥​អង្សា​សេ​។ ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ព្រមទាំង​តំបន់​ជួរភ្នំដងរែក និងជួរភ្នំក្រវាញ អាចមានភ្លៀង ផ្គររន្ទះ និងខ្យល់កន្ត្រាក់គ្របដណ្តប់ប្រមាណ ២៥ភាគរយនៃផ្ទៃដី។

ដោយឡែក តំបន់មាត់សមុទ្រ រួមមានខេត្តកោះកុង ព្រះសីហនុ កំពត កែប និងតំបន់ជួរ​ភ្នំបូក​គោ អាចមានភ្លៀងធ្លាក់ក្នុងកម្រិតខ្ពស់ជាងគេ ដោយគ្របដណ្តប់ប្រមាណ ៣៥ភាគរយនៃ​ផ្ទៃដី​។ តំបន់នេះនឹងមានសីតុណ្ហភាពចន្លោះពី ២៥ ទៅ ៣៥អង្សាសេ និងខ្យល់បក់ក្នុងល្បឿន​មធ្យ​ម ២ម៉ែត្រក្នុងមួយវិនាទី។

ជាមួយគ្នានេះ កម្ពស់រលកសមុទ្រត្រូវបានព្យាករថា នឹងស្ថិតនៅចន្លោះពី ០,៥០ម៉ែត្រ ដល់ ១,៥០ម៉ែត្រ៕