អត្ថបទ៖​ កែវ រតនៈ

ក្នុងទិវាដែលប្រពឹត្តទៅថ្ងៃទី ១៣ ខែ វិច្ឆិកា ឆ្នាំ២០២៤ នៅ សណ្ឋាគារសាន់វេ នារាជធានីភ្នំពេញនេះ លោក វន់ ពៅ ប្រធានសមាគម ប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់IDEA មានប្រសាសន៍ថា ទិវាអន្តរជាតិអ្នក​​លក់តាម​​ដង​ផ្លូវនេះត្រូវបានបង្កើតឡើង១២ឆ្នាំមកហើយដែលកើតចេញពីការទាមទារសិទ្ធិរបស់កម្មករ និងអ្នកលក់ដូរតាមដងផ្លូវ ជាពិសេសនៅតំប​ន់អាហ្រិកខាងត្បូង អាស៊ីខាងកើត និងអាស៊ីអាគ្នេយ៍ផងដែរ។ លោកបន្តថា រាជរដ្ឋាភិបាលកម្ពុជា បាន​បង្កើតច្បាប់ និងឯកសារគតិយុត្តិជាច្រើន​ដើម្បីគាំពារដល់កម្មករសេដ្ឋកិច្ចក្រៅប្រព័ន្ធជា​​ពិសេសគឺអ្នកលក់ដូរតាមដងផ្លូវ​ដែល​បង្ហាញពីការយកចិត្តទុកដាក់ចំពោះកម្មករ អ្នកដែលប្រកប​រប​រក្នុងវិស័យសេដ្ឋកិច្ចក្រៅប្រព័ន្ធ។​ យ៉ាងនេះក្តីលោកក៏​អំពាវនាវដល់រាជរដ្ឋាភិបាលយកចិត្តទុកដាក់បន្ថែមលើកម្មករ អ្នកដែលប្រកប​រប​រក្នុងវិស័យសេដ្ឋកិច្ចក្រៅប្រព័ន្ធ និងអ្នក​​លក់ដូរតាមដងផ្លូវ ព្រោះរហូតមកដល់ពេលនេះនៅតែមានជនខិលខូចមួយចំនួនមិន​​គោរពតាមឯកសារ គតិ​​យុត្តិ​របស់រាជ​​រដ្ឋាភិបាល ដោយបានក្លែងបន្លំជាអាជ្ញាធរ និងសមត្ថកិច្ច មកទារលុយឥតល្ហែពីអ្នកលក់ដូរតាមដងផ្លូវ ជាពិសេស ពេលដែល​​កម្មករ កម្មការិនីចេញពីធ្វើការ ដែលនេះធ្វើឱ្យប៉ះពាល់ដល់ជីវភាពអ្នកលក់​​ដូរតាមដងផ្លូវ។

លោក តាន់ វិសាល អ្នកសម្របសម្រួលកម្មវិធីគាំពារសង្គមនិង សិទ្ធិការងារ របស់អង្គការអុកស្វាម មានប្រសាសន៍​ថា នៅក្នុងប្រទេសកម្ពុជា ក៏ដូចជានៅលើពិភពលោក អ្នកលក់ដូរតាមផ្លូវមានចំនួនកើនជាលំដាប់ និងឆាប់រហ័ស ព្រោះវាជាប្រភពការងារ និងប្រភពចំណូលយ៉ាងសំខាន់សម្រាប់គ្រួសារដែលមានជីវភាព​​កម្រិតទាប។ លោកបន្តថា អ្នកលក់ដូរតាមដងផ្លូវ ត្រូវប្រើចិញ្ចើមផ្លូវ ទីសាធារណៈ ហើយត្រូវបំលាស់ទីពីកន្លែងមួយទៅកន្លែងមួយ តែអ្នកលក់ដូរតាមដងផ្លូវបាន និងកំពុងធ្វើឱ្យប្រសើរឡើងនូវ សេដ្ឋកិច្ចគ្រួសារ និងសេដ្ឋកិច្ចជាតិ ដូចនេះអ្នកលក់ដូរតាមដងផ្លូវមានសិទ្ធិដូចកម្មករក្នុងវិស័យដទៃទៀតផងដែរ។

ឯកឧត្តម ហេង សួរ  រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ការគាំពារសង្គមសម្រាប់​​អ្នកលក់ដូរតាមដងផ្លូវ ដើម្បីអន្តរកាលយុត្តិធម៌ ក៏ជាចក្ខុវិស័យមួយរបស់រាជរដ្ឋាភិបាលកម្ពុជាផង​​ដែរ ហើយក៏ស្របតាមយុទ្ធសាស្ត្រគាំពារសង្គមដែលរាជរដ្ឋាភិបាលបានដាក់តាំងពីឆ្នាំ២០១៦ផងដែរ។ ឯកឧត្តម​​ក៏បានលើកឡើងថា ការលក់ដូរតាមដងផ្លូវគឺមានជាយូរណាស់មកហើយ តាំងពីសម័យបុរាណ ដែលការលក់ដូររបៀបនេះគឺតែងតែជួបការប្រឈម ជាពិសេសគឺកត្តាអាកាសធាតុ ពោលគឺកម្ដៅបានកើនឡើងជាបន្តបន្ទាប់ ដែលនេះតម្រូវឱ្យមានដំណោះស្រាយរួមគ្នា។

ចំពោះការលើកឡើងរបស់លោក វន់ ពៅជុំវិញការបណ្ដេញអ្នកលក់ដូរតាមចិញ្ចើមផ្លូវចេញ និងការទារលុយពីអ្នកលក់ដូរតាមដងផ្លូវវិញ ឯកឧត្តម ហេង សួរ សន្យាថានឹងយកបញ្ហានេះទៅពិភាក្សាជាមួយអាជ្ញាធរ ជាពិសេសគឺអាជ្ញាធររាជធានីភ្នំពេញតែម្ដង។ យ៉ាងនេះក្តីឯកឧត្តមក៏បានលើកឡើងថា នៅពេលដែលក្រសួងក៏ដូចជាអាជ្ញាធរ ជួយដល់អ្នកលក់ដូរតាមដងផ្លូវ ក៏មានផងដែរការតវ៉ាពីអ្នកលក់ដូរតាមតូបក្នុងផ្សារ ព្រោះថាពួកគេបានទិញ ឬជួលតូបក្នុងផ្សារដែលត្រូវចំណាយប្រាក់ច្រើន តែបែជាលក់មិនឈ្នះអ្នកលក់ដូរតាមដងផ្លូវទៅវិញ៕