ដោយ៖ សំនៀង

ក្នុងពិធីប្រកាសដាក់ឱ្យអនុវត្តសាកល្បង លើការកែលម្អរថយន្តដឹកជញ្ជូនកម្មករនិយោជិតឱ្យកាន់តែមានផា សុកភាព និងសុវត្ថិភាព និងការត្រួតពិនិត្យលក្ខណៈបច្ចេកទេសរថយន្តដឹកជញ្ជូនកម្មករនិយោជិត ជាលើក ទី២ ដែលរៀបចំឡើងដោយបេឡាជាតិសន្តិសុខសង្គម នារសៀលថ្ងៃអង្គារ ទី២០ ខែមករា ឆ្នាំ២០២៦ នៅរោងចក្រ ស៊ិនគី អឹភែរឹល (SHINKI APPAREL (CAMBODIA)) ក្នុងខេត្តកំពង់ឆ្នាំង ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បបានមានប្រសាសន៍ថា ក្រសួងការងារ និងក្រសួងសាធារណការ បាននិងកំពុងខិតខំសហការគ្នា ដើម្បីជំរុញឱ្យមានការផ្លាស់ប្តូររថយន្តពីប្រភេទដឹកទំនិញ ទៅជារថយន្តដឹកអ្នកដំណើរ ឬកែលម្អឱ្យមានកៅអីអង្គុយសមរម្យ សម្រាប់ដឹកជញ្ជូនកម្មករនិយោជិត ឱ្យកាន់តែប្រសើរជាងមុន ដែលមានផាសុកភាព សុវត្ថិភាព និងសណ្ដាប់ធ្នាប់ ក៏ដូចជាការរឹតបន្តឹងការត្រួតពិនិត្យលក្ខណៈបច្ចេកទេស។

ឯកឧត្តមបន្តថា ការកែលម្អរថយន្តដឹកកម្មករដែលមានស្ដង់ដារ ដូចជាមានកៅអីអង្គុយ និងដំបូលការពារកម្ដៅ និងភ្លៀងត្រឹមត្រូវនេះ គឺមិនឱ្យមានការខាតបង់ប្រយោជន៍ដល់ភាគីណាមួយឡើយ ទាំងអ្នកបើកបរ បងប្អូនកម្មករ និងម្ចាស់រោងចក្រ ព្រោះថាការជិះឈរប្រជ្រៀតគ្នា គឺអាចប្រឈមនឹងហានិភ័យទាំងសុវត្ថិ​ភាព និងសុខភាព ដែលនាំឱ្យផលិតភាពការងារធ្លាក់ចុះ។ ឯកឧត្តមសង្ឃឹមថាម្ចាស់រោងចក្រ ម្ចាស់ម៉ាកដែលជាអ្នកបញ្ជាទិញ និងបងប្អូនកម្មករនិយោជិត ក៏នឹងចូលរួមចំណែកគាំទ្រ ដើម្បីធានាថាគ្រប់ភាគីទាំងអស់សុទ្ធតែទទួលបានផលពីការកែលម្អនេះ។

លោកស្រី Xiaoyan Qian នាយិកាអង្គការអន្តរជាតិខាងការងារ (ILO) ប្រចាំប្រទេសកម្ពុជា ឡាវ និងថៃ ក៏បានសម្តែងការអបអរសាទរចំពោះគម្រោងសាកល្បងនេះ និងបានបញ្ជាក់ថា អង្គការ ILO ត្រៀមខ្លួនជាស្រេចក្នុងការជួយគាំទ្រដល់រាជរដ្ឋាភិបាលកម្ពុជា ក្នុងការពង្រឹងបទដ្ឋានកែលម្អ និងពង្រីកគម្រោងនេះទៅបណ្ដាខេត្តផ្សេងៗទៀត ព្រោះវាផ្តល់ប្រយោជន៍យ៉ាងខ្លាំងដល់គ្រប់ភាគី ជាពិសេសគឺសុវត្ថិភាព និងសុខភាពរបស់កម្មករនិយោជិតដែលជាកត្តាដ៏ចម្បង។

យោងតាមរបាយការណ៍របស់ ឯកឧត្តម ស៊ុន សុវណ្ណារិទ្ធិ អភិបាល នៃគណៈអភិបាលខេត្តកំពង់ឆ្នាំង អាជ្ញាធរខេត្តបាននិងកំពុងយកចិត្តទុកដាក់ខ្ពស់លើការលើកកម្ពស់ផាសុកភាព និងសុវត្ថិភាពកម្មករ។ បច្ចុប្បន្ន ខេត្តកំពង់ឆ្នាំងមានរោងចក្រ សហគ្រាសចំនួន ៤៩៤កន្លែង មានកម្មករនិយោជិតចំនួន ៦៩ ៦៦១នាក់។ ចំណែកស្ថិតិយានយន្ត និងអ្នកបើកបររថយន្តដឹកជញ្ជូនកម្មករសរុបមានចំនួន ៣ ៣០៨គ្រឿង ក្នុងនោះរថយន្តដឹកកម្មករមានចំនួន ៣ ២៤៨គ្រឿង ដែលមានកម្មករជិះរថយន្តសរុបចំនួន ១៣៦ ៦៦០នាក់៕

 រូបភាព៖ ក្រសួងការងារ