ដោយ៖ វិចិត្រ

ភាពរងគ្រោះដោយគ្រោះថ្នាក់ចរាចរណ៍នៅតែជាបញ្ហាប្រឈម ដែលបានបង្កឱ្យមានអ្នកស្លាប់ និងរបួសជារៀងរាល់ថ្ងៃ លើសគ្រោះថ្នាក់សង្គមនានា ពិសេសបានកើនឡើងខ្ពស់ក្នុងឱកាស ដែលមានចរាចរណ៍មមាញឹកនាពិធីបុណ្យនានា ដែលបណ្តាលមកពីកង្វះស្មារតីគោរពច្បាប់ និងកង្វះការប្រុងប្រយ័ត្ន និងការយោគយល់អាធ្យាស្រ័យរបស់អ្នកប្រើប្រាស់ផ្លូវមួយចំនួន។ នេះបើតាមការលើកឡើងនៅក្នុង​លិខិត​អំពាវនាវ ស្តីពី ការទប់ស្កាត់គ្រោះថ្នាក់ចរាចរណ៍ផ្លូវ គោក របស់គណៈកម្មាធិការជាតិសុវត្ថិភាពចរាចរណ៍ផ្លូវគោក នៅថ្ងៃទី១៣ ខែកុម្ភៈ ឆ្នាំ ២០២៦។

ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោកក្នុងឱកាសពិធីបុណ្យចូលឆ្នាំចិន វៀត ណាម ខាងមុខនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានធ្វើការអំពាវនាវ ដល់សាធារណជនជាអ្នកប្រើប្រាស់ផ្លូវ ត្រូវបើកបរ ដោយគោរពច្បាប់ស្តីពីចរាចរណ៍ផ្លូវគោក ដែលក្នុងនោះរួមមាន ១-កុំបើកបរលើសល្បឿនកំណត់។ ត្រូវបន្ថយល្បឿននៅទីកន្លែងប្រជុំ ជន ផ្សារ សាលារៀន វត្តអារាម។ ២-មិនត្រូវបើកបរក្រោមឥទ្ធិពលនៃគ្រឿងស្រវឹង ឬគ្រឿង ញៀន។ ៣-ត្រូវគោរពសិទ្ធិអាទិភាព គោរពភ្លើងសញ្ញា ផ្លាកសញ្ញា និងសញ្ញាបញ្ជារបស់មន្ត្រី នគរបាលចរាចរណ៍ផ្លូវគោក។ ៤-ត្រូវបើកបរក្នុងគន្លងផ្លូវដែលកំណត់ដោយច្បាប់ស្តីពី ចរាចរណ៍ផ្លូវគោក និងមិនត្រូវបើកបរជាន់លើគំនូសសញ្ញាបែងចែកគន្លងផ្លូវ។ ៥-ត្រូវបើកបរ តាមទិសចរាចរណ៍ នៅផ្លូវឯកទិស ដោយមិនត្រូវបើកបរបញ្ច្រាស់ទិសចរាចរណ៍។ ៦-ត្រូវពិនិត្យមើលលក្ខណបច្ចេកទេសយានយន្ត ជាពិសេសសំបកកង់ ហ្វាំង ភ្លើងបំភ្លឺ និងចង្កូត មុននឹងចេញដំណើរ។ ៧-ត្រូវពាក់មួកសុវត្ថិភាពពេលធ្វើដំណើរតាមទោចក្រយានយន្ត និងពាក់ខ្សែក្រវាត់សុវត្ថិភាព ពេលធ្វើដំណើរ តាមរថយន្ត។

ក្នុងនោះគណៈកម្មាធិការជាតិសុវត្ថិភាពចរាចរណ៍ផ្លូវគោក ក៏បានសំដែងនូវក្តីសង្ឃឹមជឿជាក់ លើអ្នកប្រើប្រាស់ផ្លូវគ្រប់រូបនឹងចូលរួមគោរពអនុវត្តច្បាប់ស្តីពីចរាចរណ៍ផ្លូវគោក ក៏ដូចជា អនុ វត្តតាមសេចក្តីអំពាវនាវនេះ ដើម្បីនាំមកនូវសុវត្ថិភាព និងសេចក្តីសុខក្សេមក្សាន្ត ក្នុងឱកាស ពិធីបុណ្យចូលឆ្នាំចិន វៀតណាម ខាងមុខនេះ។

នៅក្នុងឆ្នាំ២០២៥ គ្រោះថ្នាក់ចរាចរណ៍នៅទាំងប្រទេស បានកើតឡើងចំនួន ២៣៤៥លើក ដែលបណ្តាលឱ្យមានអ្នកស្លាប់ចំនួន ១៤៦៧នាក់ និងអ្នករងរបួសធ្ងន់ស្រាលចំនួន ៣២១១ នាក់។ សម្រាប់ក្នុងខែមករា ដើមឆ្នាំ២០២៦ ធៀបនឹងខែមករា ឆ្នាំ២០២៥ គ្រោះ​ថ្នាក់ចរាចរណ៍ កើន៤២លើក ស្មើ១៩% អ្នកស្លាប់កើន​២៥ នាក់ ស្មើ១៨% និងអ្នករបួស​កើន​៦៤​នាក់ ស្មើ២៣%៕