ដោយ៖ សំនៀង

ម្ចាស់ក្រុមហ៊ុន រោងចក្រ សហគ្រាស ឬ អ្នកតំណាងប្រមាណជា ៦០នាក់ មកពីទីតាំងផ្សេងគ្នា បានចូល រួមក្នុងពិធីផ្សព្វផ្សាយស្តីពី គោលការណ៍ បទប្បញ្ញត្តិច្បាប់ និងអត្ថប្រយោជន៍របបសន្តិសុខសង្គម  នៅទីតាំងបេឡាជាតិសន្តិសុខសង្គមសាខាខណ្ឌដង្កោ នាថ្ងៃទី២៤ ខែមីនា ឆ្នាំ២០២៦។

ថ្លែងក្នុងឱកាសបើកពិធីផ្សព្វផ្សាយនេះ លោកស្រី សយ សុភា ប្រធានសាខា ប.ស.ស.ខណ្ឌដង្កោ បានគូស​បញ្ជាក់ថា ពិធីផ្សព្វផ្សាយនេះ ជាសកម្មភាពដ៏សំខាន់ ក្នុងគោលបំណងពង្រឹងកិច្ចសហប្រតិបត្តិការរវាង ប.ស.ស. និងតំណាងក្រុមហ៊ុន រោងចក្រ សហគ្រាស ឱ្យកាន់តែមានភាពជិតស្និទ្ធ ព្រមទាំងផ្សព្វផ្សាយ​នូវ​វឌ្ឍនភាព និងព័ត៌មានសំខាន់ៗ អំពីបច្ចុប្បន្នភាពបទប្បញ្ញត្តិនៃការអនុវត្តរបបសន្ដិសុខសង្គម​ជាពិសេស​ការធ្វើទំនើបកម្មប្រព័ន្ធឌីជីថលថ្មីៗ របស់ ប.ស.ស. ដែលកំពុងប្រើប្រាស់ផងដែរ។

លោកស្រី បានក្រើនរំលឹកដលដល់ ម្ចាស់ក្រុមហ៊ុន រោងចក្រ សហគ្រាស ឱ្យចូលរួមបំពេញកាតព្វកិច្ចចុះ​បញ្ជី សហគ្រាស និងកម្មករនិយោជិត ព្រមទាំងបង់ភាគទានមក ប.ស.ស. ឱ្យបានត្រឹមត្រូវ ព្រោះជាកាតព្វ​កិច្ច ស្របតាមច្បាប់ ដើម្បីធានានូវការការពារផលប្រយោជន៍ និងសិទ្ធិរបស់កម្មករនិយោជិតរបស់ខ្លួន ប្រសិនបើ ម្ចាស់ក្រុមហ៊ុន រោងចក្រ សហគ្រាស ខកខានមិនបានចុះបញ្ជីស្របតាមច្បាប់ជាធរមាន នោះសហគ្រាស នឹងត្រូវប្រឈមមុខទទួលខុសត្រូវចំពោះមុខច្បាប់៕