K01 ត្រូវបាននគរបាលឃាត់ខ្លួន ពាក់ព័ន្ធករណីប្រើអំពើហិង្សាលើយុវជនម្នាក់

10 ម៉ោងមុន

លោក ឃឿន សុឡា ហៅ K01 ត្រូវបានកម្លាំងនគរបាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ ឃាត់ខ្លួននៅព្រឹកថ្ងៃទី៣០ ខែមិថុនា ឆ្នាំ២០២៦ បន្ទាប់ពីបានចូលខ្លួនតាមការកោះហៅរបស់មន្ត្រីនគរបាលយុត្តិធម៌ ដើម្បីបំភ្លឺពាក់ព័ន្ធករណីប្រើអំពើហិង្សាលើយុវជនម្នាក់។

លោក ឃឿន សុឡា ហៅ K01 មានមុខរបរផ្តល់សេវាកម្មលក់អចលនទ្រព្យ និងលក់រថយន្ត បច្ចុប្បន្នស្នាក់នៅដីឡូតិ៍គ្មានលេខ ផ្លូវលំ ភូមិរោងចក្រ សង្កាត់គោកឃ្លាង ខណ្ឌសែនសុខ រាជធានីភ្នំពេញ បានចូលបំភ្លឺនៅការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ពាក់ព័ន្ធហេតុការណ៍ដែលបានកើតឡើងកាលពីថ្ងៃទី២៨ ខែមិថុនា ឆ្នាំ២០២៦។

សមត្ថកិច្ចបានឱ្យដឹងថា ករណីនេះពាក់ព័ន្ធនឹងការប្រើអំពើហិង្សាលើយុវជនម្នាក់ ដែលត្រូវបានបញ្ជាឱ្យលុតជង្គង់សុំទោសម្តាយបង្កើតរបស់ខ្លួន បន្ទាប់ពីយុវជនរូបនោះត្រូវបានចោទថា មិនស្តាប់បង្គាប់ម្តាយ ខណៈម្តាយមានបំណងឱ្យកូនទៅស្នាក់នៅ និងធ្វើការនៅកន្លែងរបស់បុគ្គល K01។

ក្រោយហេតុការណ៍នេះ វីដេអូ និងព័ត៌មានពាក់ព័ន្ធត្រូវបានផ្សព្វផ្សាយយ៉ាងទូលំទូលាយនៅលើបណ្តាញសង្គម ដែលបង្កឱ្យមានប្រតិកម្ម និងការរិះគន់ជាច្រើនពីសាធារណជន ចំពោះសកម្មភាពប្រើអំពើហិង្សារបស់បុគ្គលរូបនេះ។

បន្ទាប់ពីបញ្ចប់ការសាកសួរ សមត្ថកិច្ចបានអនុវត្តតាមបទបញ្ជារបស់ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយសម្រេចឃាត់ខ្លួនឈ្មោះ ឃឿន សុឡា ហៅ K01 ដើម្បីបន្តអនុវត្តតាមនីតិវិធីច្បាប់៕