អត្ថបទ៖ កែវ រតនៈ

ក្នុងលិខិតបំភ្លឺដែលចេញដោយលោក​ មេធាវី ជ្រ គីមហេង មេធាវី តំណាង ឯកឧត្តម អ៊ាង សុផល្លែត រដ្ឋមន្ត្រី​​ក្រសួងបរិស្ថាន បាន​សរសេរថា នាពេលកន្លងមក មានការផ្សព្វផ្សាយព័ត៌មាន និងការអត្ថាធិប្បាយដោយ​​ចេតនាទុច្ចរិត បំផ្លើសពីការពិត គ្មាន​​មូលដ្ឋានច្បាស់លាស់ ព្រមទាំងញុះញង់ជាអវិជ្ជមាន តាមបណ្ដាញសង្គម និងបណ្ដាញផ្សព្វផ្សាយព័ត៌មាន ក្រៅច្បាប់ បង្កឡើង​​ដោយទណ្ឌិត អ៊ឹង លីប៉េង និងបក្ខពួក ដើម្បីទំលាក់​​កំហុសដោយអសុទ្ធចិត្ត និងប៉ះពាល់ ដល់កិត្តិយស សេចក្តីថ្លៃថ្នូររបស់ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន។ ជាការពិតដែល តុលាការគ្រប់ជាន់ថ្នាក់ (សាលាដំបូងដល់តុលាការកំពូល) បានសម្រេចសេចក្តីផ្តន្ទាទោសដាក់ពន្ធនាគារលើ ទណ្ឌិតឈ្មោះ អ៊ឹង លីប៉េង និងបញ្ជាក់ពីភាពត្រឹមត្រូវ ស្អាតស្អំ ផ្តល់​​យុត្តិធម៌ជូនឯកឧត្តម អ៊ាង សុផល្លែត ជាជន រងគ្រោះដែលត្រូវបានច្បាប់ការពារស្របតាមគោលការណ៍នីតិរដ្ឋ។ បច្ចុប្បន្ន ទណ្ឌិត​​រូបនេះបានគេចខ្លួន និងមិន ទាន់បានអនុវត្តទោសចប់សព្វគ្រប់តាមការកំណត់នៅ​​ឡើយទេ ព្រមទាំងបានផ្សព្វ​​ផ្សាយ និងធ្វើអត្ថាធិប្បាយជា រឿយៗតាមរយៈបណ្តាញសង្គម និងបណ្តាញផ្សព្វ​​ផ្សាយ​​មួយចំនួនតូច រួមទាំងសារព័ត៌មានក្រៅច្បាប់ ក្នុងន័យជា ការប្រឌិតរឿងហេតុដោយគ្មានមូលដ្ឋានភស្តុ​​​តាងពិតប្រាកដ ជាមួយនឹងចេតនាទុច្ចរិតដើម្បីចោទប្រកាន់​​ជា បន្តបន្ទាប់មកលើ ឯកឧត្តម អ៊ាង សុ​​ផល្លែត។ ទន្ទឹមនឹងនេះ ទង្វើរបស់ទណ្ឌិតរូបនេះ និងបក្ខពួក បានស្តែងឱ្យឃើញ​​ពីការប្រមាថ ការបរិហារ ការគំរាម​​កំហែង និងការញុះញង់ឱ្យមានការរើសអើងទៅលើថ្នាក់ដឹកនាំជា រដ្ឋមន្ត្រីនៃក្រសួងបរិស្ថាន ក៏ដូចជាការមិនគោរព និងអនុវត្តសេចក្ដីសម្រេចរបស់តុលាការដែលសម្រេច យ៉ាងត្រឹមត្រូវ និងយុត្តិធម៌ ស្របតាម​​​​​​ច្បាប់និងនីតិវិធីជាធរមាននៃព្រះរាជាណាចក្រកម្ពុជាថែមទៀតផង។

ជាការឆ្លើយតបចំពោះករណីខាងលើនេះ និងជាការអនុវត្តសិទ្ធិពេញលេញតាមផ្លូវច្បាប់ ឯកឧត្តម អ៊ាង សុផល្លែត គោរពស្នើ​​សុំ​​​​សា្ថប័នមានសមត្ថកិច្ចពាក់ព័ន្ធចាត់វិធានការតាមច្បាប់ទៅលើទណ្ឌិតឈ្មោះ អ៊ឹង លីប៉េង និងបក្ខពួក ហើយក៏អំពាវនាវ និង​​លើកទឹកចិត្តឱ្យទណ្ឌិតរូបនេះចូលមកបង្ហាញខ្លួនដើម្បីទទួល ខុសត្រូវទៅលើទង្វើរបស់ខ្លួនតាមច្បាប់កំណត់ ជៀសជាងការ​​គេចវេសជាមួយនឹងទណ្ឌភាព។ ទន្ទឹមនឹងនេះ ទណ្ឌិតរូបនេះក៏អាចអនុវត្តសិទ្ធិពេញលេញតាមផ្លូវច្បាប់ចំពោះការតតាំងដោយ​​ស្មើភាពគ្នាតាមផ្លូវច្បាប់ ដោយ អនុលោមតាមនីតិវិធីជាធរមាននៅចំពោះមុខស្ថាប័នមានសមត្ថកិច្ចនៃព្រះរាជា​​ណា​​​ចក្រ​​​​កម្ពុជា ។ តាមរយៈសេចក្ដីបំភ្លឺនេះ សូម សាធារណជន មេត្តាជ្រាបអំពីការពិតនៃដំណើររឿងនេះ និងជៀស វាងការភាន់ច្រឡំដោយជឿលើព័ត៌មានប្រឌិតដែលគ្មានមូលដ្ឋានច្បាស់លាស់របស់ទណ្ឌិតឈ្មោះ អ៊ឹង លីប៉េង និងបក្ខពួក។

កាលពីចុងឆ្នាំ២០២៣ ទំព័រហ្វេសប៊ុក VOD Khmer បានចុះផ្សាយថា លោកអ៊ឹង លីប៉េង បានអំពាវនាវឱ្យរាជ​​រដ្ឋាភិបាល​​ជួយ​​រកយុត្តិធម៌ ដោយចោទប្រកាន់ថា ឯកឧត្តមអ៊ាង សុផល្លែត រដ្ឋមន្រ្តីក្រសួងបរិស្ថាន បាន​​បោក​​​យកលុយជាង៨ម៉ឺនដុល្លារ ករណីទិញដីជាង១៤០ហិកតា នៅខេត្តកំពត ដោយលោកអះអាងថា លោកបានជួយទិញដីឱ្យឯកឧត្តម អ៊ាង សុ​​ផល្លែត ថ្លៃជាង៤លានដុល្លារអាមេរិក ដូច្នេះលោកត្រូវបានកម្រៃជើង​​សារ​​ពីម្ចាស់ដីជាង៨ម៉ឺនដុល្លារ តែត្រូវបានរដ្ឋមន្រ្តីក្រសួង​​បរិស្ថានកាត់ទុកទាំងអស់ទៅវិញ៕