អត្ថបទ៖សំនៀង

វេទិកាប្រចាំឆ្នាំថ្នាក់ជាតិរវាងបេឡាជាតិសន្តិសុខសង្គម ជាមួយថ្នាក់ដឹកនាំសហគមន៍ និងតំណាងកម្មករនិយោជិត ឆ្នាំ២០២៤នេះ គឺរៀបចំឡើងក្រោមមូលបទ ៖ «គាំពារសង្គមសម្រាប់ទាំងអស់គា្ន ដើម្បីអន្តរកាលប្រកបដោយយុត្តិធម៌នៅកម្ពុជា"។ វេទិកានេះមានគោលបំណងធំៗ ដូចខាងក្រោម ៖ក). ពង្រឹងគណនេយ្យភាពសង្គម ក្នុងប្រព័ន្ធគាំពារសង្គមកម្ពុជាតាមរយៈកិច្ចសន្ទនាសង្គម រវាងថ្នាក់ដឹកនាំសហគមន៍ និងតំណាងកម្មករនិយោជិត ជាមួយនិយតករនិងប្រតិបត្តិករ នៃរបបសន្តិសុខសង្គម ស្ដីពីវឌ្ឍនភាព បញ្ហាប្រឈម និងផែនការរបស់បេឡាជាតិសន្តិ- សុខសង្គម ដើម្បីធានា គាំពារសង្គមសម្រាប់ទាំងអស់គ្នា ដើម្បីអន្តរ​កាលប្រកបដោយ យុត្តិធម៌ នៅកម្ពុជា។ ខ). ស្វែងយល់ពីការយល់ឃើញ បញ្ហាប្រឈម និងសំណើនានា របស់ថ្នាក់ដឹកនាំសហគមន៍ និងតំណាងកម្មករនិយោជិត ស្ដីពីរបប និងអត្ថប្រយោជន៍នៃរបបសន្តិសុខសង្គម ដើម្បីឆ្លើយតបទៅនឹងអន្តរកាលប្រកបដោយយុត្តិធម៌។ គ). ពង្រឹងកិច្ចសហការគ្នា និងកិច្ចសន្ទនាសង្គម រវាងនិយតករ និងប្រតិបត្តិករ នៃរបបសន្តិសុខ សង្គម ជាមួយថ្នាក់ដឹកនាំសហគមន៍ និងតំណាងកម្មករ​និយោជិត ដើម្បីស្តាប់កង្វល់ សំណើ និងចងក្រងធាតុចូលនានា ដែលជាឧត្តមប្រយោជន៍ដល់ការតាក់តែងគោលនយោបាយ ក្នុងន័យធានាគាំពារសង្គមសម្រាប់ទាំងអស់គ្នា ដើម្បីអន្តរកាលប្រកបដោយយុត្តិធម៌នៅកម្ពុជា។

វេទិកានេះ គឺត្រូវបានរៀបចំឡើងជាប់ៗគ្នារយៈពេល២ឆ្នាំមកហើយ ក្រោមការដឹកនាំរបស់ បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ ដោយសហការជាមួយអង្គការ OXFAM និងអង្គការសង្គមស៊ីវិល និងសហជីព។ វេទិកានេះ ក៏ជាការបិទបញ្ចប់យុទ្ធនាការ និងកិច្ចសន្ទនា សង្គមប្រចាំឆ្នាំ២០២៤​​ផង​​ដែរ និងដើម្បីរួមគ្នាពិនិត្យលើបញ្ហាប្រឈម និងសំណូមពរនានា ដែលប្រមូល បានពីវេទិកាថ្នាក់តំបន់ ដែល​រៀបចំនៅ៣ភូមិសាស្ត្រប៉ូលសេដ្ឋកិច្ចសំខាន់ៗរបស់កម្ពុជា មានដូចជា ខេត្តព្រះសីហនុ ខេត្តសៀមរាប និងខេត្តស្វាយរៀង។

លោក តាន់ វិសាល តំណាងអង្គការ OXFAM បានលើកឡើងក្នុងវេទិកាប្រចាំលើកទី៤ ដែលប្រារព្ធធ្វើនៅថ្ងៃទី២៦ ខែវិច្ឆិកានេះថា ក្នុងឆ្នាំ២០២៤នេះ អង្គការអុកស្វាមបានរៀបចំវេទិការនេះចំនួន៣លើករួចមកហើយដោយថ្ងៃនេះដែរគឺជាការបិទបញ្ចប់នៃវេទិកានេះដែលបានធ្វើឡើងនៅរាជធានីភ្នំពេញ ដោយមានការចូលរួមពីស្ថាប័នពាក់ព័ន្ធនានា។ លោកឱ្យដឹងថា តាមការពិភាក្សាថ្នាក់តំបន់ចំនួន៣លើកកន្លងទៅនេះ ឃើញថាអង្គការ OXFAM ក៏ទទួលបាននូវបញ្ហាប្រឈម ក្ដីកង្វល់នានាពីអ្នកចូលរួមដែលជាកសិករ កម្មករ ទៅលើការអនុវត្តគោលនយោបាយ និងសេវាគាំពារសង្គមផងដែរ។ លោកបានបន្ថែមថា អង្គការ OXFAM នៅតែបន្តសកម្មភាពការងារជាមួយស្ថាប័នពាក់ព័ន្ធ ជាពិសេសជាមួយនឹងបេឡាជាតិសន្តិសុខសង្គម ដើម្បីធានាថាប្រជាពលរដ្ឋនឹងរងផលប៉ះពាល់តិចតួចនៃសង្គម ដើម្បីឈានទៅរកការបង្កើតការងារសមរម្យ លុបបំបាត់ភាពក្រីក្រ និងការពារមនុស្សពីហានិភ័យ ប្រកបដោយយុត្តិធម៌មានន័យថាមនុស្សគ្រប់រូប ជាពិសេសសហគមន៍ដែលងាយរងគ្រោះអាចទទួលបានអត្ថប្រយោជន៍ ឆ្ពោះទៅកាន់សេដ្ឋកិច្ចប្រកបដោយនិរន្តរភាព ដែលសង្កត់ធ្ងន់ទៅលើមូលដ្ឋានគ្រឹះនៃប្រព័ន្ធគាំពារសង្គម និងការកសាងសហគមន៍ដែលមានភាពធន ដោយមិនទុកនរណាម្នាក់ចោល។

ឯកឧត្តមបណ្ឌិត ហេង សុផាន់ណារិទ្ធ អគ្គនាយករង បេឡាជាតិសន្តិសុខសង្គម បានលើកឡើងថា តាងនាម ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្តាល វិជ្ជាជីវៈ និងឯកឧត្តមផ្ទាល់ ពិតជា រីករាយ ដោយ​​បានចូលរួមជាអធិបតីក្នុងវេទិកាប្រចាំឆ្នាំថ្នាក់ជាតិរវាងបេឡាជាតិសន្តិសុខសង្គម ជាមួយថ្នាក់ដឹកនាំ​សហគមន៍ និង តំណាងកម្មករនិយោជិត ដែលសហការរៀបចំដោយ បេឡាជាតិសន្តិសុខសង្គមនៃក្រសួង ការងារ និងបណ្ដុះបណ្តាលវិជ្ជាជីវៈ និងអង្គការ OXFAM នាពេលនេះ។ ឯកឧត្តមក៏បានថ្លែងអំណរគុណដល់អង្គការ OXFAM និងដៃគូអភិវឌ្ឍន៍ពាក់ព័ន្ធនានា ដែលបានសហការរៀបចំវេទិកាប្រចាំឆ្នាំថ្នាក់ជាតិនេះឡើង ដើម្បីគាំទ្រដល់ ប.ស.ស. នៃ ក្រសួងការងារ និបណ្តុះបណ្តាលវិជ្ជាជីវៈកន្លងមក និងសូមអរគុណដល់ ឯកឧត្តម លោកជំទាវ លោក លោកស្រី សមាជិក សមាជិកា នៃវេទិកាប្រចាំឆ្នាំថ្នាក់ជាតិទាំងមូល ដែលបានចំណាយពេលវេលាដ៏មានតម្លៃ អញ្ជើញចូលរួមក្នុងវេទិកាប្រចាំឆ្នាំថ្នាក់ជាតិដ៏មានសារសំខាន់នេះ ក្រោម មូលបទ គាំពារសង្គមសម្រាប់ទាំងអស់គ្នា ដើម្បីអន្តរកាលប្រកបដោយយុត្តិធម៌នៅកម្ពុជា។

ប្រព័ន្ធគាំពារសង្គមប្រកបដោយគណនេយ្យភាព និងបរិយាបន្ន គឺជាគោលដៅអាទិភាពមួយ របស់អង្គការOXFAM ដើម្បីចូលរួមចំណែកជាមួយរដ្ឋាភិបាលកម្ពុជា តាមរយៈក្រុមប្រឹក្សាជាតិគាំពារ សង្គម និងបេឡា​​ជាតិសន្តិសុខសង្គម និងមូលនិធិជាតិជំនួយសង្គម ក្នុងការពង្រីកវិសាលភាពគ្របដណ្ដប់ អត្ថប្រយោជន៍ និងដើម្បីពង្រឹងបរិយាបន្ន ក៏ដូចជាគណនេយ្យភាពសង្គមនៃប្រព័ន្ធគាំពារសង្គម អង្គការ OXFAM បានសហការជាមួយក្រសួងពាក់ព័ន្ធ និងអង្គការដៃគូអនុវត្តគម្រោងគាំពារសង្គមមួយចំនួនរួម មាន ៖ ១). គម្រោង “ការធ្វើឱ្យប្រសើរឡើងដល់ការគាំពារសង្គម និងសិទ្ធិការងារសម្រាប់កម្មករជាស្រ្ដីក្នុង ស័យកសិ-ស្បៀងអាហារ» ក្រោមមូលនិធិរាជរដ្ឋាភិបាលបែលហ្សិក (DGD) និង ២). គម្រោង “គាំពារ សង្គមប្រកបដោយបរិយាបន្នដែលឆ្លើយតបទៅនឹងតម្រូវការជាក់ស្ដែងរបស់កម្មករនិយោជិតក្នុងវិស័យ កាត់ដេរ» (INSPIRE) ក្រោមជំនួយរបស់មូលនិធិ Laudes Foundation និង KLUB៕