ភ្នំពេញ ថ្ងៃទី២៥ ខែសីហា ឆ្នាំ២០២៦ — រដ្ឋមន្ត្រីអង់គ្លេសទទួលបន្ទុកតំបន់ឥណ្ឌូ-ប៉ាស៊ីហ្វិក លោកស្រី Rosie Winterton បានអំពាវនាវឱ្យមានកិច្ចសន្ទនា និងការដោះស្រាយបញ្ហាដោយសន្តិវិធីរវាងកម្ពុជា និងថៃ ខណៈលោកស្រីកំពុងបំពេញទស្សនកិច្ចជាលើកដំបូងនៅកម្ពុជា ដោយផ្តោតលើសន្តិភាព ស្ថិរភាព ការស្តារឡើងវិញផ្នែកមនុស្សធម៌ និងកិច្ចសហប្រតិបត្តិការអភិវឌ្ឍន៍រយៈពេលវែង។

ក្នុងដំណើរទស្សនកិច្ចនេះ លោកស្រី Winterton នឹងធ្វើដំណើរទៅកាន់ខេត្តសៀមរាប និងខេត្តឧត្តរមានជ័យ មុននឹងបន្តទៅរាជធានីភ្នំពេញ ដើម្បីជួបពិភាក្សាជាមួយមន្ត្រីរដ្ឋាភិបាលកម្ពុជា ស្តីពីបញ្ហាពាណិជ្ជកម្ម និងការវិនិយោគ ការអភិវឌ្ឍ សិទ្ធិមនុស្ស និងកិច្ចសហប្រតិបត្តិការទ្វេភាគី។

នៅខេត្តឧត្តរមានជ័យ លោកស្រីនឹងចុះទៅកាន់តំបន់កក់ប្រាសាទ ដើម្បីពិនិត្យមើលកម្មវិធីអប់រំដែលទទួលបានការគាំទ្រពីចក្រភពអង់គ្លេស សម្រាប់កុមារដែលត្រូវបានផ្លាស់ទីលំនៅដោយសារជម្លោះព្រំដែនកម្ពុជា–ថៃនាពេលថ្មីៗនេះ។

កម្មវិធីនេះមានគោលបំណងជួយឱ្យកុមារដែលរងផលប៉ះពាល់ពីជម្លោះអាចបន្តការសិក្សា និងចាប់ផ្តើមស្តារជីវិតរបស់ពួកគេឡើងវិញ។ ដំណើរទស្សនកិច្ចនេះក៏បង្ហាញពីការគាំទ្ររបស់ចក្រភពអង់គ្លេសចំពោះសន្តិភាពប្រកបដោយចីរភាព និងការអនុវត្តពេញលេញនូវបទឈប់បាញ់ដែលបានព្រមព្រៀងកាលពីខែធ្នូ ឆ្នាំ២០២៥។

លោកស្រី Rosie Winterton បានថ្លែងថា៖ «កម្ពុជាស្ថិតនៅចំកណ្តាលតំបន់មួយដែលមានសារៈសំខាន់ចំពោះសន្តិសុខ និងវិបុលភាពរបស់ចក្រភពអង់គ្លេស»។

លោកស្រីបន្តថា ក្នុងដំណើរទស្សនកិច្ចក្រៅប្រទេសជាលើកដំបូងក្នុងតួនាទីជារដ្ឋមន្ត្រីទទួលបន្ទុកឥណ្ឌូ-ប៉ាស៊ីហ្វិក លោកស្រីបានឃើញដោយផ្ទាល់ពីរបៀបដែលការគាំទ្ររបស់អង់គ្លេសកំពុងជួយសហគមន៍ដែលរងផលប៉ះពាល់ពីជម្លោះស្តារជីវិតឡើងវិញ និងជួយសម្អាតមីនដែលនៅតែគំរាមកំហែងដល់ជីវិត និងជីវភាពរស់នៅរបស់ប្រជាជន។

លោកស្រីបានបញ្ជាក់ថា៖ «ចក្រភពអង់គ្លេសប្តេជ្ញាចំពោះស្ថិរភាព និងការអភិវឌ្ឍរយៈពេលវែងរបស់កម្ពុជា និងចំពោះការធ្វើការរួមគ្នាដើម្បីតំបន់មួយដែលមានសន្តិភាព និងវិបុលភាព»។

ក្រៅពីកម្មវិធីអប់រំ លោកស្រី Winterton ក៏នឹងជួបអ្នកជំនាញផ្នែកបោសសម្អាតមីនមកពីអង្គការ HALO Trust និង Apopo ដែលធ្វើការលើការបោសសម្អាតមីន និងសំណល់ជាតិផ្ទុះនៅកម្ពុជា។

ចក្រភពអង់គ្លេសបានគាំទ្រកិច្ចខិតខំប្រឹងប្រែងបោសសម្អាតមីន និងការស្តារឡើងវិញផ្នែកមនុស្សធម៌នៅកម្ពុជាអស់រយៈពេលជាង៣ទសវត្សរ៍មកហើយ។

ចាប់តាំងពីឆ្នាំ២០១៤ កម្មវិធីដែលទទួលបានការគាំទ្រពីអង់គ្លេសបានជួយបោសសម្អាតផ្ទៃដីដែលមានទំហំស្មើនឹងទីលានបាល់ទាត់ប្រមាណ ២២,៤០០ និងប្រគល់ដីទាំងនោះត្រឡប់ទៅប្រើប្រាស់សម្រាប់ផលិតកម្ម និងជីវភាពរស់នៅរបស់ប្រជាជន។

កាលពីខែឧសភា ចក្រភពអង់គ្លេសបានប្រកាសផ្តល់ថវិកាបន្ថែមចំនួន ១.៦ លានផោន សម្រាប់ការបោសសម្អាតមីន និងការអប់រំអំពីហានិភ័យដោយសារមីននៅកម្ពុជា។

ថវិកានេះត្រូវបានរំពឹងថានឹងជួយបោសសម្អាតផ្ទៃដីដែលរងការបំពុលដោយមីនជិត ១.៩៤ លានម៉ែត្រការ៉េ និងជួយគាំទ្រដល់គោលដៅរបស់កម្ពុជាក្នុងការក្លាយជាប្រទេសដែលរងផលប៉ះពាល់ពីមីនស្ទើរតែសូន្យនៅឆ្នាំ២០៣០។

នៅរាជធានីភ្នំពេញ លោកស្រី Winterton ត្រូវបានរំពឹងថានឹងជួបនាយករដ្ឋមន្ត្រីកម្ពុជា លោក ហ៊ុន ម៉ាណែត ដើម្បីពិភាក្សាអំពីភាពជាដៃគូរវាងចក្រភពអង់គ្លេស និងកម្ពុជា ព្រមទាំងអាទិភាពរួមសម្រាប់អនាគត។

វិស័យអប់រំក៏ជាប្រធានបទសំខាន់មួយក្នុងដំណើរទស្សនកិច្ចនេះផងដែរ។ កម្ពុជា និងចក្រភពអង់គ្លេសគ្រោងនឹងចុះហត្ថលេខាលើ អនុស្សរណៈនៃការយោគយល់ (MoU) ដើម្បីពង្រឹងភាពជាដៃគូរវាងស្ថាប័នអប់រំ ជំរុញការផ្លាស់ប្តូរចំណេះដឹង និងអភិវឌ្ឍជំនាញដែលចាំបាច់សម្រាប់ការរីកចម្រើនសេដ្ឋកិច្ចរបស់កម្ពុជានាពេលអនាគត។

ក្នុងរយៈពេលប៉ុន្មានឆ្នាំចុងក្រោយនេះ សាកលវិទ្យាល័យ និងស្ថាប័នអប់រំរបស់អង់គ្លេសបានបង្កើនវត្តមានរបស់ខ្លួននៅកម្ពុជា។ សាកលវិទ្យាល័យ De Montfort និង Teesside គឺជាស្ថាប័នមួយចំនួនដែលកំពុងផ្តល់កម្មវិធីសិក្សាថ្នាក់បរិញ្ញាបត្ររបស់អង់គ្លេសនៅកម្ពុជា ដែលអនុញ្ញាតឱ្យយុវជនកម្ពុជាទទួលបានឱកាសសិក្សាថ្នាក់អន្តរជាតិ។

ដំណើរទស្សនកិច្ចរបស់លោកស្រី Rosie Winterton ត្រូវបានគេមើលឃើញថា ជាការបង្ហាញពីការប្តេជ្ញាចិត្តរបស់ចក្រភពអង់គ្លេសក្នុងការពង្រឹងទំនាក់ទំនងជាមួយកម្ពុជា ជាពិសេសលើវិស័យសន្តិភាព សន្តិសុខ ជំនួយមនុស្សធម៌ ការអប់រំ និងការអភិវឌ្ឍប្រកបដោយចីរភាព។

សម្រាប់កម្ពុជា ការបង្កើនការយកចិត្តទុកដាក់របស់អង់គ្លេសលើជំនួយមនុស្សធម៌ និងស្ថិរភាពក្នុងតំបន់ កើតឡើងនៅក្នុងបរិបទដែលកម្ពុជាកំពុងបន្តដោះស្រាយផលប៉ះពាល់ផ្នែកមនុស្សធម៌ និងសេដ្ឋកិច្ចសង្គមពីជម្លោះព្រំដែនកម្ពុជា–ថៃ និងស្វែងរកការស្តារឡើងវិញ និងសន្តិភាពប្រកបដោយចីរភាពក្នុងរយៈពេលវែង។